MANERA nos a mira den e artíkulo anterior, Hesus a hiba un bida ku sentido. Pues si nos ke pa nos bida tin sentido, nos mester skucha na su konseho i imitá su ehèmpel.

De echo, manera e teksto sitá ariba ta indiká, Yehova mes ta animá nos pa hasi esei. Pues, pa nos por kana manera Hesus a kana, nos tin ku imitá su ehèmpel i biba di akuerdo su siñansanan. Ora nos hasi esei, nos lo haña Dios su aprobashon i nos bida lo tin mas sentido.

Hesus su siñansanan a inkluí prinsipionan ku por yuda nos kana manera el a kana. Nos por haña hopi di e prinsipionan akí den un di su famoso diskursonan. Ban analisá tres di nan i mira kon nos por apliká nan den nos bida.

KON E PRINSIPIO AKÍ TA YUDA NOS HIBA UN BIDA KU SENTIDO?

Hesus a indiká ku hende di naturalesa tin un nesesidat spiritual. Ta p’esei nos ta anhelá e kontesta pa preguntanan, manera: Dikon nos ta na bida? Dikon tin tantu sufrimentu? Dios ta realmente interesá den nos? Tin bida despues di morto? Pa nos bida por tin sentido, ta importante pa nos haña kontesta p’e preguntanan ei. Hesus tabata sa ku e úniko fuente konfiabel ku por kontestá e preguntanan akí ta e Palabra di Dios. Den un orashon, Hesus a bisa su Tata: “Bo palabra ta e bèrdat.” (Huan 17:17) E Palabra di Dios realmente por satisfasé nos nesesidat spiritual?

EKSPERENSIA DI BIDA REAL:

Esa tabata e kantante prinsipal di un banda popular i tabata riba kaminda pa bira un strea di rock. Pero tòg e tabata sinti un bashí den su bida. El a bisa: “Aunke mi tabata sinti mi bon den e banda, mi a deseá pa mi bida tabatin mas sentido.” Ku tempu, Esa a konosé un Testigu di Yehova. Esa a sigui konta: “Mi a bombardi’é ku pregunta, pero su kontestanan lógiko basá riba Beibel a lanta mi kuriosidat. Pues mi a bai di akuerdo pa e duna mi lès di Beibel.” Loke Esa a siña a konmov’é i a motiv’é pa dediká su bida na Yehova. E ta bisa: “Den pasado mi tabata pasa di un problema pa otro i di un krísis pa otro. Awor mi bida tin berdadero propósito.” *

KON E PRINSIPIO AKÍ TA YUDA NOS HIBA UN BIDA KU SENTIDO?

Miserikòrdia ta enserá mustra kompashon, bondat i konsiderashon na hende. Hesus a mustra miserikòrdia na hende ku tabata den nesesidat. Motivá pa kompashon, el a tuma inisiativa pa libra nan di nan sufrimentu. (Mateo 14:14; 20:30-34) Nos bida lo por tin mas sentido si nos imitá Hesus den mustra miserikòrdia, pasobra ta esnan ku ta mustra miserikòrdia na otro hende lo ta felis. (Echonan 20:35) Nos por mustra miserikòrdia na otro hende mediante di nos palabra- i obranan di bondat. Asina nos por ofresé alivio na esnan ku mester di nos yudansa. Di bèrdat nos lo sinti nos mihó ora nos mustra miserikòrdia?

EKSPERENSIA DI BIDA REAL:

Maria ku su kasá, Carlos, ta un bon ehèmpel den mustra miserikòrdia. Maria su tata ta biudo i awor e ta malu na kama. Nan a tum’é den nan kas pa nan kuid’é. Nan a pasa vários anochi sin por a drumi, i na algun okashon asta nan a haña nan ta kore bai hospital kuné debí na su atakenan di suku. Nan ta atmití ku tin ora nan tabata hopi kansá.  Pero nan ta felis, manera Hesus a bisa, pasobra nan ta haña un gran satisfakshon di por duna Maria su tata tur e kuido ku e tin mester.

KON E PRINSIPIO AKÍ TA YUDA NOS HIBA UN BIDA KU SENTIDO?

E ekspreshon griego tradusí “esnan pasífiko” ta nifiká literalmente “esnan ku ta hasi pas.” Pero kon hende ku ta hasi pas por tin un bida ku mas sentido? Entre otro, e lo yuda nos disfrutá di un mihó relashon ku e hendenan rònt di nos. P’esei ta bon pa nos apliká e konseho bíbliko akí: “Si ta posibel, te asina leu ku ta dependé di boso, keda na pas ku tur hende.” (Romanonan 12:18) “Tur hende” ta inkluí miembro di famia i otro hende ku no tin e mesun kreensianan ku nos. Pero e echo ku nos ta na pas ku “tur hende” di bèrdat por duna nos bida mas sentido?

EKSPERENSIA DI BIDA REAL:

No tabata fásil pa Nair mantené pas ya ku atraves di aña el a pasa den hopi difikultat, spesialmente den su famia. For di dia ku su esposo a bai lag’é mas o ménos 15 aña pasá, e so mester a lanta su yunan. Un di su yu hòmbernan a bira adikto na droga i hopi bes e tabata bira agresivo i menasá Nair i Nair su yu muhé. Nair ta konvensí ku loke el a siña for di Beibel a dun’é e forsa p’e mantené pas, asta bou di e sirkunstansianan difísil ei. En bes di pleita òf heringá, e ta hasi esfuerso pa ta bondadoso i komprensivo. (Efesionan 4:31, 32) E echo ku Nair a siña ser pasífiko a yud’é haña un bon relashon ku su famia i tambe ku otro hende.

Si nos sigui Hesus su konseho sabí, nos lo haña felisidat i satisfakshon den bida. Pero pa nos bida por tin berdadero sentido, ta importante pa nos sa kiko futuro lo trese kuné. Al fin i al kabo, kuantu sentido bida lo por tin si e úniko kos ku ta spera nos ta di bira bieu, bira malu i despues muri? Ma ta esaki ta e realidat di bida aworakí.

Pero tin bon notisia. Yehova tin hopi bendishon prepará pa tur esnan ku ta hasi esfuerso pa “kana meskos ku Hesus a kana.” Yehova ta primintí ku pronto lo e trese un hustu mundu nobo, kaminda hende fiel lo biba manera e tabata ke pa nan biba—pa semper ku salú perfekto. Su Palabra ta bisa: “Tende! E tènt di Dios lo ta ku humanidat, i lo e biba huntu ku nan, i nan lo ta su pueblo. I Dios mes lo ta huntu ku nan. I lo e seka tur lágrima for di nan wowo, i lo no tin morto mas; ni tristesa ni sklamashon ni doló lo no tin mas. E kosnan ku tabata pasa ántes no t’ei mas.”—Revelashon 21:3, 4.

Maria, e señora di 84 aña di edat, menshoná den e promé artíkulo di e seri akí, ta alegrá den e speransa di mira e palabranan ei bira realidat. Kiko di abo? Lo bo ke sa mas tokante kiko “realmente ta bida”—esun ku e Reino di Dios lo trese? (1 Timoteo 6:19) Si esei ta e kaso, bo por puntra e Testigunan di Yehova den bo área òf skirbi e editornan di e revista akí. *