“Diripiente, mi ta kuminsá pensa riba sèks, i mi no por kontrolá mi mes. Ta komo si fuera un otro persona ta dominá mi mente.”—Vera.

 “Ta masha difísil pa mi stòp di pensa riba sèks. Mi ta kere ta mas fásil pa kuminsá move mi brasanan i kuminsá bula.”—John.

 Bo tambe ta sinti meskos ku Vera i John? Si ta asina, e artíkulo akí por yuda bo.

•  Dikon no ta bon pa nos keda pensa riba sèks?

•  Dikon ta asina difísil pa stòp di pensa riba sèks?

•  Loke bo por hasi

•  Loke otro hóben ta bisa

 Un hóben ku yama Alex a bisa: “Mi tio a bisa mi ku Dios lo no a krea mi ku deseo di tene relashon seksual si e no tabata ke pa mi hasi esei.”

 Un parti di loke Alex su tio a bis’é ta korekto—Dios a krea nos ku deseo di tene relashon seksual, i ku bon motibu. Henter e rasa humano ta eksistí awe debí na relashon seksual. Dikon anto bo mester hasi esfuerso pa stòp di pensa riba sèks? Laga nos wak dos motibu importante:

•   Beibel ta bisa ku Dios su propósito ta pa relashon seksual tuma lugá solamente entre un hòmber i un muhé ku ta kasá ku otro.—Génesis 1:28; 2:24.

   Si bo ta soltero i ta respetá e norma moral ei, ta mihó pa bo no keda pensa riba sèks, pasobra esei lo pone bo sinti mas frustrá. Anto, si bo sigui pensa riba sèks, esei por asta pone bo kai den tentashon i bai tene relashon seksual—un desishon ku hopi hende a lamentá despues.

•   Ora bo siña dominá bo pensamentunan i stòp di pensa riba sèks, bo ta kultivando dominio propio.—1 Korintionan 9:25.

 Dominio propio lo yuda bo den bida, tantu awor komo den futuro. De echo, un investigashon ta mustra ku un hóben ku tin dominio propio ta haña su mes ku ménos problema ku salú, strès finansiero i problema ku outoridat ora nan bira adulto. a

 Nos hormonanan—huntu ku e echo ku nos ta biba den un mundu opseshoná ku sèks—por pone ku ta difísil pa nos stòp di pensa riba sèks.

 “Ta parse ku kasi tur programa di televishon ta laga parse ku sèks promé ku matrimonio ta algu normal i ku no tin niun konsekuensia negativo. Pues, ta fásil pa bo keda pensa riba loke ta inapropiá ora ku ta parse ku relashon seksual inapropiá no tin niun konsekuensia.”—Ruth.

 “Na trabou, mi koleganan ta papia hopi kos vulgar tokante sèks, i esei ta lanta mi kuriosidat. Inmoralidat seksual ta ser mirá komo algu asina normal ku ta bira difísil pa pensa ku e ta algu malu.”—Nicole.

 “Ta fásil pa kai den tentashon si bo ta sinta wak tur sorto di potrèt inapropiá riba ret sosial. Un imágen erótiko por keda grabá den bo mente i por bira e kos di mas difísil pa bo lubidá.”—Maria.

 E tipo di kosnan ei por laga bo sinti bo manera Apòstel Pablo a sintié. El a skirbi: “Ora mi ta deseá di hasi loke ta korekto, loke ta malu ta den mi.”—Romanonan 7:21.

 Pensa riba otro kos. Purba di konsentrá riba otro kos ku no ta sèks. Por ehèmpel, pensa riba un hòbi, deporte, ehersisio òf kualke otro aktividat ku bo ta gusta. Un hóben ku yama Valerie a bisa: “Lesamentu di Beibel ta yuda.” El a sigui bisa: “Beibel ta kontené pensamentu sabí. Si nos yena nos mente ku e pensamentunan ei, lo no sobra lugá pa nada otro.”

 Ta bèrdat ku pensamentu tokante sèks por pasa den bo mente. Pero ta keda na abo pa disidí kiko bo ta hasi ku e pensamentunan ei. Bo por skohe pa no keda pensa riba nan.

 “Ora mi kuminsá pensa riba kos inmoral, mi ta hasi esfuerso pa kambia mi pensamentunan i pensa riba otro kos. Ademas, mi ta purba di saka afó ta kiko a pone mi kuminsá pensa riba kos inmoral—kisas ta un kantika òf un potrèt ku mi tin ku deshasí di dje.”—Helena.

 Beibel ta bisa: “Tur loke ta hustu, tur loke ta puru . . . sigui konsiderá e kosnan ei.”—Filipensenan 4:8.

 Skohe bon amigu. Si bo amigunan ta papia tur ora tokante sèks, ta bira difísil pa bo no pensa riba sèks.

 “Komo tiner, no tabata fásil pa mi stòp di pensa riba kos inmoral, i gran parti di e problema tabata e personanan ku mi tabata anda kuné. Ora bo ta anda ku hende ku ta animá bo pa bai tras di deseo robes, bo gana di satisfasé e deseonan ei ta oumentá i bo ta stòp di hasi esfuerso pa dominá nan.”—Sarah.

 Beibel ta bisa: “Esun ku anda ku hende sabí lo ta sabí, ma un kompañero di hende bobo lo sufri daño.”—Proverbionan 13:20.

 Evitá entretenimentu inapropiá. Kasi tur hende sa ku mayoria di industria di entretenimentu ta promové sèks. Nicole a bisa: “Pa ami, músika ta e kos ku ta afektá mi mas tantu.” Anto el a agregá: “Músika por lanta deseo robes ku por bira kasi inkontrolabel.”

 “Mi a kuminsá wak pelíkula i programa di televishon ku ta kontené esena inmoral. Promé ku mi a realisá, mi tabata pensa hopi riba sèks. Tabata fásil pa mi haña sa ta di unda e pensamentunan ei tabata bini. Anto, ora ku mi a stòp di wak e pelíkula- i e programanan di televishon ei, mi no tabata pensa hopi mas riba sèks. Si mi wak bon ki entretenimentu mi ta skohe, lo ta mas fásil pa evitá pensamentu robes.”—Joanne.

 Beibel ta bisa: “No menshoná fornikashon ni ningun sorto di impuresa ni golosidat mes meimei di boso, pasobra esaki no ta apropiá pa hende santu.”—Efesionan 5:3.

 Konklushon: “Algun hende ta pensa ku nan deseonan seksual ta asina importante ku bo no mester purba di dominá nan, i ku bo no por dominá nan ni maske kuantu bo purba. Pero Beibel ta siña algu otro. Beibel ta duna onor na hende, pasobra e ta siña nos ku nos por dominá nos pensamentunan.

 Beibel ta bisa: “Sigui renobá e forsa ku ta motivá boso mente.”—Efesionan 4:23.