Abo ke sa bo futuro? Mayoria di hende ta sumamente interesá pa haña sa kiko futuro lo trese kuné. P’esei, hopi hende ta purba pronostiká futuro, pero no ta tur loke nan bisa ta pasa. Ban wak algun ehèmpel:

• SIENTÍFIKONAN ta usa aparatonan sofistiká i ta gasta masha hopi plaka pa pronostiká, entre otro, kon kontaminashon lo afektá nos planeta i si áwaseru lo kai den bo bario mañan òf no.

• ANALISTANAN PROFESHONAL ta pronostiká tendensianan den mundu di negoshi i di polítika. Por ehèmpel, hopi hende ta haña ku Warren Buffett, un di e hòmbernan mas riku na mundu, tin un don pa mira futuro ya ku tur su invershonnan tabatin éksito. Nate Silver ta analisá estadístikanan pa pronostiká hopi kos: di Merka su mundu di polítika, entrega di premio Oscar i muchu mas.

• DOKUMENTONAN ANTIGUO a ser interpretá komo profesia. Segun algun hende, e kosnan konfuso ku Michel de Notredame (Nostradamus) a skirbi den siglo 16 ta kumpliendo den nos tempu. Hende a kalkulá ku e siklo di e kalènder maya ku lo a terminá dia 21 di desèmber 2012 ta un indikashon ku algu desastroso lo a bai tuma lugá riba e fecha ei.

• LIDERNAN RELIGIOSO tin biaha ta pronostiká ku susesonan trágiko lo tuma lugá rònt mundu pa spièrta hende i pa haña mas siguidó. E profeta di kalamidat, Harold Camping, i su disipelnan a tene un kampaña ekstenso pa spièrta hende ku fin di mundu lo a bini na aña 2011. Ta bisto ku esei no a sosodé.

• KLARIVIDENTENAN ta bisa ku nan tin un don spesial pa pronostiká futuro. Tin algun kos ku tantu Edgar Cayce komo Jeane Dixon a pronostiká ku lo a tuma lugá den siglo 20, i nan a kumpli. Pero tin hopi kos tambe ku nan a pronostiká ku no a kumpli. Por ehèmpel, Dixon a pronostiká ku na aña 1958 un Terser Guera Mundial lo a kuminsá i Cayce a pronostiká ku meimei di añanan 70 New York lo a bai bou di awa.

Ken realmente por pronostiká futuro? Esaki ta un bon pregunta pasobra si bo sa loke ta bai pasa den futuro, esei por tin un efekto riba bo bida i e desishonnan ku bo ta tuma.