Tur aña, nos ta imprimí i distribuí sientos di miónes di Beibel i otro publikashonnan basá riba Beibel. Nos ta konstruí i manehá sukursal- i lugánan di imprenta rònt mundu. Ademas, míles di kongregashon ta reuní den lugánan di adorashon simpel pero atraktivo ku nos ta yama Salòn di Reino. Ken ta finansiá tur esaki?

Nos obra mundial ta ser finansiá kompletamente pa donashonnan boluntario. (2 Korintionan 9:7) Na 1879, e di dos edishon di E Toren di Vigilansia a bisa: “Nos ta kere ku ta YEHOVA ta esun ku ta sostené e Toren di Vigilansia, i miéntras ku esei ta e kaso, hamas nos lo roga ni pidi hende plaka.” Te awe nos ta tene nos mes na esei.

Si bo ta deseá di hasi un donashon, bo por mand’é na un di nos sukursalnan òf tir’é den e kaha di kontribushon na Salòn di Reino. Pero nos no ta pidi diesmo, ni pasa kolèkt ni kobra pa e trabou ku nos ta hasi òf pa nos publikashonnan. Nos no ta risibí pago pa prediká, pa siña hende den kongregashon òf pa yuda traha sentronan di adorashon, ya ku Hesus a bisa: “Boso a risibí pòrnada, duna pòrnada.” (Mateo 10:8) Tur hende ku ta traha na un di nos sukursalnan i na e sede mundial, inkluso e Kuerpo Gobernante di Testigunan di Yehova, ta miembro di un órden religioso ku no ta haña salario.

Parti di e donashonnan ku nos ta risibí ta keda usá tambe pa yuda víktimanan di desaster natural. E promé kristiannan gustosamente a yuda nan rumannan di fe ku a pasa den situashonnan difísil. (Romanonan 15:26) Di mes manera, nos tambe ta yuda víktimanan di desaster i ta perkurá pa nan haña kuminda, paña i tratamentu médiko. Ademas, nos ta yuda rekonstruí nan kas- i Salònnan di Reino ku keda afektá.