Nos Lektornan Ta Puntra

Kontratempu di Bida Ta Kastigu di Dios?

Bo a yega di haña bo ku un suseso troumátiko ku a pone bo puntra si ta Dios ke pa bo sufri? Un malesa repentino, un aksidente ku ta laga un persona desabilitá òf e morto prematuro di un miembro di famia kisas ta laga nos pensa ku ta nèt nos Dios a skohe pa kastigá.

En bes di pensa asina, ta un konsuelo pa sa ku Dios ke pa hende biba felis sin ningun sufrimentu. Esei ta bisto na e echo ku ora Dios a krea e promé hendenan, el a pone nan den “e hòfi di Edén,” un paradeis unda bida lo tabata liber di tur sufrimentu.​—Génesis 2:15.

Lamentablemente, e promé pareha humano a skohe pa rechasá e perspektiva maravioso akí, i deliberadamente nan a desobedesé Dios. E resultado tabata desastroso pa nan i pa tur nan desendientenan, inkluso nos. Dikon? Nos por kompará e situashon ku loke ta sosodé ora un kabes di kas no paga hür di kas. Henter e famia tin ku sali for di e kas i ta haña nan ku kontratempu i miseria. Di mes manera, henter humanidat ta haña nan ku kontratempu for di tempu ku e promé rebelion a tuma lugá. (Romanonan 5:12) Hopi aña despues, e hòmber hustu Jòb a lamentá i a bisa ku si su doló- i sufrimentunan por a wòrdu pisá “den balansa,” nan lo tabata “mas pisá ku santu di laman.”​—Jòb 6:​2, 3.

Un otro motibu pakiko nos ta haña nos ku kontratempu ta e echo ku nos kapasidat pa mira kosnan adelantá ta limitá. Por ehèmpel, imaginá bo ku un hende ku ta konstruí i bende kas ta traha e kasnan akí den un área kaminda hopi bes sa tin kandela di mondi. Anto sin ku bo tabata sa esei, bo a kumpra un di e kasnan ei i a bai biba aden. Bo no ta kere ku ta abo mes ta eksponé bo mes i bo famia na problema serio? Si bo haña bo mes den kualke difikultat komo konsekuensia di esei, bo no por bisa ku ta kastigu di Dios, no ta bèrdat? Beibel ta bisa kiko ta e berdadero motibu: “E hende simpel ta kere tur kos, ma e hòmber prudente ta wak bon unda e ta bai.”​—Proverbionan 14:15.

Sinembargo, ta un konsuelo pa sa ku apesar ku nos tur ta haña nos ku kontratempu, Dios su propósito ta ku pronto humanidat lo ser librá di esei. Ora e tempu ei yega, nunka mas lo bo eksperensiá, mira òf ni sikiera tende di kontratempu. Lágrimanan di tristesa, doló, morto i luto lo “a pasa” pa historia. (Revelashon 21:4) Un otro promesa alentador ta ku nunka mas guera i desaster lo destruí kas ku hende traha ni loke nan a planta. En bes di esei, hende lo disfrutá plenamente di e obra di nan mannan “pa hopi tempu.”​—Isaias 65:​21-25.

Miéntras ku bo ta spera riba Dios p’e eliminá tur kontratempu i sufrimentu, kiko bo por hasi awor pa mengua nan efekto? Mas ku tur kos, Beibel ta animá nos pa ‘no dependé riba nos mes komprondementu,’ ma pa ‘konfia den Yehova ku henter nos kurason.’ (Proverbionan 3:5) Buska su guia i konsuelo. Presta atenshon na e sabiduria di Dios ku Beibel ta kontené. Esei lo yuda bo tuma desishonnan sabí i lo protehá bo kontra e kontratempunan ku bo por evitá.​—Proverbionan 22:3.