E siguiente deklarashonnan ta deskribí loke bo sa sinti tin biaha?

 “Konstantemente mi ta pensa: Kiko si . . .? Kiko si nos haña un aksidente di outo? Kiko si nos avion kai? Mi ta anshá tokante kosnan ku normalmente otro hende lo no preokupá asina tantu kuné.”—Charles.

 “Mi ta preokupá i ta bira anshá pa tur kos. Mi ta sinti komo si fuera mi ta kore, kore i kore sin yega niun kaminda. Mi ta traha mata kurpa, pero mi no ta logra nada!”—Anna.

 “Ora hende bisa mi ku mi ta afortuná pasobra ainda mi ta bai skol, mi ta pensa: Nan no tin e mínimo idea kuantu strès skol ta duna mi!”—Daniel.

 “Mi ta sinti komo si fuera konstantemente mi ta bou di preshon. Semper mi ta preokupá tokante kiko ta bai sosodé òf kiko mi mester bai hasi.”—Laura.

 Realidat: Beibel ta yama e tempu ku nos ta biba aden “tempunan krítiko, difísil pa trata kuné.” (2 Timoteo 3:1) Esei ta pone ku tantu hóben komo adulto ta sinti ansiedat.

 E kontesta ta nò. Eigenlijk, Beibel ta bisa ku ta korekto pa nos preokupá i hasi esfuerso pa agradá esnan ku nos ta stima.—1 Korintionan 7:32-34; 2 Korintionan 11:28

 I laga nos ta franko, preokupashon por motivá nos pa aktua. Por ehèmpel, suponé ku bo tin un prufwèrk otro siman. Si bo ta preokupá pa haña un bon punto, esei lo pone bo sinti bo obligá pa kuminsá siña e siman akí mes! 

 Tambe un grado di ansiedat por yuda bo mira peliger. Un tiner ku yama Serena ta bisa ku “tin biaha bo ta sinti ansiedat pasobra bo sa ku bo ta aktuando robes, i ku bo tin ku hasi kambio pa bo konsenshi por ta trankil.”—Kompará ku Santiago 5:14.

 Realidat: Preokupashon por ta bon, basta e ta yuda bo hasi e kos korekto.

 Pero, kiko bo por hasi si bo pensamentunan negativo ta pone bo sinti manera kos ku bo ta sera den un kaya sin salida?

 Ehèmpel: Richard di 19 aña ta bisa: “Ora mi tin un problema, mi ta kuminsá pensa riba tur e posibel konsekuensianan. Mi ta keda pensa riba esei te ku mi ta bira masha anshá mes.”

 Beibel ta bisa ku “un kurason trankil ta bida pa e kurpa.” (Proverbionan 14:30) Di otro banda, ansiedat por kousa un kantidat di síntoma desagradabel manera doló di kabes, biramentu di kabes, doló di stoma i batimentu di kurason.

 Kiko bo por hasi si bo ansiedat ta traha kontra bo en bes di yuda bo?

•   Puntra bo mes si bo tin motibu bálido pa bira anshá. “Ta bon pa bo preokupá ku bo responsabilidatnan pero no ta bon pa bira anshá di mas. Preokupashon ta tene bo mente okupá, pero e no ta yuda bo ku nada. E ta manera un kachó ku ta keda kore tras di su mes rabu.”—Katherine.

   Beibel ta bisa: “Kua di boso, ni maske kuantu e ansha, por rèk su bida un krenchi?”—Mateo 6:27.

   Loke esei ta nifiká: Si preokupashon no yuda bo haña un solushon, tur loke e lo hasi ta duna bo mas problema—òf e por bira bo problema.

•   No preokupá ku e problemanan di mañan. “Pensa un ratu. E kos ku bo ta preokupá kuné awe lo ta importante mañan? Otro luna, otro aña òf aki sinku aña?”—Anthony.

   Beibel ta bisa: “No sea nunka anshá pa e dia di mañan, pasobra e dia di mañan lo tin su mes inkietutnan. Kada dia tin su mes problemanan.”—Mateo 6:34.

   Loke esei ta nifiká: No tin masha sentido pa preokupá ku e problemanan di mañan, ya ku algun di e problemanan ei kisas nunka lo presentá.

•   Siña biba ku situashonnan ku bo no por kambia. “E mihó kos ku bo por hasi ta: prepará te kaminda por pa sierto situashonnan. Pero bo tin ku aseptá ku no ta tur kos ta den bo man.”—Robert.

   Beibel ta bisa: “No ta semper esnan mas lihé ta gana e kareda, . . . ni no ta semper esnan ku tin konosementu tin éksito, pasobra tempu i suseso imprevisto ta alkansá nan tur.”—Eklesiástes 9:11, NW

   Loke esei ta nifiká: Tin biaha bo no por kambia bo sirkunstansianan, pero bo por kambia bo punto di bista sí.

•   Sea realístiko. “Mi tin ku enfoká riba henter e totalidat i no haña strès pa motibu di e detayenan. Mi tin ku disidí kiko ta mas importante i usa mi energia pa e kosnan ei.”—Alexis.

   Beibel ta bisa: “Hasi sigur kiko ta e kosnan mas importante.”—Filipensenan 1:10.

   Loke esei ta nifiká: Hende ku ta mira problema na un manera realístiko tin ménos chèns di bira demasiado preokupá.

•   Papia ku un hende. “Tempu mi tabatin rònt di 11 aña, mi tabata yega fo’i skol hopi preokupá, yen di miedu pa loke e dia di mañan lo trese kuné. Mi mama ku mi tata tabata djis skucha ora mi tabata deshogá mi mes. Mi tabata kontentu ku mi tin nan. Mi por a konfia nan i papia tur kos ku nan. Esei a yuda mi enfrentá e siguiente dia.”—Marilyn.

   Beibel ta bisa: “Ansha den kurason di hende ta hasié abatí, ma un bon palabra ta hasié kontentu.”—Proverbionan 12:25.

   Loke esei ta nifiká: Un mayor òf un amigu lo por duna bo sugerensia práktiko tokante kon pa aliviá bo ansiedat.

•   Hasi orashon. “Orashon na bos haltu pa mi por tende mi mes papia ta yuda mi. E ta yuda mi bisa loke tin mi anshá en bes di ten’é den mi mente so. E ta yuda mi realisá tambe ku Yehova ta mas grandi ku mi preokupashon.”—Laura.

   Beibel ta bisa: “Tira tur boso inkietut riba [Dios], pasobra e ta interesá den boso.”—1 Pedro 5:7.

   Loke esei ta nifiká: Orashon no ta djis un método pa resolvé problema riba bo mes. E ta komunikashon real entre abo ku Yehova Dios, kende ta primintí: “No desmayá, pasobra mi ta bo Dios. Lo mi fortalesé bo, sí, lo mi yuda bo.”—Isaías 41:10.