Hende Muhé den Beibel—Kiko Nos Por Siña for di Nan?

TOKA NA

Loke Beibel ta bisa

Beibel ta papia tokante hopi hende muhé. Nos por siña hopi lès balioso for di nan bida. (Romanonan 15:4; 2 Timoteo 3:16, 17) Den e artíkulo akí, nos lo mira brevemente loke algun di nan a hasi. Hopi di nan a pone ekselente ehèmpel pa nos imitá. Sinembargo, loke algun hende muhé a yega di hasi ta sirbi komo spièrtamentu pa nos.—1 Korintionan 10:11; Hebreonan 6:12.

Abigail

Ken Abigail tabata? Abigail tabata kasá di Nabal, un hòmber riku pero ònbeskòp. Sinembargo, Abigail tabata inteligente, humilde, bunita di aparensia i ku bon kualidat.—1 Samuel 25:3.

Kiko Abigail a hasi? Abigail a aktua sabí; asina, el a evitá un desgrasia. Abigail i Nabal a biba den e region kaminda David, e futuro rei di Israel, tabata skonde tempu ku e tabata fugitivo. Miéntras ku David i su sòldánan tabata einan, nan a protehá e tounan di karné di Nabal kontra ladron. Un dia, David a manda algun mensahero serka Nabal pa pidié un poko kuminda, pero Nabal a nenga di duna nan kuminda i a trata nan masha malu. Esei a pone David rabia masha pisá! Pues, David a sali bai pa mata Nabal i tur e hende hòmbernan di Nabal su kas.—1 Samuel 25:10-12, 22.

Ora Abigail a tende loke su kasá a hasi, el a aktua mesora. El a duna su sirbidónan kuminda pa nan hiba pa David i David su sòldánan. E mes a bai tras di su sirbidónan pa roga David pa mustra miserikòrdia. (1 Samuel 25:14-19, 24-31) David a aseptá e regalo di Abigail i a mira ku Abigail tabata un persona humilde. El a skucha e konseho sabí di Abigail i a rekonosé ku Dios a usa Abigail pa evitá un tragedia. (1 Samuel 25:32, 33) Poko tempu despues, Nabal a muri i David a kasa ku Abigail.—1 Samuel 25:37-41.

Kiko nos por siña for di Abigail? Aunke Abigail tabata bunita i riku, e tabatin un punto di bista balansá di su mes. Pa mantené pas, Abigail tabata dispuesto pa pidi despensa pa algu ku e mes no a hasi. Abigail a trata e situashon tenso akí ku trankilidat, takto, kurashi i sabiduria.

▸ Pa mas informashon tokante Abigail, wak e artíkulo “Un Muhé Inteligente.”

Ana

Ken Ana tabata? Ana tabata esposa di Elkana, i mama di Samuel, un profeta ku a bira konosí den antiguo Israel.—1 Samuel 1:1, 2, 4-7.

Kiko Ana a hasi? Ana a buska konsuelo serka Dios pa motibu ku e no tabatin yu aunke e tabatin hopi aña kasá. Esposo di Ana tabatin dos esposa. E otro esposa di Elkana, esta, Penina, sí tabatin yu. Penina tabata hasi chèrchi di Ana, p’esei, Ana tabata hasi orashon na Dios pa haña konsuelo. Ana a primintí Dios ku si Dios dun’é un yu hòmber, lo el a entregá e yu ei na Dios pa e yu sirbi na e tabernakel. E tabernakel tabata un tènt portátil ku e israelitanan tabata usa pa adorá Dios.—1 Samuel 1:11.

Dios a kontestá e orashonnan di Ana, i Ana a haña un yu hòmber, ku el a yama Samuel. Ana a kumpli ku loke el a primintí i a hiba Samuel tabernakel pa el a sirbi einan for di tempu Samuel tabata mucha. (1 Samuel 1:27, 28) Tur aña, Ana tabata kose un mantel sin manga i hib’é pa Samuel. Ku tempu, Dios a bendishoná Ana ku sinku yu mas, tres yu hòmber i dos yu muhé.—1 Samuel 2:18-21.

Kiko nos por siña for di Ana? Ana su orashonnan sinsero a yud’é trata ku prueba. E orashon di gradisimentu di Ana ku ta registrá na 1 Samuel 2:1-10 ta mustra ku Ana tabatin hopi fe den Dios.

▸ Pa mas informashon tokante Ana, wak e artíkulo “Ana a Deshogá su Kurason Serka Dios.”
▸ Pa haña sa dikon Dios a permití poligamia den su pueblo, wak e artíkulo “Dios ta Aprobá Poligamia?”

Dalila

Ken Dalila tabata? Dalila tabata un hende muhé ku Sámson, un hues di Israel, a namorá di dje.—Huesnan 16:4, 5.

Kiko Dalila a hasi? Dalila a aseptá plaka for di e gobernantenan filisteo pa e traishoná Sámson. Dios tabata usando e hues akí pa salba e israelitanan for di man di e filisteonan. E filisteonan no por a vense Sámson pasobra Sámson tabatin forsa ekstraordinario. (Huesnan 13:5) Pues, e gobernantenan a akudí na Dalila pa yudansa.

E filisteonan a usa soborno pa Dalila bisa nan kon bini Sámson tabatin asina tantu forsa. Dalila a aseptá e plaka, i despues di vários intento el a haña sa e sekreto di Sámson. (Huesnan 6:15-17) Dalila a konta e filisteonan e sekreto di Sámson i nan a gara Samson i ser’é den prizòn.—Huesnan 16:18-21.

Kiko nos por siña for di Dalila? Loke Dalila a hasi ta sirbi komo spièrtamentu pa nos. Golosidat a pone Dalila trata un sirbidó di Dios na un manera engañoso, desleal i egoista.

Débora

Ken Débora tabata? Débora tabata profeta di Yehova, Dios di Israel, i e mester a bisa e pueblo kiko Dios tabata ke pa nan hasi. Ademas, Yehova a usa Débora pa yuda solushoná problema ku tabatin entre e israelitanan.—Huesnan 4:4, 5.

Kiko Débora a hasi? Profeta Débora ku kurashi a apoyá e sirbidónan di Dios. Yehova a bisa Débora pa manda yama Barak i bisa Barak pa dirigí e ehérsito israelita den bataya kontra nan enemigunan kananeo. (Huesnan 4:6, 7) Ora Barak a pidi Débora pa bai huntu kuné, Débora no tabatin miedu i a aseptá pa bai ku Barak.—Huesnan 4:8, 9.

Dios a yuda e israelitanan logra un viktoria aplastante. Anto Débora a komponé por lo ménos parti di e kantika ku e i Barak a kanta ora nan a konta loke a sosodé. Den e kantika ei, Débora a menshoná Yael, un otro hende muhé balente, ku a hunga un ròl importante den derota di e kananeonan.—Huesnan, kapítulo 5.

Kiko nos por siña for di Débora? Débora a hasi sakrifisio pa yuda otro hende i e tabatin kurashi. El a animá otro hende pa hasi loke ta bon den bista di Dios. Anto ora e hendenan ku el a papia kuné a hasi bon, Débora tabata elogiá nan pa loke nan a hasi.

▸ Pa mas informashon tokante Débora, wak e artíkulo “Mi A Lanta Komo un Mama pa Israel.”

E mucha muhé sulamita

Ken e mucha muhé sulamita tabata? E tabata un bunita mucha muhé di kunuku. E ta e personahe prinsipal den e buki bíbliko Kantika di Sálomon. Beibel no ta menshoná su nòmber.

Kiko e mucha muhé sulamita a hasi? E mucha muhé sulamita a keda fiel na e wardadó di karné ku e tabata stima. (Kantika di Sálomon 2:16) Su bunitesa a kapta atenshon di Rei Sálomon, kende tabata riku i kier a gana su amor. (Kantika di Sálomon 7:6) Aunke otro hende tabata trata di konvensé e mucha muhé sulamita pa skohe Sálomon, el a nenga di hasi esei. E tabata stima un humilde wardadó di karné i a keda fiel na dje.—Kantika di Sálomon 3:5; 7:10; 8:6.

Kiko nos por siña for di e mucha muhé sulamita? Aunke e tabata un mucha muhé bunita i tabata haña hopi atenshon, semper el a keda humilde. E no a laga preshon di otro hende, ni e promesa pa bira riku ni pa haña prestigio influensi’é. E tabatin dominio riba su emoshonnan i a keda limpi den sentido moral.

Esposa di Lòt

Ken e esposa di Lòt tabata? Beibel no ta menshoná su nòmber. Pero Beibel ta bisa ku e tabatin dos yu muhé i ku e i su famia tabata biba den e stat Sódoma.—Génesis 19:1, 15.

Kiko e esposa di Lòt a hasi? El a desobedesé Dios. Dios a bisa ku lo el a destruí Sódoma i e statnan pegá kuné pasobra nan tabata praktiká inmoralidat seksual grosero. Debí ku Dios tabata stima Lòt i su famia, kendenan tabata biba na Sódoma, Dios a manda dos angel pa saka nan i hiba nan na un lugá safe.—Génesis 18:20; 19:1, 12, 13.

E angelnan a bisa famia di Lòt pa hui i no wak patras, sino nan lo a muri. (Génesis 19:17) E esposa di Lòt “a drei wak patras i el a bira un pilá di salu.”—Génesis 19:26.

Kiko nos por siña for di esposa di Lòt? Loke a pasa ku esposa di Lòt ta kòrda nos ku ta masha peligroso pa stima kos material asina tantu te ku nos ta desobedesé Dios. Debí na e mal ehèmpel di esposa di Lòt, Hesus a spièrta nos: “Kòrda e kasá di Lòt.”—Lukas 17:32.

Èster

Ken Èster tabata? Èster tabata un mucha muhé hudiu ku Rei Asuero di Persia a skohe komo su reina.

Kiko Èster a hasi? Reina Èster a usa su influensia pa evitá ku nan lo a mata su pueblo. El a haña sa di un dekreto ku a indiká fecha spesífiko ku lo a mata tur hudiu ku tabata biba den e Imperio Perso. Haman, kende tabata e promé minister, a trama e plan malbado ei. (Èster 3:13-15; 4:1, 5) Èster a riska su bida i ku yudansa di su primu, Mardokeo, el a konta su kasá, Rei Asuero, di e kòmplòt akí. (Èster 4:10-16; 7:1-10) Asuero a laga Èster i Mardokeo saka un otro dekreto ku a permití e hudiunan defendé nan mes. E hudiunan a logra derotá tur nan enemigunan.—Èster 8:5-11; 9:16, 17.

Kiko nos por siña for di Èster? Reina Èster a pone un ekselente ehèmpel pa nos. E tabatin kurashi; e tabata humilde i modesto. (Salmo 31:24; Filipensenan 2:3) Apesar ku Èster tabata bunita i tabatin un posishon haltu, el a buska konseho i yudansa serka otro hende. Ora el a papia ku su kasá, el a usa takto i a papia ku rèspèt, pero ku kurashi. Ademas, Èster no tabatin miedu di identifiká su mes komo hudiu, maske tabata un periodo masha peligroso pa e hudiunan.

▸ Pa mas informashon tokante Èster, wak e artíkulo “Èster a Sali na Defensa di e Pueblo di Dios” i “Èster Tabata Sabí, ku Kurashi i Kla pa Sakrifiká Su Mes.”

Eva

Ken Eva tabata? Eva tabata e promé hende muhé ku Dios a krea i e promé hende muhé menshoná den Beibel.

Kiko Eva a hasi? Eva a desobedesé un mandamentu kla di Dios. Tantu Adam komo Eva tabata sernan humano perfekto. Yehova a krea nan ku e kapasidat di tuma nan propio desishonnan i pa kultivá e kualidatnan di Dios, manera amor i sabiduria. (Génesis 1:27) Eva tabata sa ku Dios a bisa Adam ku si nan a kome for di un sierto palu, nan lo a muri. Sinembargo, Satanas a gaña Eva i a laga Eva kere ku lo e no a muri. De echo, Satanas a konvensé Eva ku su bida lo tabata mihó si e desobedesé Dios. Pues, Eva a kome di e fruta i despues el a duna su esposo tambe pa e kome for di dje.—Génesis 3:1-6; 1 Timoteo 2:14.

Kiko nos por siña for di Eva? Su ehèmpel ta mustra dikon ta peligroso pa keda pensa riba mal deseo. Eva a desobedesé e mandamentu di Dios i a kultivá un deseo intenso pa haña algu ku no a pertenesé na dje.— Génesis 3:6; 1 Huan 2:16.

Lea

Ken Lea tabata? Lea tabata e promé esposa di e patriarka Yakòb. Su ruman muhé chikitu, Raquel, tabata e otro esposa di Yakòb.

Kiko Lea a hasi? Lea a haña seis yu hòmber ku Yakòb. (Rut 4:11) Yakòb kier a kasa ku Raquel i no ku Lea. Sinembargo, Laban, tata di e mucha muhénan, a laga Lea tuma e lugá di Raquel. Ora Yakòb a haña sa ku el a ser gañá pa kasa ku Lea, el a bai papia ku Laban. Laban a splika Yakòb ku no tabata e kustumber pa kasa e yu di mas chikitu promé ku esun mayó. Un siman despues, Yakòb a kasa ku Raquel.—Génesis 29:26-28.

Yakòb tabata stima Raquel mas ku Lea. (Génesis 29:30) Esei a pone ku Lea a bira yalurs i a kuminsá kompetí ku su ruman muhé pa haña Yakòb su amor i atenshon. Dios a mira kon Lea tabata sintié i a bendishon’é ku shete yu—seis yu hòmber i un yu muhé.—Génesis 29:31.

Kiko nos por siña for di Lea? Lea a hasi orashon na Yehova i no a laga su problemanan di famia strob’é di mira ku Yehova tabata yud’é. (Génesis 29:32-35; 30:20) E relato tokante Lea su bida ta mustra e problemanan ku poligamia ta trese kuné; poligamia tabata algu ku Yehova a tolerá pa un tempu. Sinembargo, e norma di Dios pa matrimonio ta pa un hòmber tin un esposa.—Mateo 19:4-6.

▸ Pa mas informashon tokante Lea, wak e artíkulo “Dos hermanas rivales ‘edificaron la casa de Israel.’”
▸ Pa haña sa dikon Dios a permití poligamia den su pueblo, wak e artíkulo “Dios ta Aprobá Poligamia?”

Maria (mama di Hesus)

Ken Maria tabata? Maria tabata un hóben hudiu. Maria tabata bírgen na momento ku Hesus a nase. Pues, Maria a konsebí e yu di Dios na un manera milagroso.

Kiko Maria a hasi? Maria tabata humilde i a obedesé Dios. E tabata komprometé ku Hose ora ku el a haña bishita di un angel ku a bis’é ku lo el a sali na estado di un yu ku lo a bira e Mesías tan sperá. (Lukas 1:26-33) Maria tabata dispuesto pa kumpli ku su papel. Despues ku Hesus a nase, Maria i Hose a haña kuater yu hòmber i por lo ménos dos yu muhé. Pues, Maria no a keda bírgen. (Mateo 13:55, 56) Aunke Maria tabatin un privilegio spesial, nunka el a pidi ni a haña trato spesial durante Hesus su sirbishi ni tampoko komo miembro di e promé kongregashon kristian.

Kiko nos por siña for di Maria? Maria tabata un muhé fiel ku tabata dispuesto pa aseptá un responsabilidat grandi. E tabata konosé Skritura masha bon mes. Segun kálkulo, Maria a referí mas o ménos 20 biaha na Skritura ora el a sita e palabranan registrá na Lukas 1:46-55.

▸ Pa mas informashon tokante Maria, wak e artíkulo “Loke Nos Por Siña for di Maria Su Ehèmpel.”

Maria (ruman muhé di Marta i Lázaro)

Ken Maria tabata? Maria ku su ruman hòmber Lázaro, i su ruman muhé Marta, tabata bon amigu di Hesus.

Kiko Maria a hasi? Na vários okashon, Maria a mustra ku e tabatin rèspèt pa Hesus, Yu di Dios. E tabatin fe ku Hesus por a evitá ku su ruman hòmber, Lázaro, lo a muri. Ademas, e tabata presente ora Hesus a resusitá Lázaro. Maria su ruman muhé, Marta, a kritik’é ora el a skohe pa skucha Hesus en bes di yud’é ku e trabounan di kas. Pero Hesus a elogiá Maria pasobra Maria a pone kos spiritual na promé lugá.—Lukas 10:38-42.

Na un otro okashon, Maria a mustra generosidat bashando “zeta perfumá karu” riba Hesus su kabes i pia. (Mateo 26:6, 7) Algun di e hendenan presente no a gusta ku Maria tabata dispidí zeta karu. Pero Hesus a defendé Maria i a bisa: “Tur kaminda na mundu ku prediká e bon notisia, nan lo konta tambe loke e muhé akí a hasi i asina sigui rekord’é.”—Mateo 24:14; 26:8-13.

Kiko nos por siña for di Maria? Maria tabatin hopi fe. El a pone adorashon na Dios promé ku kualke otro kos. I na un manera humilde el a mustra onor na Hesus, sin importá kuantu sèn esei lo a kosta.

Maria Magdalena

Ken Maria Magdalena tabata? Maria Magdalena tabata un fiel disipel di Hesus.

Kiko Maria Magdalena a hasi? Maria Magdalena tabata un di e hende muhénan ku tabata biaha huntu ku Hesus i e disipelnan di Hesus. E tabata un persona generoso ku a usa su propio rekursonan pa yuda kubri e nesesidatnan di Hesus i e otro disipelnan. (Lukas 8:1-3) Maria Magdalena a sigui Hesus te na final di Hesus su sirbishi, i el a keda huntu ku Hesus ora nan a mata Hesus. E tabatin e privilegio di ta un di e promé disipelnan ku a mira Hesus despues ku Hesus a resusitá.—Huan 20:11-18.

Kiko nos por siña for di Maria? Maria Magdalena a apoyá e sirbishi di Hesus na un manera generoso i e tabata un fiel disipel di Hesus.

Marta

Ken Marta tabata? Marta tabata ruman muhé di Lázaro i Maria, i nan tres tabata biba den e pueblito Betania, serka di Herúsalèm.

Kiko Marta a hasi? Marta tabata un bon amiga di Hesus. Hesus tabata stima Marta, Marta su ruman muhé i Lázaro. (Huan 11:5) Marta tabata hospitalario. Un biaha ku Hesus tabata di bishita, Maria a skohe pa skucha Hesus miéntras ku Marta tabata atendé ku kos di kas. Marta a bai serka Hesus i bis’é ku Maria no tabata yud’é, pero na un manera amabel Hesus a korigí Marta.—Lukas 10:38-42.

Ora Lázaro a bira malu, Marta i su ruman muhé a manda yama Hesus, pasobra nan tabatin sigur ku Hesus lo por a kura nan ruman hòmber. (Huan 11:3, 21) Pero Lázaro a muri. E kòmbersashon ku Marta tabatin ku Hesus a mustra ku el a kere den e speransa di resurekshon ku Beibel ta duna i a konfia ku Hesus por a lanta su ruman hòmber for di morto.—Huan 11:20-27.

Kiko nos por siña for di Marta? Marta tabata traha duru i tabata masha hospitalario. El a aseptá konseho di buena gana. E tabata papia abiertamente tokante su sintimentunan i tokante su fe.

▸ Pa mas informashon tokante Marta, wak e artíkulo “Mi Ta Kere.”

Miriam

Ken Miriam tabata? Miriam tabata ruman muhé di Moises i Aron. E tabata e promé hende muhé ku Beibel ta yama profeta.

Kiko Miriam a hasi? Komo profeta, e tabatin e tarea di transmití mensahe di Dios. Miriam tabatin un puesto importante na Israel. Ora Dios a destruí e ehérsito egipsio den Laman Kòrá, Miriam a kanta un kantika di viktoria huntu ku e hòmbernan.—Éksodo 15:1, 20, 21.

Algun tempu despues, Miriam i Aron a kuminsá kritiká Moises. Ta parse ku nan a bira orguyoso i yalurs. Dios “a tende esaki,” i el a duna konseho fuerte na Miriam i Aron. (Numbernan 12:1-9) Debí ku Miriam tabata esun ku a kuminsá ku e krítikanan, Dios a kastigá Miriam ku lepra. Moises a roga Dios pa kura Miriam, i Dios a skuch’é. Miriam mester a keda shete dia den karentena, promé ku e por a regresá kampamentu di Israel.—Numbernan 12:10-15.

Beibel ta mustra ku Miriam a aseptá e disiplina. Despues di hopi siglo, Dios a papia tokante e papel importante ku Miriam tabatin na Israel. Yehova a rekordá e israelitanan: ”Mi a manda Moises, Aron i Miriam bo dilanti.”—Mikéas 6:4.

Kiko nos por siña for di Miriam? E relato di Miriam ta mustra ku Dios ta skucha loke su sirbidónan ta bisa di otro i e manera ku nan ta papia di otro. Nos ta siña tambe ku pa agradá Dios, nos mester evitá di bira yalurs i orguyoso, ku ta karakterístikanan ku por pone nos daña e bon reputashon di otro hende.

Rahab

Ken Rahab tabata? Rahab tabata un prostituta ku tabata biba den e stat kananeo Yériko. Ku tempu, Rahab a bira un sirbidó di Yehova Dios.

Kiko Rahab a hasi? Rahab a skonde dos israelita ku tabata spioná e tera. El a hasi esei pasobra el a tende kon e Dios di Israel, Yehova, a libra su pueblo for di e egipsionan i despues for di e amoreonan.

Rahab a yuda e spionnan, i el a supliká nan pa salba e i su famia ora e israelitanan tabata bini pa destruí Yériko. E spionnan a bai di akuerdo, pero bou di algun kondishon: promé, Rahab no mester a konta niun hende di nan mishon sekreto; di dos, Rahab i su famia mester a keda den kas durante e atake di e israelitanan, i di tres, Rahab mester a kologá un kabuya kòrá for di su bentana pa nan por a sa kua tabata su kas. Rahab a obedesé tur instrukshon, i e i su famia a skapa ora e israelitanan a kapturá Yériko.

Despues di tempu, Rahab a kasa ku un hòmber israelita i a bira antepasado di Rei David i Hesukristu.—Hosue 2:1-24; 6:25; Mateo 1:5, 6, 16.

Kiko nos por siña for di Rahab? Beibel ta mustra ku Rahab ta un ekselente ehèmpel di fe. (Hebreonan 11:30, 31; Santiago 2:25) Su historia ta mustra ku Dios ta imparsial i kla pa pordoná, i ku e ta bendishoná hende ku ta konfia den dje sin importá nan pasado.

▸ Pa mas informashon tokante Rahab, wak e artíkulo “Dios a ‘Deklar’é Hustu pa Medio di Obra.’”

Raquel

Ken Raquel tabata? E tabata un di e yu muhénan di Laban i e esposa ku Yakòb tabata stima mas.

Kiko Raquel a hasi? Raquel a kasa ku Yakòb i el a haña dos yu hòmber, ku a bira dos di e kabesantenan di e 12 tribunan di Israel. Raquel a konosé su futuro esposo ora e tabata kuida e karnénan di su tata. (Génesis 29:9, 10) Raquel tabatin “bunita kurpa” kompará ku su ruman muhé mas grandi, Lea.—Génesis 29:17.

Yakòb a stima Raquel, i el a bai di akuerdo pa traha shete aña pa e por a kasa kuné. (Génesis 29:18) Sinembargo, Laban a gaña Yakòb pa asina Yakòb kasa ku Lea promé. Despues, Laban a laga Yakòb kasa ku Raquel.—Génesis 29:25-27.

Yakòb a stima Raquel i su dos yu hòmbernan mas ku el a stima Lea i e yunan ku e tabatin kuné. (Génesis 37:3; 44:20, 27-29) Komo resultado, tabatin un rivalidat entre e dos ruman muhénan akí.—Génesis 29:30; 30:1, 15.

Kiko nos por siña for di Raquel? Raquel a soportá un problema familiar difísil i no a pèrdè speransa ku Dios lo a skucha su orashon. (Génesis 30:22-24) E relato di Raquel ta mustra kuantu difikultat poligamia ta kousa den famia. Loke a pasa ku Raquel tambe ta mustra e sabiduria tras di Dios su norma tokante matrimonio, esta, ku kada hòmber mester tin solamente un esposa.—Mateo 19:4-6.

▸ Pa mas informashon tokante Raquel, wak e artíkulo “Dos hermanas rivales ‘edificaron la casa de Israel.’”
▸ Pa haña sa dikon Dios a permití poligamia den su pueblo, wak e artíkulo “Dios ta Aprobá Poligamia?”

Rebeka

Ken Rebeka tabata? Rebeka tabata esposa di Isak i mama di e oochi Yakòb i Esou.

Kiko Rebeka a hasi? Rebeka a hasi Dios su boluntat, asta ora esei no tabata fásil. Un dia, miéntras e tabata saka awa for di un pos, un hòmber a pidié poko awa. Rebeka a kore dun’é di bebe i el a ofresé tambe pa duna e kamelnan di e hòmber awa. (Génesis 24:15-20) E hòmber ei tabata Abraham su sirbidó ku a biaha distansia largu pa buska un esposa pa Isak, yu di Abraham. (Génesis 24:2-4) Ademas, el a hasi orashon pa pidi Dios yud’é haña un kasá pa Isak. Ora el a mira ku Rebeka tabata un muhé trahadó i hospitalario, el a realisá ku Dios a kontestá su orashon. Sí, Rebeka tabata e persona ku Dios a skohe pa Isak.—Génesis 24:10-14, 21, 27.

Ora Rebeka a komprondé e motibu tras di e sirbidó su bishita, el a aseptá pa bai kuné i a bira esposa di Isak. (Génesis 24:57-59) Despues di tempu, Rebeka a haña yu hòmber oochi. Dios a bis’é ku e yu mayó, Esou, lo a sirbi e yu hòmber mas chikitu, Yakòb. (Génesis 25:23) Ora Isak tabata bai bendishoná su yu mayó, Esou, Rebeka a dal paso pa hasi sigur ku Yakòb lo a haña e bendishon ei. Rebeka tabata sa ku esei tabata boluntat di Dios.—Génesis 27:1-17.

Kiko nos por siña for di Rebeka? Rebeka tabata modesto, trahadó i hospitalario. Debí na e kualidatnan akí, e tabata un ekselente esposa, mama i sirbidó di e Dios berdadero.

▸ Pa haña sa mas tokante Rebeka, wak e artíkulo “Mi Ke Bai.”

Rut

Ken Rut tabata? Rut tabata un moabita ku a laga su diosnan i su tera natal pa el a bai sirbi Yehova na Israel.

Kiko Rut a hasi? Rut tabata stima su suegra, Noemí, masha hopi mes. Noemí ku su kasá i nan dos yu hòmbernan a bai biba na Moab debí na un hamber severo ku tabatin na Israel. Despues, e yunan a kasa ku dos moabita, Rut i Orfa. Sinembargo, ku tempu Noemí su kasá i Noemí su yu hòmbernan a muri, i e tres biudanan a keda atras.

Noemí a disidí di bai Israel bèk, pasobra e temporada di sekura a pasa. Rut i Orfa kier a bai ku Noemí, pero Noemí a bisa nan pa bolbe serka nan famia. Orfa a hasi esei. (Rut 1:1-6, 15) Sinembargo, Rut lealmente a keda huntu ku su suegra. El a stima Noemí masha hopi i e kier a adorá e Dios di Noemí, Yehova.—Rut 1:16, 17; 2:11.

Rut tabata un bon nuera i un muhé trahadó, p’esei, el a haña bon reputashon den e pueblo di Noemí na Herúsalèm. Boas, un hòmber riku i doño di tereno, a keda asina impreshoná ku Rut ku generosamente el a perkurá kuminda pa Rut i Noemí. (Rut 2:5-7, 20) Ku tempu, Rut a kasa ku Boas. Asina Rut a bira antepasado di Rei David i Hesukristu.—Mateo 1:5, 6, 16.

Kiko nos por siña for di Rut? Rut tabata dispuesto pa bandoná su pais i su famia, pasobra el a stima Noemí i Yehova. E tabata un muhé trahadó, deboto i leal, asta den situashon difísil.

▸ Pa mas informashon tokante Rut, wak e artíkulo “Unda Ku Bo Bai, Lo Mi Bai” i “Un Muhé Ekselente.”

Sara

Ken Sara tabata? Sara tabata esposa di Abraham i mama di Isak.

Kiko Sara a hasi? Sara a laga un bida kómodo den e stat Ur atras, pasobra e tabatin fe den e promesa ku Dios a hasi na Abraham, su esposo. Dios a bisa Abraham pa e sali for di e stat Ur i bai Kanan. Dios a primintí di bendishon’é i hasié un nashon grandi. (Génesis 12:1-5) Probablemente, Sara tabatin rònt di 60 aña e tempu ei. Djei padilanti, Sara i su kasá a biba den tènt i a bai di un lugá pa otro.

Aunke e tipo di bida ei tabata peligroso pa Sara, Sara a apoyá Abraham segun ku Abraham tabata sigui guia di Dios. (Génesis 12:10, 15) Pa hopi aña, Sara no por a haña yu, loke a hasié masha tristu. Tòg, Dios a primintí di bendishoná Abraham su desendientenan. (Génesis 12:7; 13:15; 15:18; 16:1, 2, 15) Ku tempu, Dios a laga Sara sa ku lo el a haña un yu ku Abraham. Sara a haña un yu den su behes. E tabatin 90 aña i su esposo tabatin 100 aña. (Génesis 17:17; 21:2-5) Nan a yama e yu Isak.

Kiko nos por siña for di Sara? E ehèmpel di Sara ta siña nos ku semper Dios ta kumpli ku su promesanan, asta ora esei por parse imposibel! (Hebreonan 11:11) Ademas, Sara su ehèmpel komo esposa ta resaltá e importansia di mustra rèspèt den matrimonio.—1 Pedro 3:5, 6.

▸ Pa mas informashon tokante Sara, wak e artíkulo “Un Muhé Bunita” i “Dios A Yam’é ‘Prinsesa.’”

Yael

Ken Yael tabata? Yael, un muhé no-israelita, tabata esposa di Heber. Ku kurashi Yael a apoyá e pueblo di Dios.

Kiko Yael a hasi? Yael tabata desididu ora Sísara, hefe di e ehérsito kananeo, a bini na su kampamentu. Sísara a pèrdè e bataya kontra Israel i awor e tabata buska un lugá pa skonde i sosegá. Yael a invit’é bini den su tènt. Miéntras Sísara tabata drumí, Yael a mat’é.—Huesnan 4:17-21.

Loke Yael a hasi a kumpli ku loke Débora a profetisá: “Señor lo bende Sísara ku un muhé.” (Huesnan 4:9) P’esei, Yael a ser elogiá komo “esun di mas bendishoná di e muhénan.”—Huesnan 5:24.

Kiko nos por siña for di Yael? Yael a tuma inisiativa i tabatin kurashi. Su ehèmpel ta mustra ku Dios por hasi loke sea ta nesesario pa profesia kumpli.

Yézabèl

Ken Yézabèl tabata? Yézabèl tabata esposa di e rei di Israel, Akab. Yézabèl no tabata israelita ni adoradó di Yehova. E tabata adorá Baal, un dios kananeo.

Kiko Yézabèl a hasi? Reina Yézabèl tabata un muhé dominante, malbado i violento. Fuera di promové adorashon na Baal, el a promové inmoralidat seksual, loke tabata forma parti di e adorashon ei. Ademas, el a purba di kaba ku adorashon na Yehova, e Dios berdadero.— 1 Reinan 18:4, 13; 19:1-3.

Yézabèl tabata gaña i asesiná hende pa haña loke e tabata ke. (1 Reinan 21:8-16) Manera Yehova a bisa, Yézabèl a muri na un manera violento i e no a ser derá.—1 Reinan 21:23; 2 Reinan 9:10, 32-37.

Kiko nos por siña for di Yézabèl? E ehèmpel di Yézabèl ta un spièrtamentu pa nos. E tabata asina korupto i kruel ku su nòmber a bira símbolo di un muhé inmoral, sinbèrgwensa i sin rèspèt pa outoridat.