“Si otro mucha no ta gusta bo, lo bo no tin amigu, ni bida ni futuro. Niun hende lo no kòrda riba bo i lo bo keda bo so.”—Carl.

 E ta zona eksagerá? Kisas. Pero tòg algun hende ta hasi tur loke ta posibel pa nan no keda manera Carl a deskribí. Abo tambe? E artíkulo akí lo yuda bo haña un mihó manera pa trata ku e asuntu akí.

•  Dikon hende ke pa otro hende gusta nan?

•  Loke bo mester sa

•  Loke otro hóben ta bisa

•   Pasobra nan no ke keda nan so. “Riba ret sosial mi a mira potrèt di un grupo di mucha ku a sali bai keiru sin bisa mi nada. Mi a puntra mi mes dikon nan no ta invitá mi? Nan no ta gusta mi? Mi a kuminsá haña tur sorto di pensamentu negativo di mi mes i esei a kansa mi mente.”—Natalie.

   PENSA RIBA ESAKI: Bo a yega di ser rechasá pa un grupo di mucha? I kiko si bo a hasi tur loke bo tabata por pa ta parti di e grupo ei?

•   Pasobra nan no ke ta diferente. “Mi mayornan no ke pa mi tin un telefòn selular. Ora ku e otro muchanan pidi mi pa mi number di telefòn, mi ta bisa nan ku mi no tin. Nan ta bisa: ‘Kiko? Kuantu aña bo tin?’ Ora mi bisa nan ku mi tin 13 aña, nan ta wak mi ku duele.”—Mary.

   PENSA RIBA ESAKI: Kua restrikshon di bo mayornan ta pone bo sinti bo diferente for di otro hende? Kon bo ta trata ku e restrikshon ei?

•   Pasobra nan no ke pa hende tenta nan. “E muchanan na skol no gusta hende ku ta komportá nan mes diferente, ku ta papia diferente òf ku ta di otro religion. Si nan no ta gusta bo, bo ta bira esun ku semper nan ta tenta.”—Olivia.

   PENSA RIBA ESAKI: Nan a yega di trata bo malu pasobra nan no ta gusta bo? Kon bo a trata ku e situashon ei?

•   Pasobra nan no ke pèrdè nan amigunan. “Mi a purba di adaptá mi mes na kualke grupo ku mi tabata aden. Mi a papia na un manera ku mi no sa papia normal. Mi a hari ora un kos no tabata prèt. Mi a asta tenta un otro hende huntu ku e otro muchanan, aunke mi tabata sa bon kla ku esei por a laga e persona sintié malu.”—Rachel.

   PENSA RIBA ESAKI: Kon importante ta pa otro mucha gusta bo? Bo a yega di kambia bo personalidat pa nan gusta bo?

•   Si bo ta imitá otro mucha djis pa nan gusta bo, esei por resultá nèt lo kontrario. Dikon? Pasobra hende ta ripará mesora ku bo ta pretendé. Brian di 20 aña a bisa: “Mas mi tabata pretendé di ta un hende ku mi no ta, ménos nan tabata gusta mi. Mi a siña ku ta mihó pa bo ser bo mes, pasobra hende por mira mesora ku bo ta fingi òf hunga ròl.”

   UN MIHÓ MANERA PA TRATA KU E ASUNTU: Pensa kiko ta e kosnan mas importante pa bo. Beibel ta bisa: “Hasi sigur kiko ta e kosnan mas importante.” (Filipensenan 1:10) Pues, puntra bo mes, ‘Kiko mi ta haña ta mas importante, haña aprobashon di hende ku tin norma i balor dudoso òf pega na e normanan i balornan ku mi a siña di Beibel?’

   “No ta sabí pa imitá otro hende. Esei no ta pone ku hende lo gusta bo mas, òf ku bo ta bira un mihó persona.”—James.

•   Si bo hasi loke otro hende ke, djis pa nan gusta bo, esei por daña bo reputashon. Bo ta bira un hende ku ta hasi solamente loke otro hende ke pa bo hasi. Un hóben ku yama Jeremy a bisa: “Mi tabatin e kustumber di hasi kualke kos djis pa mi forma parti di un sierto grupo, asta si esei a daña mi reputashon. Mi a bira nan esklabo i marioneta.”

   UN MIHÓ MANERA PA TRATA KU E ASUNTU: Biba di akuerdo ku bo normanan i no hasi manera un kamaleon ku kada bes ta kambia bira e koló di su ambiente. Ku bon motibu Beibel ta bisa: “No sigui e mayoria den hasimentu di maldat.”—Éksodo 23:2.

   “Mi a purba di gusta tur loke nan a gusta—muzik, wega, paña, show, tipo di makiahe. . . M’a purba di bira meskos ku nan. Mi ta kere ku nan a ripará mesora ku mi tabata fingi. Asta mi mes a ripará esei. Esei a laga mi sinti mi bashí i mi a keda mi so. Mi no a rekonosé mi mes mas. Mi a keda sin un personalidat propio. Mi a siña ku no ta tur hende ku bo topa lo gusta bo. Esei no ta nifiká ku bo mester stòp di buska amigu: pero bo mester duna bo mes tempu i espasio pa krese.”—Melinda.

•   Si bo ta purba di laga otro hende gusta bo, esei por daña bo kondukta. Un hóben ku yama Chris a mira kon esei a pasa ku su primu. El a kuminsá hasi kos ku normalmente lo e no hasi—manera usa droga—djis pa nan gust’é. El a bira adikto i esei a daña kasi henter su bida.

   UN MIHÓ MANERA PA TRATA KU E ASUNTU: Keda leu for di hende ku ta papia palabra malu i ta komportá nan mes malu. Beibel ta bisa: “Esun ku anda ku hende sabí lo ta sabí, ma un kompañero di hende bobo lo sufri daño.”—Proverbionan 13:20.

   “Tin biaha ta bon pa bo hasi esfuerso pa otro hende gusta bo. Pero bo no mester hasi esei si e ta bai kontra di loke ta bon. Hende ku ke ta bo amigu, lo aseptá bo manera bo ta.”—Melanie

   Tep: Ora bo ta purba di sera amistat, no hasi esei ku solamente hende ku tin e mes interesnan ku bo. Buska esnan ku tin e mes normanan—spiritual, moral i étika ku bo.