Kon Mi Por Haña Sa Kua Ta e Religion Berdadero?

TOKA NA

E kontesta ku Beibel ta duna

Pa yuda nos haña sa ken tin e religion berdadero, Beibel ta usa e siguiente ilustrashon: “Na nan fruta boso lo rekonosé nan. Akaso hende sa piki drùif for di mata di sumpiña òf figu for di mal yerba?” (Mateo 7:16) Ta fásil pa bo mira e diferensia entre un mata di wendrùif i un mata di sumpiña. Asina tambe bo por distinguí religion berdadero for di religion falsu si bo wak e siguiente frutanan òf karakterístikanan.

E religion berdadero ta siña e bèrdat basá riba Beibel, no idea di hende. (Huan 4:24; 17:17) Esaki ta inkluí e bèrdat tokante alma i e speransa di biba pa semper den paradeis riba tera. (Salmo 37:29; Isaías 35:5, 6; Ezekiel 18:4) Ademas, e religion berdadero lo no keda sin saka na kla religion falsu.—Mateo 15:9; 23:27, 28.
E religion berdadero ta yuda hende konosé Dios i sa su nòmber, Yehova. (Salmo 83:18; Isaías 42:8; Huan 17:3, 6) E no ta siña ku Dios ta un persona ku ta keda leu di hende òf ta misterioso, mas bien e ta siña ku Dios ke pa nos tin un amistat kuné.—Santiago 4:8.
E religion berdadero ta mustra ku salbashon ta posibel solamente pa medio di Hesukristu. (Echonan 4:10, 12) Su miembronan ta obedesé e mandamentunan di Hesus i ta hasi nan esfuerso pa sigui Hesus su ehèmpel.—Huan 13:15; 15:14.
E religion berdadero ta focus riba e Reino di Dios komo e úniko speransa pa humanidat. Su miembronan ta konta otro hende tokante e Reino.—Mateo 10:7; 24:14.
E religion berdadero ta demostrá amor sinsero. (Huan 13:35) E ta siña hende pa respetá tur rasa, kultura, idioma i background. (Echonan 10:34, 35) Komo ku su miembronan stima tur hende, nan no ta bai guera.—Mikéas 4:3; 1 Huan 3:11, 12.
E religion berdadero no tin klero ku salario, i no ta usa títulonan pa su miembronan.—Mateo 23:8-12; 1 Pedro 5:2, 3.
E religion berdadero ta keda neutral i no ta mete den asuntu polítiko. (Huan 17:16; 18:36) No opstante, miembronan di e religion berdadero ta respetá i obedesé gobièrnu, i ta sigui e mandamentu bíbliko: “Duna Sésar loke ta di Sésar, ma Dios loke ta di Dios.”—Marko 12:17; Romanonan 13:1, 2.
E religion berdadero ta un manera di biba, no ta djis un ritual òf formalidat. Su miembronan ta sigui e normanan haltu di Beibel den nan bida. (Efesionan 5:3-5; 1 Huan 3:18) Tòg nan no ta mir’é komo un karga, mas bien nan ta kontentu di por sirbi “e Dios felis.”—1 Timoteo 1:11.
Esnan ku ta praktiká e religion berdadero no ta hopi. (Mateo 7:13, 14) Hopi bes hende ta menospresiá, hasi bofon i persiguí nan pa motibu ku nan ta hasi e boluntat di Dios.—Mateo 5:10-12.

No skohe un religion djis pasobra e ta hasi bo sinti bon

Ta peligroso pa skohe un religion djis pasobra e ta hasi bo sinti bon. Beibel a profetisá ku hende “lo rondoná nan mes ku maestronan [religioso] ku ta konta nan loke nan tin gana di tende.” (2 Timoteo 4:3) Di otro banda, Beibel ta animá nos pa sigui e religion “ku ta limpi i sin mancha for di e punto di bista di nos Dios i Tata,” asta si e religion ei ta mal mirá.—Santiago 1:27; Huan 15:18, 19.