A klechubechub a moiuid el “duch er kid el sebeched el melebedebek er a tekoi el lengar ngii a chad e mo omelechesiu aike el lomelechesiu el ua de ngii.” A Dr. Rick Hanson el ngii a mesuub a uldesuir a rechad a kmo “a klechubechub a ngar er a chiuesed.”

MUTEBENGII TIANG: Ngera uchul me ngsebeched lolecholt er tia el blekeradel, el ngii a diak a ngii di el ngodech el bleob el sebechel lochotii? A Biblia smodii el kmo a rechad a rruul lokesiul a Dios. (Genesis 1:26) Tia belkul a kmo ngsebeched lolecholt a blekerdelel a Dios. Me a rechad sel lolecholt er a klechubechub e le sorir lolengeseu er a rebebil e te olecholt er a blekerdelel a Ulemeob er kid el Jehovah el Dios.​—Osisechakl 14:31.

A Dios a kmal chubkid e chetil lomes er kid el chuarm. A Biblia a mesaod el kirel a uldesuel a Dios er a lomes er a rechad er a Israel el sibai er a Ekipten e lekiei er a ked el 40 el rak. Ngdmu el kmo: “Ngmle meringel er ngii aike el rokui el ringelir.” (Isaia 63:9, NW) Mutebengii el kmo a Dios a dimlak di lodengei a ringelir ngdirrek el mle sebechel melechesiu. Ngdilu el kmo, “Ak kmal mla mo ungil medengei a rengelir.” (Exodus 3:7) Ngdmu el kmo, “Ngikel mo merutech er kemiu a rutechii a chelsul a medak.” (Sekaria 2:8) A rechad sel letemall a rengud e a Dios a dirrek el chuarm el obengked.

A Biblia olterekokl er a rengud el kmo alta kede mo omdasu el kmo ngdiak derredemelel a klechubechub er a Dios engdi “a Dios a lmuut el chubechubchad er a rengud e medengei a rokui el tekoi.” (1 Johanes 3:19, 20) A Dios a lmuut el ungil medengelkid er kid. Ngkmal ungil medengei a blekeradel el dechebangel, me a uldesued me a rengud. Ngchubechubechad.

 A Bades olterekokl a rengud

• “Sel bo moluluuch, e ak mo onger er kemiu. Me sel momekedong er ngak, mak mo onger.”​—ISAIA 58:9.

• “A RUBAK a kmo, ng di ngak el tang a ngar ngii a uldesuek el kiriu. Ng diak luldasu el kirel a mekngit e ng bai uldasu er a klungiaol el mourureng er ngii el kirel a ngar medad el klebesei. Isei e kom mo omekedong er ngak, e me meluluuch er ngak mak mo onger er kemiu.”​—JEREMIA 29:11, 12.

• “Iuechel a medak a ngar a record er kau. Ng diak le ngar a babier er kau?”​—PSALM 56:8.

Ngsebechel ngosukid loutekangel a ringel sel dodengei el kmo a Dios chubechubechad? Molatk er a experience er a Maria:

“A 18 a rekil el ngelekek el sechal er a loldechelakl er a rektel kasinoma el eru el rak e lemad e ngkmal mlo mekngit a renguk. Ak mlo omelechesiu el kmo a klengar a kmal meringel e diak el melemalt. Ngkmal mle kesib a renguk er a Jehovah le ngdimlak lomekungil er ngii!

“Elolem el rak er uriul e a sechelik er a ongdibel a kmal uleba bltikerreng me a blekokuii lorrenges er ngak er a kusaod el mo er ngii el kmo a Jehovah a diak lebetik a rengul er ngak. Uriul er a lorrenges er ngak el betok el sikang el diak loleb er ngak e ngdillii a bades el kmal riretechii a renguk. Ngmle 1 Johanes 3:19, 20, el melekoi el kmo: ‘Dios a lmuut el chubechubchad er a rengud e medengei a rokui el tekoi.’ Ngsilodii el kmo a Jehovah medengei a ringel el dechelebangel.

“Me nguaisei engdi ngdirk mle meringel er ngak a choitii a ngesechel a renguk! Ak chiliuii a Psalm 94:19 el kmo: ‘Sel lesal mo ouedikel a renguk, e ng kau a cholodak e rullii a renguk el mo ungil.’ Ak mlo omelechesiu el kmo tia el bades a milluches el kirek! Uriul e ngmlo mechelaod a renguk el mengedecheduch er a Jehovah el kirel a ringelek el medengei kmo, ngmo orrenges er ngak e medengei a tekoi el kumelechesiu.”

Ngkmal mechelaod a rengud sel dodengei el kmo a Jehovah ungil medengelkid e melechesiu a tekoi el dechelebangel! Me ngngera uchul me ngkmal betok a ringel? Ng Dios el omals er kid el kirel a kngtid? A Dios ngmo okngemed a rokui el ringel? Aika el ker a bo donger er aike el ongingil suobel.