Un bírgen ta un hende ku nunka a yega di tene relashon seksual.

 Pero, di mes no ta penetrashon so ta kai bou di relashon seksual. Algun hende ta pensa ku ainda nan ta bírgen pasobra nan no a yega te na penetrashon aunke nan a hasi tur sobrá kos.

 Sèks ta enserá tambe, por ehèmpel, sèks oral, sèks anal òf masturbashon di un otro persona.

 E punto ta: Esun ku hasi sèks, sea ku ta oral, anal òf masturbashon di un otro persona, no por bisa ku e ta bírgen.

 Beibel ta bisa ku un hòmber i un muhé por tene relashon seksual solamente si nan ta kasá. (Proverbionan 5:18) P’esei un persona ku ke agradá Dios lo warda te dia e kasa pa tene relashon seksual.​—1 Tesalonisensenan 4:3-5.

 Tin hende ta bisa ku e punto di bista di Beibel ta antikuá i no ta pas den e mundu moderno akí. Pero kòrda ku nos mundu moderno ta yen di divorsio, embaraso no deseá i malesa transmití seksualmente. Pues, nos mundu moderno no ta den niun posishon pa duna konseho tokante moralidat!​—1 Huan 2:15-17.

 Si bo pens’é bon, Beibel su normanan moral tin sentido. Por ehèmpel, imaginá bo ku un hende ta regalá bo 1.000 florin kèsh. Lo bo tira e sèn ei for di un edifisio pa ken ku ta pikié for di abou?

 Ora ta trata di sèks ta kasi meskos. Sierra di 14 aña ta bisa: “Mi no ta bai entregá mi kurpa na un hende ku lo mi no bai kòrda su nòmber aki un par di aña.” Tammy di 17 aña ta di akuerdo. E ta bisa: “Sèks ta un regalo muchu spesial pa duna ken ku ta.”

 E punto ta: Beibel ta bisa ku hende soltero mester keda bírgen i mantené un kondukta limpi.​—1 Korintionan 6:18; 7:8, 9.

•   Bo ta kere ku Beibel su punto di bista tokante sèks ta rasonabel òf muchu strèn?

•   Bo ta kere ku ta oké pa dos hende ku no ta kasá tene relashon seksual basta nan bisa ku nan ta stima otro?

 Hopi hóben a pensa bon riba e asuntu akí i a yega na e konklushon ku keda bírgen i mantené un kondukta limpi ta e mihó kos pa hasi. Nan no ta lamentá e desishon ei ni no ta sinti ku nan a pèrdè algu. Wak kiko algun di nan ta bisa:

•  “Mi ta kontentu ku mi ta bírgen! Mi no ta karga e konsekuensianan ku otronan a haña nan mes kuné debí ku nan a tene relashon seksual promé ku matrimonio manera, doló emoshonal, mental òf físiko.”​—Emily.

•  “Mi ta kontentu ku mi no tin un lista di hende ku mi a tene relashon seksual kuné. I ta un alivio pa sa ku mi no tin ni e mínimo chèns di tin un malesa transmití seksualmente.”​—Elaine.

•  “Mi a tende hopi mucha muhé di mi edat òf mas grandi ku mi lamentá ku nan a tene relashon seksual i ku ta bisa mihó nan a warda. Mi no ke hasi e mesun fout ei.”​—Vera.

•  “Mi sa di hopi hende ku a keda ku problemanan emoshonal despues ku nan no tabata bírgen mas òf pasobra nan tabatin hopi partner seksual. Ami ta haña esei hopi tristu.”​—Deanne.

 E punto ta: Bo mester sa presis kiko bo ta kere aden promé ku bo haña bo ku preshon òf tentashon pa hasi sèks.​—Santiago 1:14, 15.

 Kiko bo mester bisa si un hende puntra bo bo punto di bista tokante sèks? Tur kos ta dependé di e sirkunstansianan.

 “Si nan ta hasi mi pregunta tokante sèks djis pa pèst mi, lo mi no djis keda einan sin bisa nada. Lo mi bisa: ‘Esei ta for di bo asuntu.’ Anto kana bai laga nan.”​—Corinne.

 “Tin mucha na skol ku ta hasi bo e pregunta ei djis pa tèr i pasa prèt. Si t’esei ta nan intenshon, lo mi no kontestá nan mes.”​—David.

 Bo tabata sa? Tabatin biaha ku Hesus a usa silensio pa “kontestá” esnan ku tabata hasi bofon di dje.​—Mateo 26:62, 63.

 Pero kiko si e persona ku ta hasi e pregunta di bèrdat kier sa e kontesta? Si bo ta pensa ku e tin rèspèt pa Beibel, bo por referí na un teksto manera 1 Korintionan 6:18. E teksto ei ta mustra ku hende ku hasi sèks promé ku kasa ta peka kontra su mes kurpa òf ta hasi su mes doló.

 Sea ku bo ta hasi uso di Beibel òf nò, ta importante pa bo papia ku konvikshon. Kòrda: bo tin tur derecho pa ta orguyoso di e desishon ku bo a tuma pa keda moralmente limpi.​—1 Pedro 3:16.

 “Ora bo kontestá ku konfiansa, esei ta mustra ku bo no ta duda den loke bo ta kere pero ku bo kier hasi loke ta korekto; no djis pasobra otro hende a bisa bo hasié.”​—Jill.

 E punto ta: Si bo ta bon pará tras di bo punto di bista tokante sèks, bo por splika otronan mas mihó. Nan kontesta por sorprendé bo. Melinda di 21 aña ta bisa: “Mi koleganan di trabou a elogiá mi pasobra mi ta bírgen ainda. Nan no ta haña esei nada straño. Pa nan esei ta un señal ku mi tin dominio propio i normanan haltu.”

 Tep! Si bo mester di yudansa pa disidí kiko ta bo punto di bista tokante sèks, download e blachi di tarea “Kon pa Splika Bo Punto di Bista Tokante Sèks.” Wak tambe e buki Loke Hóbennan Sa Puntra—Kontesta Práktiko na spañó.

•    Kapítulo 24 di Volúmen 1 tin e tema: “Sèks Lo Drecha Nos Relashon?”

•    Kapítulo 5 di Volúmen 2 tin e tema: “Dikon Ta Bon pa Keda Bírgen?”

 “Mi ta gusta e manera ku e buki ‘Hóbennan Sa Puntra’ ta splika sierto tópiko. Por ehèmpel, na página 187 di Volúmen 1 e ta splika ku tene relashon seksual promé ku kasa ta manera bo ta duna un hende un kadena karu pòrnada. Bo ta rebahá bo mes. Página 177 ta mustra kon sèks promé ku matrimonio ta manera bo ta usa un kuadro masha bunita komo tapeit pa limpia pia. Pero e ilustrashon ku mas mi ta gusta ta esun na página 54 di Volúmen 2. E plachi ta mustra ku ‘Hasi sèks promé ku matrimonio ta manera ora bo ta habri un regalo promé ku nan a duna bo e.’ Ta manera bo ta hòrta algu ku ta pa un otro hende: bo futuro kasá.”​—Victoria.