Bo ta un di e miónes di personanan ku a ser afektá pa mal tempu severo? Mal tempu severo i e daño ku e ta kousa ta bini den vários manera. Orkan, tifon, siklon, i warwarú hopi biaha ta kousa inundashon òf ta trese bientu fuerte ku por kousa destrukshon. Áwaseru fuerte por kousa avalancha di lodo i mal tempu por pone ku werlek ta dal i okashoná kandela di mondi. Sekura, ola di kalor i tormenta di wenter tambe por kousa hopi daño.

 Na hopi parti di mundu desaster kousá pa mal tempu kada bes ta bira mas tantu i ta hasi mas daño ku nunka. Un informe di e Federashon Internashonal di Krus Kòrá i e Sosiedatnan di Media Luna Kòrá ta bisa: “Mas hende ku nunka ta ser afektá pa desaster. Esei ta pa motibu ku tin mas i mas inundashon, tormenta i sekura. Komo resultado hopi hende ta pèrdè nan bida. Tin otro hende ta pèrdè nan fuente di entrada i miónes di hende ta pèrdè nan kas.”

 Ora e kosnan akí pasa, hende ta sufri físikamente i emoshonalmente. Nan ta sufri pasobra nan a pèrdè nan pertenensianan, nan kas i tin biaha asta un ser kerí den morto.

 Si bo a ser afektá pa mal tempu severo, Beibel por yuda bo trata ku esei. E ta duna bo konsuelo, speransa i konseho práktiko ku a yuda miónes di persona ku tabata víktima di desaster relashoná ku mal tempu. (Romanonan 15:4) Ademas, Beibel ta kontestá algun pregunta importante ku hopi hende sa hasi: Dikon Dios ta laga e kosnan akí sosodé? Nan ta un kastigu di Dios?

 Beibel ta bisa ku Dios no ta responsabel pa sufrimentu di hende. E ta sigurá nos ku “ningun hende no por pone Dios na prueba ku kos malu, i e mes tampoko no ta pone ningun hende na prueba ku kos malu.” (Santiago 1:13) Esei ke men ku Dios no ta kousa mal tempu severo ku hende ta eksperensiá awe.

 Beibel ta menshoná algun okashon ku Dios a usa forsa di naturalesa pa kastigá mal hende den pasado. Pero e susesonan ei ta diferente for di e mal tempu ku nos ta mira awe, ku ta tuma lugá diripiente i ku ta afektá bon hende i mal hende. Di otro banda, e relatonan den Beibel ta mustra ku Dios semper a protehá hende inosente. El a atvertí nan promé ku e desaster a tuma lugá i splika e motibu pakiko e ta aktua. Por ehèmpel, Dios ta splika dikon el a trese diluvio den tempu di Noe, dikon el a spièrta hende promé ku el a tuma akshon i dikon el a protehá Noe i Noe su famia.—Génesis 6:13; 2 Pedro 2:5.

 Si bo ke haña sa mas tokante kon nos por sa ku desaster natural no ta kastigu di Dios, lesa e artíkulo “Kiko Beibel Ta Bisa Tokante Desaster Natural?”

 Beibel ta bisa ku Yehova a ta stima nos i ku e ta sinti duele ora e ta mira nos sufri. Laga nos analisá e siguiente tekstonan ku ta konsolá nos.

•   Isaías 63:9: “Den tur nan aflikshon e tabata afligí.”

   Loke esaki ta enserá: Yehova ta sinti ora e mira hende sufri.

•   1 Pedro 5:7: “E ta interesá den boso.”

   Loke esaki ta enserá: Yehova ta interesá den nos bienestar.

 Debí ku Yehova ta interesá asina tantu den hende, e ta ser motivá pa aktua. E ta perkurá konsuelo mediante konseho práktiko ku tin den Beibel i e speransa di un futuro kaminda lo no tin desaster okashoná pa mal tempu.—2 Korintionan 1:3, 4.

 Beibel ta bisa ku Yehova a primintí “pa duna boso un futuro i un speransa.” (Yeremías 29:11) Dios ke pa hende disfrutá di bida den un paradeis riba tera i no pa hende tin miedu ku mal tempu por pone nan sufri.—Génesis 1:28; 2:15; Isaías 32:18.

 Dios lo usa su Reino, esta un gobièrnu selestial ku Hesus komo rei, pa realisá e futuro maravioso akí. (Mateo 6:10) Hesus tin e sabiduria i e poder pa prevení ku desaster natural ta tuma lugá. Tempu ku Hesus tabata riba tera, el a demostrá ku e tin poder pa kontrolá e forsanan di naturalesa. (Marko 4:37-41) Lo e goberná ku komprenshon i sabiduria, i lo e siña hende kon pa kuida e medio ambiente na un manera ku no ta hasi daño na naturalesa. (Isaías 11:2) Bou di e gobernashon di Hesus, nunka mas hende lo sufri daño debí na mal tempu severo.

 Kisas bo ta puntra: ‘Na ki tempu Hesus lo usa su poder pa kontrolá wer?’ Pa kontestá e pregunta ei, lesa e artíkulo “Na Ki Tempu e Reino di Dios Lo Goberná Mundu?”

 E konsehonan ku Beibel ta duna por yuda bo promé ku, durante i despues di mal tempu severo.

•   Promé ku mal tempu severo bini: Prepará pa aktua mesora.

   Loke Beibel ta bisa: “Un hende prudente ta mira maldat i ta skonde, ma e simpelnan ta sigui bai, i ta haña kastigu pa esei.”—Proverbionan 22:3.

   Loke esaki ta enserá: Pensa riba posibel desaster ku por afektá kaminda bo ta biba di manera ku bo por aktua lihé i protehá bo famia.

   Eksperensia: “Riba e dia ku nos a hui di e kandela di mondi, nos tabata prepará. Nos tabatin nos tas di emergensia, nos remedinan i nos pañanan ku nos tabatin mester. E hendenan rònt di nos tabata den pániko i nan no tabata sa kiko pa hasi. Pero nos tabatin tur kos nesesario. Mi ta asina gradisidu pa esei!”—Tamara, California, Merka.

•   Durante mal tempu severo: Konsentrá riba loke ta mas importante.

   Loke Beibel ta bisa: “Asta ora un hende tin na abundansia, su bida no ta dependé di loke e tin.”—Lukas 12:15.

   Loke esaki ta enserá: Bida ta mas importante ku kos material.

   Eksperensia: “Ora Tifon Lawin b a destruí nos kas, mi no por a pensa kla kiko pa hasi. Pero un kos ku mi a hasi ta orashon sinsero na Yehova Dios. Mi a realisá ku ta djis kos material nos a pèrdè i no nos bida.”—Leslie, Filipinas.

•   Despues di mal tempu severo: Pensa pa e dia di awe i no preokupá pa mañan.

   Loke Beibel ta bisa: “No sea nunka anshá pa e dia di mañan, pasobra e dia di mañan lo tin su mes inkietutnan.”—Mateo 6:34.

   Loke esaki ta enserá: No sea demasiado preokupá ku loke por sosodé den futuro.

   Eksperensia: “Despues ku mi kas a ser inundá pa orkan Irma, mi mester a tuma hopi desishon i esei a duna mi hopi strès. Mi a trata di sigui e konseho ku Beibel ta duna pa pensa pa e dia di awe, i no preokupá pa mañan. Ku Yehova su yudansa, mi por a trata ku muchu mas kos di loke mi a pensa.”—Sally, Florida, Merka.

 Pa mas sugerensia práktiko, lesa e artíkulo “Medida Ku Por Salba Bida ora di Kalamidat.”