“Señor, siña nos hasi orashon.” (Lukas 11:1) Esaki ta loke un disipel a pidi Hesus. Komo parti di su kontesta, Hesus a konta dos ilustrashon ku ta siña nos kon pa hasi orashon pa Dios skucha nos. Si bo a yega di puntra bo mes si Dios ta skucha bo orashonnan, lo bo ta interesá pa sa kiko Hesus a kontest’é.—Lesa Lukas 11:5-13.

E promé ilustrashon a drei rònt di e persona ku ta hasi orashon. (Lukas 11:5-8) Den e relato, un hòmber ta haña un bishita anochi lat, i e no tin nada pa ofresé e bishitante. Pa e anfitrion, e situashon akí ta algu urgente. Apesar ku tabata lat kaba, e ta bai na kas di un amigu pa fia un par di pan. Na promé instante, e amigu no ke lanta pasobra su famia ta morto na soño den kamber huntu kuné. Pero e anfitrion, sin ningun tiki ripara, ta sigui insistí te ora su amigu lanta i dun’é loke e mester. *

Kiko e ilustrashon akí ta siña nos tokante orashon? Loke Hesus ke bisa nos ta ku nos tin ku sigui insistí, esta, sigui pidi, buska i bati. (Lukas 11:9, 10) Akaso Hesus ta bisando akí ku ora nos ta hasi orashon ta komo si fuera nos ta bati na porta di un Dios ku no ke skucha nos? Nò. Hesus ke laga nos komprondé ku, kontrali na e amigu ku no tin muchu gana di yuda, Dios sí ta ansioso pa kontestá petishon di esnan ku ta persistí den orashon. Ora nos persistí, nos ta demostrá ku nos tin fe den Dios. Tambe, nos ta mustra ku di bèrdat nos mester di loke nos ta pidi p’e i ku nos ta sigur ku si ta su boluntat, e por duna nos esei.—Marko 11:24; 1 Huan 5:14.

E di dos ilustrashon a enfoká riba Esun ku ta “skucha orashon”: Yehova. (Salmo 65:2) Promé, Hesus a puntra: “Akaso tin un tata entre boso ku si su yu pidié un piská, e ta dun’é un kolebra en bes di un piská? Òf si e pidié tambe un webu, e ta dun’é un skòrpion?” E kontesta ta nò; niun tata ku stima su yu lo no dun’é algu ku lo hasié daño. Kaba, Hesus a splika nan e ilustrashon: Si un tata imperfekto ta duna “bon regalo” na su yunan, “kuantu mas e Tata ku ta den shelu lo duna spiritu santu,” e mihó regalo ku por tin, na su yunan riba tera ku ta pidié!—Lukas 11:11-13; Mateo 7:11.

Kiko e ilustrashon akí ta siña nos di Yehova, Esun ku ta “skucha orashon”? Hesus ta pidi nos pa mira Yehova komo un tata ku ta kla pa satisfas’é e nesesidatnan di su yunan stimá. Esnan ku ta adorá Yehova por sinti nan liber pa aserk’é ku e deseonan di nan kurason. I komo nan sa ku e ke lo mihó pa nan, nan ta kla pa aseptá su kontesta riba nan petishon, asta si esei no ta loke nan a spera. *