Pa e eskritor di Beibel di pasado akí, bida di hende ta mashá kòrtiku na komparashon ku e eksistensia eterno di nos planeta. Pa míles di aña, hopi generashon a pasa; tòg nos planeta tera a duna prueba di ta resistente i kapas pa sostené bida. Pero esei ta te ku awor.

Algun hende ta bisa ku despues di Segundo Guera Mundial, mundu a eksperensiá kambionan drástiko i rápido. Den apénas 70 aña, hende a mira desaroyonan remarkabel riba tereno di komunikashon, transporte i otro ramonan di teknologia ku a trese kambionan ekonómiko nunka bisto. Aworakí, hopi hende ta disfrutá di un nivel di bida ku ántes nan no por a ni soña kuné. Durante e 70 añanan ei, e kantidat di habitante di mundu a bira kasi tres biaha mas tantu.

Pero tur esaki tin su konsekuensianan. Algun sientífiko ta bisa ku e dañonan ku aktividatnan humano ta kousa na tera ta desbalansando e siklonan di naturalesa i lo no por sostené bida mas. De echo, segun nan, nos a drenta un era nobo ku nan ta yama antropoceno, den kua hende a yega na e punto di ruiná naturalesa kompletamente.

Beibel a papia di un tempu ku hende lo “kaba ku e tera.” (Revelashon 11:18) Tin hende ta puntra nan mes si ta den e tempu ei nos ta bibando. Kuantu daño mas hende lo kousa? Di bèrdat no tin solushon mas? Hende lo kousa daño ireparabel na nos planeta?

E daño na nos planeta ta ireparabel? Algun sientífiko ta pensa ku ta difísil pa pronostiká ki efekto kambio di klima lo por tin riba nos planeta. Pa e motibu ei nan ta teme ku nos lo por haña nos ku kambionan diripiente i ònferwagt ku lo por trese konsekuensianan desastroso.

Por ehèmpel, pensa riba e kapa di eis na Wèst Antártika. Algun hende ta pensa ku si temperatura di tera su atmósfera i laman sigui subi, lo yega e momento ku lo no tin nada ku por stroba e kapa di eis di smèlt. Dikon? Esei ta pasobra e kapa di eis ta reflehá e rayonan di solo. Pero segun ku e kapa di eis ta bira mas fini i mas chikí, e laman bou di dje ta keda eksponé na e rayonan di solo. Komo ku e superfisie skur di laman ta apsorbá mas kalor di solo, e kapa di eis ta smèlt mas lihé. Esaki por krea un sírkulo visioso. Pa motibu ku e eis ta smèlt, e nivel di laman lo subi i esaki lo por tin konsekuensianan desastroso pa miónes i miónes di hende.

Hende a pensa riba vários strategia pa dil ku e situashon di emergensia ku nos planeta ta aden. Un ku tin hopi tempu kaba riba mesa ta e asina yamá ‘desaroyo sostenibel,’ esta, un plan ku ta fomentá kresementu ekonómiko i sosial i ku no ta daña medio ambiente. El a duna resultado?

Lamentablemente, meskos ku e krísis finansiero mundial, e ‘debe’ ekológiko ta sigui oumentá. Hende ta sigui usa e rekursonan natural mas lihé ku tera por produsí nan bèk. Tin algu ku nos por hasi? Un ekólogo a atmití frankamente ku “den un sentido, nos no tin ni e mínimo idea di kon pa dil ku nos planeta na drechi.” E situashon akí ta kuadra presis ku loke Beibel ta bisa: “No ta keda na hende pa dirigí su pasonan.”—Yeremías 10:23.

Di otro banda, Beibel ta sigurá nos ku nos Kreador lo no permití hende kaba ku tur e rekursonan di nos planeta i lag’é plan barí. Salmo 115:16 ta bisa nos ku Dios ‘a duna e yunan di hende e tera.’ Sí, nos planeta ta un “regalo perfekto” di nos Tata selestial. (Santiago 1:17) Akaso  e ta duna nos un regalo ku ta sirbi pa un tempu so, ku ta daña i despues ta stòp di traha? Klaru ku nò. Esaki ta bisto na e manera ku Dios a diseñá nos planeta.

E buki bíbliko di Génesis ta konta ku luho di detaye kon Dios a traha nos planeta kuidadosamente. Na prinsipio tera tabata “sin forma i bashí i tabatin skuridat riba superfisie.” Ma tambe e ta menshoná “awanan,” ku ta esensial pa por tin bida riba tera. (Génesis 1:2) Anto Dios a bisa: “Laga tin lus.” (Génesis 1:3) Aparentemente, e rayonan di solo a drenta atmósfera di nos planeta i lus a bira visibel pa promé biaha riba tera. Beibel ta deskribí despues kon tera seku i laman a ser formá. (Génesis 1:9, 10) Despues di esei “vegetashon, mata ku ta duna simia segun su sorto i palu ku ta duna fruta” a aparesé. (Génesis 1:12) Pues asina tur e elementonan nesesario pa sostené e proseso- i siklonan di bida, manera fotosíntesis, a kuminsá eksistí. Ku ki propósito nos Kreador a hasi tur e preparashonnan akí?

Isaías, un profeta di antigwedat, a deskribí Dios komo “Esun kende a forma tera i a trah’é; el a estables’é, i no a krea esaki pa e keda bashí, ma el a form’é pa e wòrdu habitá.” (Isaías 45:18) Klaramente anto, e Kreador su propósito ta pa tera ser habitá pa semper.

E tristu realidat ta ku hende a hasi mal uso di Dios su regalo presioso i kasi ta kabando kuné. Pero e Kreador su propósito no a kambia. Un hòmber di antigwedat a bisa: “Dios no ta hende, ku e lo gaña, ni yu di hende, ku e lo arepentí. Akaso el a bisa, i e lo no hasié? Òf el a papia, i e lo no kumpli?” (Numbernan 23:19) Dios no ta bai laga hende ruiná e tera akí. Mas bien, e dia pa Dios “kaba ku esnan ku ta kaba ku e tera” lo yega pronto.—Revelashon 11:18.

Den su famoso Sermon Riba Seru, Hesus a bisa: “Felis ta esnan ku tin un genio suave, ya ku nan lo haña e tera.” (Mateo 5:5) Mas aleu den e mesun sermon ei, Hesus a revelá kon e tera lo ser reskatá. El a siña su siguidónan pa pidi den  orashon: “Laga bo Reino bini. Laga bo boluntat sosodé, meskos ku den shelu, tambe riba tera.” Sí, e Reino òf gobièrnu di Dios lo kumpli ku e propósito di Dios pa tera.—Mateo 6:10.

Tokante e kambionan remarkabel ku e Reino ei lo trese, Dios ta deklará: “Tende! Mi ta traha tur kos nobo.” (Revelashon 21:5) Esaki ta nifiká ku Dios lo remplasá nos planeta ku un nobo? Nò, nos planeta mes no tin nada malu kuné. E problema ta sinta mas bien serka e gobièrnunan humano ‘ku ta kabando ku e tera akí’ i esnan ku ta responsabel pa e krísis ekológiko. Ta ku nan Dios lo kaba i lo e remplasá nan ku “un shelu nobo i un tera nobo,” es desir, un gobièrnu selestial nobo, e Reino di Dios, ku lo goberná riba un sosiedat humano obediente.—Revelashon 21:1.

Pa eliminá e ‘debe’ ku hende tin ku e planeta akí Dios lo pone e siklonan di naturalesa bèk den balansa. Bou di inspirashon, e salmista a duna un deskripshon di loke Dios lo hasi: “Bo ta [kuida] tera i ta muh’é; bo ta hasié masha riku mes.” Unabes e klima bira normal bèk, i mas importante ainda, ku Dios su bendision, tera lo bira un paradeis mundial ku lo produsí kuminda na abundansia.—Salmo 65:9-13.

Segun Pyarelal, sekretario di e defuntu guia spiritual di India Mohandas Gandhi, Gandhi a yega di bisa: “Tera ta produsí lo sufisiente pa satisfasé kada hende su nesesidatnan, pero no su ambishonnan.” E Reino di Dios lo kambia kurason di hende yegando asina na rais di e problemanan di nos planeta. Profeta Isaías a bisa ku bou di e gobernashon di e Reino hende “lo no kousa daño ni destrukshon” na otronan ni na e planeta akí. (Isaías 11:9) De echo, awendia miónes di hende di tur nivel di bida ya kaba ta siñando tokante Dios su normanan elevá. Nan ta siña stima Dios i nan próhimo, pa ta gradisidu, pa kuida nos medio ambiente, pa konserbá rekursonan natural i pa biba na armonia ku Dios su propósito pa nos planeta. Esaki ta prepará nan pa biba den un paradeis riba tera.—Eklesiástes 12:13; Mateo 22:37-39; Kolosensenan 3:15.

E relato di kreashon den Génesis ta kaba bisando: “Dios a mira tur loke el a traha, i ata, tur kos tabata masha bon.” (Génesis 1:31) Sin duda, nos planeta ta muchu presioso pa e kaba na ruina. P’esei, ta un konsuelo pa sa ku e futuro di nos planeta ta den man di Yehova Dios, nos Kreador bondadoso. E ta primintí nos: “E hustunan lo heredá e tera, i lo biba den dje pa semper.” (Salmo 37:29) Bo tambe por ta entre “e hustunan” ku lo yama tera nan hogar.