E vidionan ku nos a mira durante nos kongreso regional 2020 a konmové nos kurason i yuda nos komprondé siñansa di Beibel mihó. Kongreso Regional 2020 “Semper Alegrá”! tabatin 114 vidio, inkluso e 43 diskursonan ku e miembronan di Kuerpo Gobernante i nan ayudantenan a duna. Kisas, bo ta puntra bo mes kuantu trabou esei a enserá, esta, pa produsí e vidionan ei, i kuantu plaka esei a kosta?

 Mas o ménos, 900 ruman rònt mundu a hasi esfuerso pa yuda produsí e materialnan pa e kongreso akí. E rumannan akí a traha kasi 100.000 ora, na tur, riba e proyekto akí durante un periodo di dos aña. Esei a inkluí 70.000 ora ku a tuma pa kaba di produsí e drama bíbliko di 76 minüt: Nehemías: ‘E Goso ku Nos Ta Haña di Yehova Ta Hasi Nos Fuerte.’

 Ta klaru ku a kosta hopi plaka pa perkurá pa e nesesidatnan di e boluntarionan ku a traha riba e proyekto akí i pa duna nan apoyo tékniko, ekipo i e fasilidatnan ku nan tabatin mester pa hasi e trabou.

 Jared Gossman, kende ta traha den Departamento di Oudio/Vidio, a bisa: “Komité di Siñansa di Kuerpo Gobernante tabata ke pa e vidionan presentá un variedat di kultura i pa e esenanan ta esena di diferente lokalidat. E motibu pa esaki ta ku nos ta forma parti di un hermandat mundial i nos ke pa e vidionan reflehá esei. Pa logra e meta ei, 24 tim di 11 diferente pais a traha huntu riba e proyekto akí. Ta rekerí hopi planiamentu pa koordiná e trabounan ku e rumannan di rònt parti di mundu ta hasi. Esei ta kosta hopi plaka tambe.”

 Pa produsí hopi di nos vidionan, nos mester di ekipo spesial i vários esenario. Por ehèmpel, a traha e esenarionan pa Nehemías: ‘E Goso Ku Nos Ta Haña di Yehova Ta Hasi Nos Fuerte’ den studio Mount Ebo, ku ta keda serka di Patterson, New York, Merka. Pa hasi bon uso di e donashonnan ku nos ta haña i a la bes laga e drama bíbliko tokante Nehemías parse eksaktamente manera tabata den antigwedat, e rumannan a konstruí e murayanan, esta, réplika di e murayanan di antiguo Herúsalèm, ku material di poko peso. Nan a traha e murayanan di palu, kubri nan ku fom i duna nan un akabado ku a parse piedra. Kada muraya tabata seis meter haltu. Komo ku “e murayanan ei” tabata movibel, e rumannan por a usa nan den diferente esena, redusiendo asina e kantidat di esenario ku tabatin mester. Asina mes, a kosta kasi 100.000 dòler merikano pa traha e esenarionan pa e drama ei. a

 Awor ku nos sa e detayenan akí, nos ta aun mas gradisidu pa henter e programa di e kongreso regional di e aña akí. Nos ta konvensí ku, rònt parti di mundu, e esfuersonan ku a ser hasí pa produsí e programa akí lo resultá di ta gloria pa Yehova. Masha masha danki pa e donashonnan ku boso ta hasi, pa medio di donate.mr1310.com i otro medio, pa e obra mundial.