“Mi a wak, i ata un multitut grandi ku ningun hende no por a konta, for di tur nashon, tribu, pueblo i idioma, . . . a sobrebibí e tribulashon grandi.” —REVELASHON 7:9, 14.

TUR kos ta kla pa e guera di Armagedon kuminsá. Dikon nos ta bisa esei?

Wèl ya kaba tin miónes di hende rònt mundu ku ta sirbi Yehova i ku ta biba segun e normanan moral elevá di Beibel. Sí, ku yudansa di Yehova, miónes di hende di tur nashon, tribu i lenga ta forma un famia uní di personanan ku ta stima otro. Testigunan di Yehova ta disfrutá di un hermandat asina.—Huan 13:35.

Pronto Satanas lo reuní su ehérsitonan i lansa un atake sin presedente riba e pueblo pasífiko i aparentemente indefenso akí. (Ezekiel 38:8-12; Revelashon 16:13, 14, 16) Dikon nos por ta sigur ku esaki lo sosodé pronto? Pasobra Beibel ta menshoná susesonan spesífiko ku ta yuda nos komprondé na ki tempu e guera di Armagedon lo kuminsá. I hopi di e profesianan akí ta kumpliendo kaba.

Profesianan Ku Ta Kumpliendo

Hesus su disipelnan a puntr’é kon hende por haña sa na ki tempu e “konklushon di e era” lo a kuminsá. (Mateo 24:3) Den su kontesta, Hesus a señalá na un tempu ku ‘nashon lo lanta kontra nashon i reino kontra reino, i ku lo tin skarsedat di kuminda i temblor den un lugá tras di otro.’ Ademas, el a bisa ku “tur e kosnan akí ta kuminsamentu di kalamidat, manera doló di parto.” (Mateo 24:7, 8) Apòstel Pablo a yama e periodo akí “e último dianan” i a bisa ku den e dianan ei lo bini “tempunan krítiko, difísil pa trata kuné.” (2 Timoteo 3:1) Abo no ta haña ku e profesianan akí ta deskribí loke ta tumando lugá awe?

Dikon e periodo akí lo ta asina difísil? Apòstel Huan a duna e motibu: El a profetisá  ku Satanas i su demoñonan lo tin “masha poko tempu” pa hasi maldat riba tera. El a mustra tambe ku Satanas lo ta “yen di rabia” durante e periodo ei. (Revelashon 12:7-12) Abo no ta ripará ku hende rònt mundu awe ta rabia lihé i ta kla pa usa violensia?

Hesus a profetisá tambe di un obra ekstraordinario ku lo tuma lugá durante e periodo difísil akí. El a bisa ku ‘e bon notisia di e Reino di Dios lo ser prediká den henter e tera habitá, komo testimonio pa tur nashon, anto e fin lo yega.’ (Mateo 24:14) Awendia, Testigunan di Yehova ta prediká e bon notisia di e Reino di Dios den mas ku 235 pais i den mas ku 500 idioma. Nan ta publiká dos revista basá riba Beibel, E Toren di Vigilansia i ¡Despertad!; nan ta e revistanan mas distribuí na mundu. Ademas, Testigunan di Yehova a tradusí Beibel den mas o ménos 100 idioma. Nan obra ta un trabou boluntario i ta ser sostené pa donashon boluntario. Ta e trabou di prediká ku Testigunan di Yehova ta hasi ta kumplimentu di e profesia di Hesus?

Beibel ta papia tambe di algun suseso ku lo hiba direktamente na e guera entre Yehova Dios i su enemigunan. Laga nos analisá tres profesia ku no a kumpli ainda.

Profesianan Ku Lo Kumpli Pronto

E promé profesia: Beibel ta bisa ku e lidernan di mundu lo emití un deklarashon spesial di “pas i siguridat.” Probablemente nan lo hasi esaki pensando ku nan ta serka di resolvé e problemanan prinsipal di humanidat. Sinembargo, loke lo bini despues di nan deklarashon ta leu for di e pas ku nan a proklamá.—1 Tesalonisensenan 5:1-3.

Di dos profesia: Despues, vários gobièrnu lo lanta kontra organisashonnan religioso di mundu. Beibel ta usa un bestia salbahe pa simbolisá e gobièrnunan akí; riba e bestia tin un muhé sintá ku ta simbolisá tur religion falsu. (Revelashon 17:3, 15-18) Sin ku e bestia simbóliko akí sa, lo e kumpli ku e boluntat di Dios ora e destruí tur religion ku falsamente ta pretendé di representá Dios.

Den un manera simbóliko, apòstel Huan a deskribí e drama ei ku e siguiente palabranan: “E bestia salbahe ku e dies kachunan ku bo a mira lo odia e prostituta. Nan lo kita tur kos for di dje, kit’é sunú, kome su karni i kim’é kompletamente ku kandela. Pasobra Dios a hinka den nan kurason pa kumpli ku Su pensamentu.”—Revelashon 17:16, 17.

Di tres profesia: Despues di e atake eksitoso akí kontra religion falsu, Satanas lo dirigí e gobièrnunan pa nan ataká e adoradónan di Yehova Dios.—Revelashon 7:14; Mateo 24:21.

Kiko Esaki Ta Nifiká pa Bo?

Si ainda bo no a studia Beibel na un manera profundo, kisas ta difísil pa bo kere ku e profesianan ei lo kumpli. Pero tin bon motibu pa kere ku nan lo kumpli en detaye i ku esei lo ta pronto. Tin un gran kantidat di profesia bíbliko ku a kumpli kaba; nan ta un garantia ku esnan ku nos a trata den e artíkulo akí tambe lo kumpli. *

Ta bon pa bo tuma un poko tempu i buska pa sa dikon Testigunan di Yehova ta konvensí ku “e guera ku lo tuma lugá riba e gran dia di Dios, e Todopoderoso” lo bini pronto i dikon bo no tin nodi di tin miedu. I laga e Testigunan splika bo kiko ta e kosnan ku Beibel ta mustra ku bo mester hasi pa bo por ta entre e hendenan ku Yehova Dios ta protehá. (Revelashon 16:14) Loke bo haña sa lo por kambia bo punto di bista di futuro.

[Nota]

[Komentario na página 8]

E obra di prediká ku Testigunan di Yehova ta realisá por ta kumplimentu di un profesia bíbliko?