TIN hende ta bisa ku no ta bon pa puntra dikon, òf pakiko, Dios ta permití òf no ta permití sierto kosnan tuma lugá. Podisé nan ta pensa ku un pregunta asina ta demostrá un falta di rèspèt pa Dios. Abo tambe ta pensa asina?

Si esei ta e kaso, bo tabata sa ku hopi fiel sirbidó di Dios a yega di puntr’é pakiko e ta hasi òf permití sierto kosnan? At’akí algun di e preguntanan ku nan a yega di hasié:

E hòmber fiel Yòb a puntra: “Pakiko bo ta skonde bo kara, i ta konsiderá mi bo enemigu?”—Yòb 13:24.

E profeta leal Habakuk a puntra: “Pakiko bo ta wak ku toleransia riba esnan ku ta trata ku traishon? Pakiko bo ta keda ketu ora ku e malbadonan ta traga esnan ku ta mas hustu ku nan?”—Habakuk 1:13.

Hesukristu a puntra: “Mi Dios, mi Dios, pakiko bo a bandoná mi?”—Mateo 27:46.

Anto si bo lesa e pasashinan di Beibel rònt di e tekstonan akí, lo bo no haña ningun indikashon ku Yehova * Dios a sintié ofendí ora su sirbidónan a hasié e preguntanan sinsero ei. I esei no ta un sorpresa. Dikon nò? Pensa riba esaki: Ora nos pidi Yehova yuda nos ku nos nesesidatnan básiko pa nos por tin bon salú, e no ta sintié ofendí. Al kontrali, ku plaser e ta duna nos loke nos tin mester. (Mateo 6:11, 33) Di mes manera, e ta kontentu pa duna nos informashon pa yuda nos keda tantu emoshonalmente komo mentalmente den bon kondishon. (Filipensenan 4:6, 7) De echo, Hesus a bisa su disipelnan: “Sigui pidi, i boso lo risibí; sigui buska, i boso lo haña.” (Mateo 7:7) Ta bisto ku Hesus no tabata referí solamente na kosnan material sino tambe na kontesta pa preguntanan importante.

Si bo por a hasi Dios pregunta, kua di e siguiente preguntanan lo bo a hasié?

• Mi bida tin propósito?

• Kiko lo pasa ku mi ora mi muri?

• Dikon bo ta laga mi sufri?

Siendo ku “henter e Skritura ta inspirá di Dios,” lo bo haña Dios su kontesta pa e preguntanan akí den su Palabra ku ta Beibel. (2 Timoteo 3:16) Laga nos wak awor dikon algun hende sa hasi e preguntanan ei i kon Beibel ta kontestá esakinan.