Beibel ta deskribí e patriarka Yòb komo un hòmber “sin kulpa, i rekto.” (Yòb 1:1, NW) E ta yama Lòt un “hòmber hustu.” (2 Pedro 2:8) Anto e ta bisa ku David a ‘hasi solamente loke tabata bon den Dios su bista.’ (1 Reinan 14:8) Sinembargo, laga nos analisá e bida di e personanan akí un tiki mas djaserka. Nos lo mira ku (1) nan a faya, (2) nos por siña hopi di nan ehèmpel i (3) hende imperfekto por agradá Dios.

Yòb a pasa den un seri di tragedia ku a pars’é asina inhustu ku el a yega na e konklushon robes ku Dios no tabatin kunes si el a keda fiel òf nò. (Yòb 9:20-22) Ademas, Yòb tabata asina konvensí ku e tabata hustu ku el a duna otronan e impreshon ku e tabata kere ku e tabata mas hustu ku Dios.—Yòb 32:1, 2; 35:1, 2.

Lòt a duda ora e tabatin ku tuma un desishon masha simpel. E inmoralidat repugnante ku  tabata reina na Sódoma i Gomora a afligí Lòt asina tantu ku e komportashon di e hendenan tabata “tormentá su alma hustu.” (2 Pedro 2:8) Dios a bisa ku lo e destruí e statnan malbado ei, i el a duna Lòt i su famia chèns di skapa di e destrukshon. Lo bo pensa ku Lòt lo tabata e promé pa hui for di e statnan ei. Pero nèt na e momento krusial ei, el a keda bira rònt. E angelnan ku Dios a manda mester a kue man di Lòt i di su famia tene pa saka nan for di e stat i hiba nan na un lugá safe.—Génesis 19:15, 16.

David a kometé adulterio ku e esposa di un otro hòmber na un momento ku e tabata falta dominio propio. Den un intento pa skonde loke el a hasi, David a laga mata e esposo. (2 Samuel, kapítulo 11) Beibel ta bisa ku loke David “a hasi tabata malu den bista di SEÑOR.”—2 Samuel 11:27.

Pues Yòb, Lòt i David a faya; por sierto, algun di nan a kometé fayonan hopi grave. Pero manera nos lo mira, nan tabata deseá di sirbi i obedesé Dios ku henter nan kurason. Nan a mustra arepentimentu i tabata dispuesto pa hasi e kambionan nesesario. Esaki a agradá Dios mashá i p’esei Beibel ta yama nan hòmbernan di fe.

Komo hende imperfekto, nos tur ta faya. (Romanonan 3:23) Pero ora nos faya, nos tin ku mustra ku nos ta arepentí i drecha nos relashon ku Dios.

Kon Yòb, Lòt i David a purba di korigí nan fayonan? Yòb tabata un hòmber íntegro, i despues ku Dios a rasoná kuné, el a korigí su punto di  bista robes i a arepentí pa loke el a bisa. (Yòb 42:6) Lòt tabata pensa meskos ku Dios tokante e kondukta inmoral di Sódoma i Gomora. Su úniko problema tabata ku na e momento ei el a pèrdè su sentido di urgensia. Pero, finalmente el a sali for di e statnan ei kondená na destrukshon i a skapa di e huisio di Dios. El a obedesé i no a bira wak e kosnan ku el a laga atras. Maske David a kometé un fayo grave i a kibra Dios su lei, el a arepentí sinseramente i a pidi Dios su miserikòrdia. Asina el a mustra kiko realmente e tabatin den su kurason.—Salmo 51.

E echo ku e hòmbernan akí tabatin Dios su aprobashon ta mustra ku e ta rasonabel den loke e ta ferwagt di hende imperfekto. Dios “sa di kiko nos ta trahá; e ta kòrda ku ta stòf nos ta.” (Salmo 103:14) Pero, si Dios sa ku nos no por evitá di faya, ta kiko e ta spera di nos anto?

E konseho ku David a duna su yu, Sálomon, ta laga nos mira kon nos por agradá Dios. David a bis’é: “Pa loke ta bo, mi yu Sálomon, konosé e Dios di bo tata, i sirbié ku henter bo kurason.” (1 Krónikanan 28:9) Kiko ke men sirbi Dios ku henter bo kurason? Esei ta enserá stima Dios i keda determiná pa siña kiko ta su boluntat i kumpli kuné. Esei no ke men ku nos mester tin un kurason perfekto; mas bien, un kurason ku ta anhelá pa sirbi Dios, ku ta obediente i ku ta dispuesto pa ser korigí. Loke a hasi Yòb un hòmber “sin kulpa,” Lòt un “hòmber hustu” i David un hòmber ku a ‘hasi solamente loke tabata bon den Dios su bista’ ta e echo ku nan tabata stima Dios i a obedes’é. Maske nan a faya, nan a logra agradá Dios.

Pues, e ehèmpel di e hòmbernan fiel akí ta siña nos ku nos no mester desanimá si nos haña mal pensamentu, bisa algu òf hasi algu ku despues nos realisá ta robes. Dios sa ku ainda nos no por logra perfekshon. Pero e ta ferwagt sí pa nos sirbié ku henter nos kurason, esta, pa nos stim’é i hasi esfuerso pa obedes’é. Si nos hasi esei, nos por tin sigur ku nos tambe por agradá Dios.