SEGUN Beibel: “Esun ku no ta stima no konosé Dios, pasobra Dios ta amor.” (1 Juan 4:8) P’esei, e religion ku ta bon mester promové amor entre su miembronan i pa otro hende.

Hopi religion ta hasi un ekselente trabou den kuido di hende enfermo i di edat avansá i yudando hende pober. Nan ta animá nan miembronan pa apliká e konseho di apòstel Juan, kende a skirbi: “Ma ken ku tin e biennan di mundu, i ta mira su ruman den nesesidat i ta sera su kurason p’e, ta kon e amor di Dios ta permanesé den dje? Yu chikitunan, no laga nos stima ku palabra ni  ku lenga, ma ku echo i bèrdat.”—1 Juan 3:17, 18.

Pero, kiko ta pasa ora nashonnan ta bai guera? Ta durante tempu di pas so nan tin ku obedesé e mandato di Dios pa “stima bo próhimo manera bo mes”? Esaki no ta válido ora un polítiko òf rei ta skohe pa bringa kontra un otro nashon?—Mateo 22:39.

Hesus a bisa: “Si boso stima otro, tur hende lo sa ku boso ta mi disipelnan.” (Huan 13:35, BPK) Segun ku bo ta kontestá e siguiente preguntanan, puntra bo mes: ‘Miembronan di e religion akí ta demostrá amor, no ku palabra so pero tambe ku echo, na tur hende i na tur momento?’

LOKE BEIBEL TA SIÑA: Hesus a duna su disipelnan e mandato akí: “Stima boso enemigunan; hasi bon pa esnan ku ta odia boso.”—Lukas 6:27, BPK.

Ora sòldánan a bin pa arestá Hesus, apòstel Pedro a saka su spada pa defendé Hesus. Sinembargo, Hesus a bisa Pedro: “Pone bo spada bèk na su lugá; pasobra tur esnan ku saka spada lo peresé pa medio di spada.”—Mateo 26:52.

Apòstel Juan a skirbi: “Na esaki nos ta rekonosé ken ta yu di Dios i ken ta yu di diabel: esun ku no ta hasi loke ta hustu den bista di Dios, no ta pertenesé na Dios, i spesialmente esun ku no ta stima su ruman. Ta e mensahe aki mes boso a tende for di kuminsamentu: ku nos mester stima otro. Nos no mester hasi manera Kain, ku tabata pertenesé na e malbado i a asesiná su mes ruman Abel!”—1 Huan 3:10-12, BPK.

PREGUNTA: E religion akí ta animá su miembronan pa partisipá den guera?

LOKE BEIBEL TA SIÑA: Despues ku algun hende a mira ku Hesus tabatin poder pa hasi milager, nan tabata ke pa e enbolbé su mes den polítika. Kon Hesus a reakshoná? “Hesus anto, sabiendo ku nan tabatin intenshon di bin i gar’é pa hasié rei, a retirá atrobe bai riba e seru, e so.”—Juan 6:15.

Ora nan a arestá Hesus i a akus’é falsamente di ta instigá hende pa lanta kontra gobièrnu, el a kontestá: “Mi reino no ta di e mundu aki; sino mi sirbidónan lo a bringa pa mi no kai den man di outoridatnan hudiu. Nò, mi reino no ta djaki.”—Huan 18:36, BPK.

Na un okashon, ora Hesus tabata hasi orashon na Dios relashoná ku su disipelnan, el a bisa: “Mi a duna nan bo palabra; i mundu a odia nan, pasobra nan no ta di mundu, meskos ku ami no ta di mundu.”—Juan 17:14.

 PREGUNTA: E religion akí ta sigui Hesus su ehèmpel i ta evitá di enbolbé su mes den polítika, maske esei ta nifiká ku algun polítiko lo odia su miembronan?

LOKE BEIBEL TA SIÑA: Tempu ku e promé hendenan no-hudiu insirkunsidá a bira kristian, apòstel Pedro a remarká: “Di bèrdat mi ta komprondé awor ku Dios no ta hasi distinshon di persona, ma den tur nashon e hende ku ta tem’é i ku ta hasi hustisia ta aseptabel p’e.”—Echonan 10:34, 35.

Santiago a skirbi lo siguiente na e kristiannan di promé siglo: “Mi rumannan, no laga boso fe den nos glorioso Señor Hesukristu ta ku un aktitut di distinshon di persona. Pasobra si un hende drenta den boso asamblea bon bistí i ku renchi di oro na dede, i ta drenta tambe un hende pober bistí ku paña sushi, i boso ta paga atenshon spesial na esun ku ta bon bistí i ta bisa: ‘Abo sinta akinan na un bon lugá,’ i boso ta bisa e hende pober: ‘Abo bai para ayanan, òf bai sinta banda di e banki pa mi pianan,’ boso no a hasi distinshon entre boso mes, i a bira huesnan ku mal pensamentu?”—Santiago 2:1-4.

PREGUNTA: E religion akí ta siña su miembronan ku tur hende ta igual den bista di Dios i ku nan no mester diskriminá ningun hende a base di rasa òf posishon ekonómiko?