Kiko e Tribulashon Grandi Ta?

TOKA NA

E kontesta ku Beibel ta duna

E tribulashon grandi lo ta e periodo di mas difísil ku humanidat lo eksperensiá. Segun profesia di Beibel, esaki lo sosodé durante “e último dianan,” òf “e tempu di fin.” (2 Timoteo 3:1; Daniel 12:4) Lo e bai ta “un tribulashon manera no a yega di sosodé nunka, for di prinsipio di Dios su kreashon te ku awor, i ku lo no sosodé nunka mas tampoko.”—Marko 13:19; Daniel 12:1; Mateo 24:21, 22.

Susesonan durante e tribulashon grandi

Destrukshon di religion falsu. Den un ratu di ora religion falsu lo ser destruí. (Revelashon 17:1, 5; 18:9, 10, 21) Ta e podernan polítiko ku ta ser representá pa Nashonnan Uní lo hasi esei i asina kumpli ku e boluntat di Dios.—Revelashon 17:3, 15-18. a
Atake riba religion berdadero. Un koalishon (òf grupo) di nashonnan, ku e vishon di Ezekiel ta yama “Gòg di tera di Magòg,” lo purba di eliminá esnan ku ta pertenesé na e religion berdadero. Sinembargo, Dios lo protehá su sirbidónan.—Ezekiel 38:1, 2, 9-12, 18-23, Beibel Santu.
Humanidat ta ser husgá. Hesus lo husga humanidat i “lo e separá hende for di otro, meskos ku un wardadó ta separá karné for di kabritu.” (Mateo 25:31-33) Hesus lo basa su sentensia riba e echo ku si un hende a apoyá Hesus su “rumannan,” esta, esnan ku lo goberná kuné den shelu.—Mateo 25:34-46.
Reunimentu di esnan ku lo goberná ku Hesus den shelu. Hende fiel ku Dios a skohé pa goberná ku Kristu lo finalisá nan bida riba tera i lo ser resusitá pa biba den shelu.—Mateo 24:31; 1 Korintionan 15:50-53; 1 Tesalonisensenan 4:15-17.
Armagedon. “E guera ku lo tuma lugá riba e gran dia di Dios, e Todopoderoso” ta ser yamá tambe “e dia di Yehova.” (Revelashon 16:14, 16; Isaías 13:9; 2 Pedro 3:12) Hende ku Kristu a kondená lo ser destruí. (Sofonías 1:18; 2 Tesalonisensenan 1:6-10) Esaki ta inkluí destrukshon di e sistema polítiko rònt mundu ku Beibel ta pinta komo un bestia salbahe ku shete kabes.—Revelashon 19:19-21.

Susesonan despues di e tribulashon grandi

Satanas i su demoñonan ta ser enkarselá. Un angel poderoso lo tira Satanas i su demoñonan “den e abismo.” Ei nan lo keda den un estado inaktivo ku ta paresido na morto. (Revelashon 20:1-3) Ta komo si fuera Satanas lo ta den prizòn; lo e no por influensiá niun hende.—Revelashon 20:7.
E Mil Aña ta kuminsá. E Reino di Dios lo kuminsá su reinado di 1000 aña i lo trese bendishonnan grandi pa humanidat. (Revelashon 5:9, 10; 20:4, 6) “Un multitut grandi” ku ningun hende no por konta lo “sobrebibí e tribulashon grandi” pa mira e kuminsamentu di e Mil Aña.—Revelashon 7:9, 14; Salmo 37:9-11.

a E buki di Revelashon ta yama religion falsu “Babilonia e grandi” i “e gran prostituta.” (Revelashon 17:1, 5) E bestia salbahe kolo kòrá bibu, ku lo destruí Babilonia e grandi, ta un símbolo di e organisashon ku tin e propósito pa uni i representá tur e nashonnan di mundu. Na promé instante, e organisashon ei tabata yama Liga di Nashonnan i awor e ta Nashonnan Uní.