1. Ngera uchul me ke kmal oba omereng el saul el kirir a rechad el meklou a rengrir?

 KID el rokui el soad sel lolecholt a kllourreng a rechad el bedul kid. Kede respect er tirke el sebechir el mengiil e diak el bo leseselk a rengrir. Kede kmal oba omereng el saul sel deruul a cheleuid e te oba kllourreng el bedul kid. Kede dirrek el kmal oba omereng el saul le ngike el chad el milsuub lobengked a mle klou a rengul lolisechakl er kid e ngosukid el mo kongei e oltaut a osisechakl er a Biblia. A ngaruchei er ngii, kede kmal oba omereng el saul el Jehovah oba kllourreng el bedul kid!​—Rom 2:4.

2. Chelsel a ngera el blekeradel e nglocha mo meringel er kid olecholt er a kllourreng?

² Me alta ngkmal soad a rechad el meklou a rengrir me nguaisei, nglocha diak lebeot er kid olecholt er ngii. El ua tiang, nglocha meringel er kid a melemolem el chelellakl a rengud sel de stuck er a traffic, tokubets a lsekum kede mla mo meoud. Nglocha diak el sebeched lorekedii a rengud sel bo lechecherd a rengud. Me a lebebil e nglocha mo meringel er kid el melemolem el mengiil er a telbilel a Jehovah er a beches el blekeradel. Kau, ngsoam el lmuut el mo klou a rengum? Ngar tia el suobel e kede mo mesaod er a belkul a bo leklou a rengud, me a uchul me ngkmal klou a ultutelel a doruul el uaisei. Kede dirrek el mo mesaod aike el sebechel el ngosukid el lmuut el mo klou a rengud.

3. A chad el klou a rengul ngmo mekerang sel sekum e ngmo diak el soal a tekoi?

³ Molatk eua el rolel e ngsebeched el mo oba kllourreng. A kot, e a chad el klou a rengul a diak lemereched el ngmasech a rengul. Ngmelasem el melemolem el chelellakl a rengul sel bo lak el soal a tekoi me a lechub e ngsel bo el stress. A kot el taem  el debetik er a tekoi el ‘diak le mereched el ngmasech a rengul’ er a Biblia, e ngmesaod el kirel a Jehovah. Ngkmo a Jehovah a “Dios el mui er a blekokuii ma klechubechub, el diak le mereched el ngmasech a [rengul], e olecholt er a blechoel bltikerreng ma blakerreng.”​—Exo. 34:6.

4. Ngmo mekera chad el klou a rengul a lsekum e ngmo kirel el mengiil?

⁴ Ongerung, a chad el klou a rengul a chelellakl a rengul el mengiil. A lsekum a tekoi a mo meoud er sel lullatk er ngii, e ngmelasem el diak el bo el seselk a rengul. (Mt. 18:26, 27, BT) Ngbetok a blekeradel el kired el mo chelellakl a rengud el mengiil. El ua tiang, ngkired loba kllourreng el lorrenges er a chad el mengedecheduch, e diak doleb er ngii. (Job 36:1, 2) Kede locha dirrek el mo ousbech er a kllourreng lolisechakl er a study er kid el mo medengelii a belkul a osisechakl er a Biblia me a lechub e kede ngosuir el mo mesisiich er a diak lungil omeruul.

5. Ngera dirrek el ta er a rolel e kede olecholt er a kllourreng?

⁵ Ongedei, a chad el klou a rengul a diak di lemereched el mora tekoi. Nguaisei el bebil er a blekeradel e ngkired el mereched louedikel. Me nguaisei engdi a chad el klou a rengul a lsekum ngkirel meruul er a kmal klou a ultutelel el tekoi, e ngdiak di lemereched el mo rullii me a lechub e lorrechereched el meruul er ngii. E ngbai oterekeklii el kmo ngngar ngii a temel el melatk e melib er a bo loruul er ngii. E mengoit er a taem el mo ungil kutmeklii.

6. Ngmekera chad el klou a rengul sel lechebangel a ringel?

⁶ Ongeuang, a chad el klou a rengul a diak el complain sel loutekangel a ringel. Ngar chouai tiakid el blekeradel e a kllourreng uldak er a ducherreng. Me nguaisei ngdiak el mekngit a de share er a kmeed el sechelid a ringel el dengar ngii. Engdi a klou a rengul el chad a mora tkurrebab el sebechel loutekangel a ringel e melemolem el positive. (Kol. 1:11) Kid el  Kristiano kired lolecholt er a kllourreng er aika el rokui el rolel. E ngerang? Ka me dosaod a bebil er a uchul.

7. Ngua lolekoi a Jakobus 5:7, 8, ngera uchul me ngkmal klou a ultutelel a kllourreng? (Dirrek el momes er a siasing.)

⁷ A kllourreng a uchul a osebeled. Ngdi ua reblak a rengrir el mesiungel a Jehovah er a irechar, ngkired el melemolem el loba kllourreng el mengiil a otutel a telbilel. (Heb. 6:11, 12) Biblia omekesiu er a blekeradel el dengar ngii el mora chad er a sers. (Monguiu er a Jakobus 5:7, 8.) A chad er a sers a meringel loureor el melalem e melubs a dellemelel engdi ngdiak lodengei el kmo ngduubech er oingerang. Me ngoba kllourreng el mengiil, e oumerang el kmo ngmo meridm a dellemelel. Ngdi osisiu, kede melemolem el mechesang er a tekoi er a klereng, alta ngdiak dodengei el kmo a “Rubak er [kid] ngmei er choingeral sils.” (Mt. 24:42, BT) Kede oba kllourreng el mengiil lulterekokl a rengud el kmo a Jehovah mo otaut a rokui el telbilel er sel telutk el temel. A lsekum e ngmo diak doba kllourreng e ngsebeched el mo mesaul el mengiil e omuchel el loberius er a klemerang. Kede dirrek el locha mo meruul a tekoi el ngii a di uchul a deuil a rengud er chelecha el taem. Me nguaisei,engdi lsekum kede mo oba kllourreng, e ngsebeched loutekangel el mora ulebongel e suobel.​—Mik. 7:7; Mt. 24:13.

8. Ngmekera kllourreng e ngosukid er a deleuill er kid me a rechad? (Kolose 3:12, 13)

⁸ A kllourreng a ngosukid el mo ungil a deleuill er kid me a rechad. Ngngosukid el mo kerekikl lorrenges sel longedecheduch a rechad. (Jak. 1:19) Kllourreng a dirrek el melisiich er a budech. Ngomekerreu er kid me ngdiak di demereched el melekoi a diak lungil el tekoi sel de stress. E a lsekum e ngklou a rengud e ngdiak lemereched el ngmasech a rengud sel letemellii a rengud a chad. Ngdiak bo dolaitechei, e ngbai mo ‘ulserechakl a rengud, e mo kausubes a mlo mekngit er a delongeled.’​—Monguiu er a Kolose 3:12, 13.

9. Ngmekera kllourreng e ngosukid sel lebo el kired el meruul omelilt? (Osisechakl 21:5)

⁹ Kllourreng a dirrek el sebechel el ngosukid el mo ungil melilt. Ngdiak bo demereched el meruul omelilt e ngbai kede mengoit a taem el meruul a research e merriter a option er kid. (Monguiu er a Osisechakl 21:5.) El ua tiang, a lsekum kede osiik a ureor, e nglocha mo soad el di mereched el kongei er sel kot el offer el denguu, alta ngmo melemall er a omengull er kid el mora Jehovah. Me nguaisei engdi a lsekum e ngklou a rengud e kede mo mengoit a taem el merriter a tekoi el ua, tiang ngngar ker, ngera hours er ngii, me a ngera ngmo rullii el mora telungalek er kid me a deleuill er kid me a Jehovah. Sel leklou a rengud e ngdiak bo demekngit el melilt.

10. Ngmekera Kristiano e mo klou a rengul e melemolem el loba kllourreng?

¹⁰ Moluluuch lolengit er a kllourreng. A kllourreng a ta er a rodech er a reng. (Gal. 5:22, 23) Me ngsebeched el meluluuch lolengit er a chedaol reng e olengit er a Jehovah me lengesukid el mo omekeroul a rodech er a reng. A lsekum kede mo chobengelii a blekeradel el ngii a mo melasem er a kllourreng er kid, e ngsebeched el ‘melemolem lolengit’ er a chedaol reng me lengesukid el mo klou a rengud. (Lk. 11:9, 13, NW) Ngdirrek el sebeched lolengit er a Jehovah me lengesukid el mo omes er a blekeradel loba osengel. A uriul er a doluluuch e ngkired el mora tkurrebab el sebeched el mo olecholt er a kllourreng er a bek el sils.  Sel bo lebetok el di doluluuch el kirel a kllourreng e dolasem el mo klou a rengud, e a kllourreng a medalem er a rengud e mo blekerdeled.

11-12. Ngmekera Jehovah e mla ochotii a kllourreng?

¹¹ Molebedebek a kerebai er a Biblia. A Biblia betok a kerebai er ngii er a rechad el mle klou a rengrir. Sel dolebedebek aika el cheldecheduch el kirir e ngsebeched el suub a rolel e kede mo olecholt er a kllourreng. Uchei er a dosaod a bebil er tirka el kerebai e me dosaod er ngike el kot el ngarbab el kerebai er a kllourreng el Jehovah.

¹² Satan a ultubii a ngklel a Jehovah e millemall er a chisel, el Mengedereder loeak a bltikerreng e tabesul omerellel. A Jehovah dimlak di lemereched el mo okngemedii a Satan, e ngbai ulechotii a kllourreng me a ulserechakl el reng, e le ngmle medengei el kmo a taem a usbechall el mo omeketakl el kmo a omengederederel a kot el ungil. Omengiil er ngii a dirrek el luchul me ngkirel loutekangel otuub el mora ngklel. Me a lmuut kung, a kllourreng er a Jehovah mla mesterir a rebetok a techellir el mo nguu a diak a ulebengelel el klengar. (2 Pe. 3:9, 15) Tia uchul me a rebetok el miliol el chad a mla mo medengelii. Sel bo de focus er aike el klungiaol el ngar ngii le ngkllourreng er a Jehovah a uchul, e ngmo beot er kid el mengiil er a temel a ulebongel.

13. Ngmekera Jesus e cherrungel loukerebai er a kllourreng er a Demal? (Dirrek el momes er a siasing.)

¹³ A Jesus a cherrungel loukerebai er a kllourreng er a Demal, me ngii a ulechotii tia el blekeradel er a lengar tia el chutem. Nglocha dimlak el beot er ngii olecholt er a kllourreng, tokubets el bedul a resensei er a llach me a Refarisi. (Jn. 8:25-27) Engdi Jesus a kmal di ua Demal el meoud el ngmasech a rengul. Ngdimlak lolaitechei er a lolekoi a mekngit er ngii. (1 Pe. 2:23) Nguleba kllourreng el outekangel  a ringel e dimlak el complain. Sei a uchul me a Biblia melekoi er kid el kmo “molatk er ngikel uluutekangel a choua isel odechelakl er a re mekngit el chad.” (Heb. 12:2, 3) Ngoeak a ngelsuil a Jehovah e kid me ngdirrek el sebeched el outekangel a rokui el ringel el bo dechebangel.

14. Ngera sebeched el suubii er a kllourreng er a Abraham? (Hebru 6:15) (Dirrek el momes er a siasing.)

¹⁴ Engdi ngkuk mekerang a lsekum a ulebongel a dimlak el mei er a taem el dullatk el kmo ngmei? Kede locha millatk el kmo a ulebongel a mla mo irechar er a bo lekirel el mei. Kede bekikl el kmo ngdiak bo de chad el mo mesang. Ngera sebechel ngosukid el mo oba kllourreng el mengiil? Molatk er a kerebil a Abraham. A Abraham er a le 75 a rekil, el dirkak bo loungalek e a Jehovah tilbir el mo er ngii el kmo: “Ak mo meskau a betok el uldidellel a rsechem.” (Gen. 12:1-4) Me a Abraham, ngmilsa otutel tia el telbiil? Ngdi milsang a telkib er ngii. Uriul er a leiuul er a Omoachel Eufrates e ngmilengiil el 25 el rak e ngmechell a ngelekel er a Isak, e milengiil el lmuut el 60 el rak el mo meseterir a rengelekel a ngelekel er a Esau me a Jakob. (Monguiu er a Hebru 6:15.) Engdi ngika dimlak lesa ruldidellel a rsechel el mo betok e nguu a Beluu er a Nglat. Me nguaisei engdi ngika el luleba blakerreng el chad a mla er ngii a kmes el deleuill er ngii me a Ulemeob. (Jak. 2:23) E sel lebekiis er a kodall a Abraham e ngkmal mo dmeu a rengul el mo medengei el kmo a klaumerang me a kllourreng er ngii a mlo uchul a klengeltengat el mora rokui el chad! (Gen. 22:18) Ngera kede suubii? Nglocha diak bo deues a rokui el otutel a telbilel a Jehovah er chelechang. Me nguaisei engdi a lsekum kede mo oba kllourreng el ua Abraham, e ngsebechel mo ulterekokl a rengud el kmo a Jehovah mo omekngeltengat er  kid er chelechang me a lmuut el betok er a chelsel a telbiil el beches el blekeradel.​—Mk. 10:29, 30.

15. Ngera sebeched el meruul er ngii er a temel omesubed el di kid el tang?

¹⁵ Ngbetok a kerebai er a rechad el uleba kllourreng er a Biblia. (Jak. 5:10) Kau, ngsebechem el rullii a project er kau el mo mesuub el kirir? b El ua tiang, alta David a mlucheluch el mo king er a Israel er a ledirk ngeasek me nguaisei, ngmle kirel mengiil el betok el rak e mochu nguu a kleking. A Simeon me a Hana mle blak a rengrir el mengull er a Jehovah e mengiil er ngike el telbiil el Mesias. (Lk. 2:25, 36-38) Sel mosuub aika el cheldecheduch e mosiik a nger er aika el ker: Ngera ngilsuir ngika el chad el mo olecholt er a kllourreng? Ngera el klungiaol a lengilai le ngii lullechotii a kllourreng? Ngmekera sebechek loukerebai er ngii? Ngdirrek el sebechem el ngmai a klubelem er tirke el dimlak lochotii a kllourreng. (1 Sa. 13:8-14) Ngsebechem loker: ‘Ngera uchul me te mlo diak loba kllourreng? E ngera dilubech el mo er tir?’

16. Ngera bebil er a klungiolel a bo leklou a rengud?

¹⁶ Molatk a klungiolel a bo leklou a rengud. Sel leklou a rengud e ngchelellakl e dmeu a rengud. Me a kllourreng a ungil er a health er kid, el bedenged me a uldesued. Sel doba kllourreng el bedul a rechad e ngmo ungil a deleuill er kid me tir. A ongdibel a lmuut el meteketek a kltarreng er ngii. E a lsekum a chad a rullii a tekoi el diak el soad, e ngdiak lemereched el ngmasech a rengud, me a mondai a diak el lluut el mo klou. (Psa. 37:8; Osi. 14:29) Engdi ngaruchei er ngii, sel leklou a rengud e kede oukerebai er a Demad el ngar er a eanged, e lmuut el mo kmeed er ngii.

17. Ngera kired el rullii er a rengud el mo meruul er ngii?

¹⁷ Me a kllourreng a klebokel el blekeradel, e uchul a klungioled! Alta ngdiak leblechoel el beot er kid olecholt er a kllourreng, ngoeak a ngelsuil a Jehovah e ngsebeched el melemolem el meleketek er tia el blekeradel. Me chelecha el dongiil er a beches el blekeradel, e ngsebechel mo ulterekokl a rengud el kmo a “Jehovah a mengkar er tirke el meluu er ngii, tirke el mengiil er a diak lemengodech el bltikerreng er ngii.” (Psa. 33:18, NW) Mada derellii er a rengud el mo melemolem lolecholt er a kllourreng er a klengar er kid.