Adorashon Komo Famia Ta Sumamente Importante pa Sobrebibi!

BO POR imaginá bo kon inspirador di temor “e guera di e gran dia di Dios Todopoderoso” lo ta? (Rev. 16:14) Usando un idioma simbóliko i bibu, profeta Mikeas a skirbi: “E serunan lo dirti . . . , i e vayenan lo wòrdu gespleit, manera was dilanti di kandela, manera awa bashá for di un lugá steil.” (Mik. 1:4) Ki resultado desastroso lo tin pa esnan ku no ta sirbi Yehova? E Palabra di Dios ta bisa: “Esnan ku SEÑOR mata riba e dia ei lo keda bentá tur kaminda, for di esun ekstremo di mundu te na e otro.”​—Jer. 25:33.

En bista di e spièrtamentunan ei, ta bon pa kabesnan di famia—di kua hopi ta mayor soltero—hasi nan mes e siguiente pregunta enkuanto nan yunan ku ta sufisiente grandi pa por rasoná: ‘Mi yunan lo sobrebibí Armagedón?’ Beibel ta duna nos e siguransa ku nan lo sobrebibí basta ku nan tin un bon relashon ku Yehova, di akuerdo ku nan edat.​—Mat. 24:21.

E Importansia di Apartá Tempu pa Adorashon Komo Famia

Komo mayor, sòru pa bo hasi tur loke bo por pa lanta bo yunan ‘den e disiplina i instrukshon di Yehova.’ (Efe. 6:4) Ta di sumo importansia pa bo studia Beibel ku bo yunan. Nos ke pa nos yunan bira manera e kristiannan na Filipos, kendenan a haña elogio for di Pablo pa nan obedensia boluntario na Yehova. El a skirbi: “Mi stimánan, meskos ku semper boso a obedesé, no manera den mi presensia solamente, ma awor muchu mas den mi ousensia, traha riba boso salbashon ku temor i temblamentu.”​—Fil. 2:12.

Bo yunan ta obedesé Yehova su leinan asta ora bo no ta huntu ku nan? Kiko nan ta hasi ora nan ta na skol? Kiko abo por hasi pa bo yunan por ta konvensí di e sabiduria di Yehova su leinan pa asina nan kumpli ku nan asta ora bo no ta huntu ku nan?

Boso adorashon komo famia, òf estudio di famia, ta hunga un papel importante den esaki. E por yuda edifiká fe di boso yu di manera ku e por obedesé Yehova asta ora boso no ta presente. P’esei, laga nos konsiderá tres faktor klave pa boso estudio di Beibel komo famia por ta un éksito.

Keda Konsistente

Den e idioma original di Beibel, e ekspreshon tradusí komo “un dia” na Jòb 1:6 ta indiká ku Dios ta invitá su yunan angelikal pa bin den su presensia na momentonan stipulá. Hasi meskos ku bo yunan. Pone un dia i ora spesífiko pa boso Adorashon Komo Famia i pega na dje. Ademas, pone un otro ora spesífiko por si akaso surgi sirkunstansianan imprevisto.

Segun tempu ta pasa, no laga boso estudio bira algu ku ta tuma lugá pa kasualidat. Kòrda ku bo yunan ta bo studiantenan di Beibel di mas importante. Di otro banda, Satanas ke pa nan bira su víktima. (1 Ped. 5:8) Si boso no usa e tempu ku boso a apartá pa Adorashon Komo Famia pa studia, ma en bes di esei, ta wak televishon òf hasi algu ménos importante, esaki lo ta un viktoria pa Satanas.​—Efe. 5:​15, 16; 6:12; Fil. 1:10, BPK.

Hasié Práktiko

Durante Boso Adorashon Komo Famia, boso no mester konsentrá riba teoria so. Hasi esfuerso pa e ta práktiko. Kon asina? De bes en kuando, skohe tópikonan relashoná ku situashonnan ku bo yu lo hañ’é kuné den e dia- òf simannan despues di e estudio. Por ehèmpel,  boso por trein presentashonnan pa sirbishi durante boso konsiderashon komo famia. Mucha gusta hasi loke nan ta bon den dje. P’esei, si boso ta trein algun presentashon i ta konsiderá kon pa trata ku opheshon ku hende por bini kuné, esaki lo yuda nan haña mas konfiansa ora nan ta partisipá den e vários rasgonan di e trabou di prediká e Reino.​—2 Tim. 2:15.

Bo por tene seshonnan di práktika tambe ku lo yuda bo yunan trata ku preshon di pareu. Den e kaso ei, por usa kapítulo 15 di e buki Loke Hóbennan Sa Puntra​—Kontesta Práktiko, Volúmen 2, na spañó, komo base pa boso konsiderashon komo famia. Na página 132 i 133, bo ta haña “Strategia Kontra Preshon di Pareu.” E ta duna sugerensia i ta yuda e yu formulá kontestanan ku e ta sinti su mes kómodo kuné. Na fin di página 133, e hóbennan ta haña e siguiente animashon: “Trein bo kontestanan ku un di bo mayornan òf ku un amigu madurá.” Ta bon pa de bes en kuando hasi e tipo di ensayonan ei un parti di boso Adorashon Komo Famia.

Durante Adorashon Komo Famia, mayornan ta haña e oportunidat di enfatisá e benefisionan di metanan spiritual. Relashoná ku esaki, e buki Hóbennan Sa Puntra, Volúmen 2, tin ekselente informashon den kapítulo 38 ku tin e tema “Kiko Lo Mi Hasi ku Mi Bida?” Ora boso ta konsiderá e kapítulo ei, yuda bo yu komprondé ku adorashon di Yehova mester ta e kos prinsipal den nos bida, i ku esei ta e mihó manera di biba. Yuda bo yu kultivá e deseo di traha komo pionero, sirbi na Bètel, asistí na e Skol di Entrenamentu Ministerial òf di sirbi den kualke otro rasgo di sirbishi di tempu kompletu.

Pero tene kuenta ku esaki: Algun mayor ku bon intenshon ta konsentrá asina tantu riba loke nan ke pa nan yu bira ku nan ta lubidá di elogi’é pa loke e ta hasiendo kaba. Klaru ku ta bon pa animá bo yunan pa pone meta pa sirbi, por ehèmpel, na Bètel òf komo misionero. Ma ora bo ta hasi esei, tene kuidou pa bo no provoká, òf iritá, bo yu ku loke abo ta spera di dje i pone ku e ta desanimá. (Kol. 3:21) Kòrda semper ku bo yu tin ku siña stima Yehova pasobra e ke i no pasobra abo ta mand’é. (Mat. 22:37) P’esei, buska manera pa elogiá bo yu pa loke e ta hasiendo bon, i resistí e tendensia di konsentrá riba loke e no ta hasiendo. Yud’é haña apresio pa tur loke Yehova a hasi i laga su kurason reakshoná riba Yehova su bondat.

Hasié Plasentero

E di tres faktor klave pa un Adorashon Komo Famia por ta eksitoso ta ku e mester ta plasentero. Kon bo por logra esei? Kisas de bes en kuando, boso por skucha un di e dramanan òf wak i konsiderá un di e vidionan ku Testigunan di Yehova a produsí. Òf podisé boso por lesa un porshon di Beibel huntu. Durante e lesamentu akí, kada miembro di famia ta haña e papel di un personahe bíbliko.

Den E Toren di Vigilansia i ¡Despertad! tin diferente seri ku por sirbi komo ekselente base pa boso konsiderashon komo famia. Por ehèmpel, boso por usa e rúbrika “Kon Lo Bo Kontestá?” ku ta aparesé na página 31 den tur  ¡Despertad! Den kada edishon pasa di La Atalaya tin e proyekto di estudio “Página pa Hóbennan.” Den e otro edishonnan tin e seri pa mucha titulá “Siña Bo Yunan.”

E artíkulonan di e seri Hóbennan Sa Puntra den ¡Despertad! i e buki Hóbennan Sa Puntra, Volúmen 2, lo ta interesante spesialmente pa mayornan ku tin yu tiner. Ora boso ta usa e buki ei, no keda sin konsiderá e kuadro “Kiko Abo Ta Pensa?” na fin di kada kapítulo. E no ta djis un repaso. Bo por usa e preguntanan den dje komo un base pa boso estudio di famia.

Pero, tene kuidou pa bo no hasi boso estudio di famia un interogashon. Por ehèmpel, no trata di fòrsa bo yu p’e lesa na bos haltu loke el a skirbi riba e páginanan titulá “Puntonan Ku Mi A Reflekshoná Riba dje” ni na kualke otro parti di e buki ku ta anim’é pa skirbi su pensamentunan privá. Den e nota “Kerido Mayornan,” na página 3, e buki ta bisa: “Si boso ke pa boso yunan skirbi loke nan realmente ta pensa, ta masha importante pa boso duna nan un grado di libertat i no bai lesa loke nan a skirbi. Si boso respetá nan privasidat, probablemente nan mes lo bisa boso loke nan a skirbi.”

Si bo perkurá pa boso adorashon komo famia keda konsistente, práktiko i plasentero, Yehova lo bendishoná bo esfuerso rikamente. E tempu spesial akí ku boso famia ta pasa huntu lo yuda bo sernan kerí kultivá un bon relashon ku Yehova.

[Kuadro na página 31]

Sea Kreativo

“Durante nos estudio ku nos yu muhénan chikitu, ami ku mi kasá tabata konsiderá e informashon pa reunion di kongregashon. I despues, nos tabata laga nan pinta loke nan a komprondé for di e lès. Tin biaha, nos tabata hunga esenanan bíbliko òf nos tabata trein presentashonnan pa sirbishi di vèlt. Nos tabata hasi esfuerso pa e estudio kuadra ku nan edat, p’e tabata interesante, positivo i plasentero.”​—J.M., Merka.

“Pa yuda e yu hòmber di un studiante komprondé kon hende a usa ròl den tempu bíbliko, nos a kita tur e numbernan di e kapítulo- i versíkulonan di e buki di Isaias i print e. Nos a pega e páginanan na otro i a leim kada punta na un tubu. E ora ei, e mucha a trata di hasi loke Hesus a hasi den e snoa na Názarèt. E relato na Lukas 4:​16-21 ta bisa ku Hesus ‘a habri e ròl di e buki Isaias i a haña e pasashi ku e tabata buska.’ (Isa. 61:​1, 2) Ma ora e mucha a trata di hasi meskos, el a ripará ku, sin e numbernan di kapítulo i versíkulo, no tabata fásil pa haña Isaias kapítulo 61 den e ròl largu ei. Impreshoná ku e manera ábil ku Hesus a manehá e ròlnan, e mucha a grita: ‘Hesus tabata master!’”​—Y.T., Hapon.

[Plachi na página 30]

Seshonnan di práktika por yuda bo yunan trata ku preshon di pareu

[Plachi na página 31]

Hasi esfuerso pa boso Adorashon Komo Famia ta plasentero