1. Ngkirel el mo uangera uldesued el kirel a klaumerang er kid?

 NGDIAK el rokui el chad a ngar er ngii a klaumerang er tir. (2 Th. 3:2) Engdi Jehovah a mesterir a klaumerang tirke el rokui el mengull er ngii, e meruul er tiang el okiu a chedaol reng er ngii. (Rom 12:3; Gal. 5:22) Me kede kmal oba omereng el saul e le Ngii el mla meskid a klaumerang er kid!

2, 3. (a) Ngera mo klungioled sel bo doumerang? (b) E ngera el ker a bo dosaod?

² A Jehovah a kilengei er a betik er a rengul el Ngelekel el Jesus el mo mad, me bo el sebechir tirke el rokui el oumerang er ngii el musubes a kngterir. E tiang a dirrek el mesterir a techellir a rechad el mo sechelil a Jehovah, e mo kiei el mo cherechar. (Jn. 6:44, 65; Rom 6:23) Ngmera el ungil a omerellel a Jehovah el bedulkid! Alta e kede ngar er a klengit me kede rredemelel a mo mad, engdi ngdirk omes er kid el sebeched el meruul a ungil tekoi. (Psa. 103:10) Ngdirrek el ngilsukid el mo medengelii a ungil chais el kirel a Jesus me a tengetengel. Me sera domuchel el loumerang er a Jesus e bo doltirakl  er ngii, e ngmlo sebeched el omes el beduluchei el mo nguu a diak a ulebengelel el klengar!​—Monguiu er a 1 Johanes 4:9, 10.

³ Me ngera lmuut el sebeched el suub el kirel a klaumerang? Ngbelkul a kmo, kede mla mo oumerang sel bo dodengei aike el bla leruul a Dios el kired me aike el dirk bo loruul? Ka me bo desa el kmo, ngera lmuut el kired el meruul.

4. Ngera ngrullii er kid sel lebo er ngii a klaumerang er kid?

⁴ Sel doumerang er a Jehovah me a Jesus e ngdiak di bo dodengei aike el bla leruul me aike el dirk bo loruul e lungiang. Kede dirrek el kmal semeriar el kiei el blekerdelel a klengar er kid a oltirakl er a rolel a klengar el bla losisecheklid er ngii. Kede dirrek el semeriar el ngosuterir a rebebil el mo medengelterir el terung. A apostol el Paulus a dilu el kmo: “Ele lsekum ke dulii er a ngerem el kmo, ‘A Jesus a Rubak,’ e oumera er a chelsel a rengum el kmo a Dios a ulekisii er a kodall, e ke mo suobel. Ele chad a oumera er a chelsel a rengul, me ng muklemalt er medal a Dios, e melekoi a loumera el tekoi me ng suobel.”​—Rom 10:9, 10; 2 Ko. 4:13.

5. Ngera me ngkmal klou a ultutelel a klaumerang? E ngkired el mekerang me bo lemesisiich a klaumerang er kid? Mosaod.

⁵ Me ngbleketakl el kmo a lsoad el mo oldeu a rengud er a diak a ulebengelel el klengar er a chelsel sel beches el beluulechad er a Dios, e ngkirel ngar er ngii a klaumerang er kid, e kired el melemolem el melisiich er ngii. A klaumerang a ua dellomel. Ngkired el melemolem el melubs er ngii er a ralm me lolemolem el ungil a dbechel e lemukeroul. E le lsekum e ngdiak dolubs er ngii e ngmo merat e mad. Me ngdi osisiu, ngkired el melemolem el melisiich er a klaumerang er kid me “lultebechel” e lolemolem el “merael el mo klou.”​—Tit. 2:2; 2 Th. 1:3; Lk. 22:32; Heb. 3:12.

6. Ngera el eru el tekoi a losaod a Hebru 11:1 el kirel a klaumerang?

⁶ Ngar er a Hebru 11:1, BT e ngsmodii a belkul a klaumerang. (Monguiu.) (1) A klaumerang a “sel bo dulterekokl oumera ikel tekoi el dolatk.” Me a tekoi el dolatk a uldimukl er a telbilel a Dios el kirel a ngar medad. El ua tiang, ngulterekokl a rengud el kmo ngmo nguemed a rokui el klengit e dirrek el mo er ngii a beches el beluulechad. (2) A klaumerang a sel bo ‘dulterekokl medenge ikel tekoi el diak le meues.’ Me kede ungil medengei el kmo a Jehovah el Dios me a Jesus Kristus me a rechanghel me a Renged a mera el ngar er ngii el ngar er a eanged, alta e ngdiak el sebeched el mesterir. (Heb. 11:3) Me kede mekerang e ochotii a klaumerang er kid er a telbilel a Dios me a tekoi el diak el sebeched el omes? Ngmo bleketakl el okiu a rolel a klengar er kid me a tekinged me a omerelled.

7. Ngmekerang a kerebil a Noah, e ngosukid el mo medengelii a belkul a lebo er ngii a klaumerang er kid? (Momes er a siasing er a uchelel a suobel.)

⁷ Ngera kede suubii er a Noah el kirel a klaumerang? A apostol el Paulus a dilu el kmo, a Noah er “ser a losubed er ngii a Dios er a tekoi el kirel a ngar medad el klebesei, e ng ulerrenges me ng mlo meruul er a arhe el olsobel er ngii ma re chad er a blil.” (Heb. 11:7) Me ngokiu a klaumerang er ngii er a tekingel a Jehovah e ngtileketekii a klou el arhe. Me a rechad el kiliei er bita er ngii a locha uleker er a uchul me ngmeruul er a arhe. Me ngulterekokl a rengud el kmo a Noah a dimlak di lluk. E le Biblia a mesaod er ngii el kmo, ngii “ngikel omerk ra llemalt.” (2 Pe. 2:5, BT) Me ngmilengelechel er a rechad el kmo a Dios a mo otengelii a ieleb el olekngemed er a remekngit el chad. Me nglocha dilu aike el tekoi el Jehovah a dilu er ngii el kmo: “Ak mla tibir er a renguk el mo olekngemed er a re chad er a beluulchad. Ak di mo okngemedeterir el diak a mo  medechel, ele beluulchad a mio er a mekngit el omerellir,” e dirrek el dilu el kmo: “Ak mo odureklii a eeleb el mor a chutem el mo olekngemed a rokui el outeliil. A rokui el ngar ngii er a chutem a mo mad.” Me a Noah a ulterekokl el uluuchais er a rechad er sel rolel e ngsebechir el mo suobel. Me a Jehovah a milengelechel er a Noah el kmo: ‘Bo mdiderekl er a diall.’​—Gen. 6:13, 17, 18.

8. Ngera omesodel a Jakobus el kirel a klaumerang?

⁸ A Jakobus a dirrek el milluches el kirel a klaumerang. Nglocha milluches er a telkib el uriul er a loluches er a babilengel a Paulus el mo er a rechad er a Hebru. Me a Jakobus a milluches el kmo: “Ka mochotii er ngak el kmo ng mekera chad a loumerang e lak lecholt er omerellel. E ngak a mo ochotii er kau el kmo ak uumerang el oeak a omerellek.” (Jak. 2:18) Me ngmilsaod el kmo a klaumerang a diak di loeak sel bo doumerang e lemerekong. E le remekngit el anghel me te dirrek el oumerang el kmo ngmera el ngar er ngii a Dios, engdi ngdiak loumerang er a Jehovah. Te bai kmal mesisiich el omtok er ngii. (Jak. 2:19, 20) Me a lmuut el tang, a chad el oumerang a mo oldeu er a rengul a Dios el okiu a ungil el ureor me a ungil el omeruul. E tiaikid a lurruul er ngii a Abraham. A Jakobus  a milluches el kmo: “Ng milekera ucheled el Abraham e mo ungil er a rengul a Dios? Ng uleak omerellel er a lodersii a ngelekel el Isak er bebul a olengetongel. Me ng diak mosang? Ng uluumerang e chilolt er omerellel. Me ng mlecherrungel el oumerang el omerellel a uchul.” Me a Jakobus a millisiich er a tekoi el kmo a klaumerang el diak a omerellel a diak a ultutelel er a ledu el kmo: “Kede ua bedengel a chad el ulekoad, a doumerang e lak a ngeral de rellii el olechotel.”​—Jak. 2:21-23, 26.

9, 10. Ngera belkul a bo doumerang er a Ngalek?

⁹ Ngar er a bekord el 30 el rak er a uriul, e a Johanes a milluches er a Ebangkelio me a lmuut el edei el babier. Ngikang a di ua rebebil el milluches er a Biblia el mle ungil medengelii a belkul a klaumerang. Me ngmle betok el taem el loluches el uluusbech er a tekoi er a Grik el moiuid a lebebil er a taem el “ngikel oumera” el tekoi er a Merikel.

¹⁰ A Johanes a milsaod el kmo: “Ngikel oumera er a Ngalek oba diak a ulebengelel klengar; e ngikel diak lorrenges er a Ngalek a diak loba klengar; ng bai di mo obals er a Dios el diak a ulebengelel.” (Jn. 3:36) Me a lsoad el mo oumerang er a Ngalek, e ngkmal kired el mo olengesenges er a Jesus. E le ngokiu a tekoi el lulluches a Johanes, e kede mo medengei el kmo a Jesus a mle blechoel el melekoi el kmo a lsoad el mo nguu a diak a ulebengelel el klengar e ngkired el mo oumerang er ngii me a Demal.​—Jn. 3:16; 6:29, 40; 11:25, 26; 14:1, 12.

11. Kede mekerang e ochotii a omereng el saul er kid el mo er a Jehovah el uchul me kede mlo medengelii a klemerang?

¹¹ A Jehovah a ousbech er a chedaol reng er ngii el ngosukid el mo medengelii a klemerang el kirel ngii me a Ngelekel e dirrek el ngosukid el mo oumerang er tir. (Monguiu er a Lukas 10:21.) Me kede mekerang e ochotii a omereng el saul er kid el kirel aike el rokui el bla leruul a Jehovah el kired? Ngkmal diak el kired el meterob el mereng a sulel el kilengei me ngmo er ngii a deleuill er kid lobengkel el okiu a Jesus el ngike el “doumera er ngii er a uchul el mor a ulebongel.” (Heb. 12:2) Ngdirrek el kired el melemolem el melisiich er a klaumerang er kid el okiu sel deblechoel el meluluuch el mo er a Jehovah e dosuub er a Tekingel.​—Efe. 6:18; 1 Pe. 2:2.

12. A klaumerang er kid, ngrullid el mo mekerang?

¹² Ngkirel a omerelled el melemolem el meketeklii el kmo ngmesisiich a klaumerang er kid el kirel a telbilel a Jehovah. El ua tiang, ngkired el melemolem el olisechakl er a rechad el kirel a Rengedel a Dios e dirrek el ngosuterir me te mo disaiplo er a Jesus. Ngdirrek el kired el melemolem el meruul “a ungil el mor a re bek el chad, e a ngar uchei e doruul el mor tirkel bebil er kid el oumerang.” (Gal. 6:10) E dirrek el kirel el mo blak a rengud el ‘medebedii el mo mecherei sel di mla klengar er kid el obengkel a omerellel’ e le ngdiak el soad el mecherei a ngii di el ngerang me letemellii a klausechelei er kid me a Jehovah.​—Kol. 3:5, 8-10.

13. Ngua ngera klungel a ultutelel a klaumerang er kid er a Dios? E ngera omesodel a Biblia el kirel? E ngera uchul?

¹³ A Biblia a mesaod el kmo: “Ng diak a chad el diak loumerang e sebechel el odeuir a rengul a Dios, ele ngii di le chad el mor a Dios a kirel el oumerang el kmo ng ngar ngii a Dios, e ngii a omesterir omeksullir tirkel osiik er ngii.” (Heb. 11:6) Ngdirrek el smodii el kmo a ‘klaumerang er a Dios’ a ta er a kot el klou a ultutelel el tekoi el kirel a Kristiano el obang, e le tiang a dirrek el tedebechel a uchetemel a klaumerang er ngii. (Heb. 6:1) Me a ungil deleuill er kid me a Jehovah a sebechel el melemolem el diak di lultuil er a klaumerang er kid e lemerekong, e kede dirrek el ousbech a lmuut el bebil er a ungil blekeradel el mo smisichii.​—Monguiu er a 2 Petrus 1:5-7; Jude 20, 21.

14, 15. Ngua ngera klungel a ultutelel a klaumerang sel domekesiu er ngii er a bltikerreng?

 ¹⁴ A remilluches er a Biblia a milsaod er a klaumerang el betok el taem er a bebil el blekerdelel a chad. Me tiang, ngbelkul a kmo a klaumerang a kot el klou a ultutelel el tekoi el kired el obang?

¹⁵ A Paulus a ulemekesiu er a klaumerang el mo er a bltikerreng, er a loluches el kmo: Chomko ak “oumerang me ng sebechek el ngmukl a rois, e ngdi diak a bltikerreng er ngak, e ng diak a ultutelek.” (1 Ko. 13:2) E a Jesus a dilu el kmo: “A kot el ngarbab el llach” a sel bo lebetik a rengud er a Dios. (Mt. 22:35-40) Me a bltikerreng a ngosukid el mo meduch el oltaut a lmuut el bebil el ungil blekeradel el ngii a odeuir a rengul a Dios. E a Biblia a mesaod el kmo a bltikerreng a “oumera rokui el tekoi.” Me a bltikerreng a smisichii a klaumerang er kid me a lechub e ngrullid el mo oumerang a rokui el tekingel a Dios el ngar er a Biblia.​—1 Ko. 13:4, 7.

16, 17. Ngera omesodel a Biblia el kirel a klaumerang me a bltikerreng? E ngera er ngii a klou a ultutelel, e ngera uchul?

¹⁶ Me a klaumerang me a bltikerreng a dul meklou a ultutelel el blekeradel, e a remilluches er a Biblia a blechoel el mesaod aika el eru el tekoi el dmak. Me a Paulus a millisiich er a rudam er ngii el mo ‘ultebechel a uldesuir el oumerang e betik a rengrir er a Dios.’ (1 Th. 5:8) E a Petrus a milluches el kirel a Jesus el kmo: “Ng dirkak mesang e betik a rengmiu er ngii, e diak mesang er chelechang e oumerang er ngii.” (1 Pe. 1:8) Me a Jakobus a dilu er a rengellitel el odam er ngii el kmo: “A Dios a millilt er a re mechebuul er tial beluulchad el mo mesisiich el oumerang er ngii e mo ngma dikesir er a rengedel el le dilu el kmo ng mo omesterir tirkel betik a rengrir er ngii.” (Jak. 2:5) Me a Johanes a milluches el kirel a llechul a Dios el kmo: “Bo doumerang er a Ngelekel el Jesus Kristus e le betik a rengud er a ta ma tang el di ua ikel le dilu Kristus.”​—1 Jn. 3:23.

¹⁷ Engdi a Paulus a dirrek el milluches el kmo: “Me chelechang e ng edel tekoi a melemolem: kedoumerang, e melatk e mengiil, e oubltikerreng, e a kot el ngar uchei er a ikang a doubltikerreng.” (1 Ko. 13:13) Me a ngar medad el taem e ngmo diak dousbech er a klaumerang er kid el kirel a telbilel a Dios el kirel a beches el beluulechad, e le ngmla mo tmaut ngii el telbiil. Me kede mo kiei er a chelsel a klebokel el beluulechad el lulsaod er ngii a Biblia. Engdi ngar er a chelsel e ngdirk kired el olecholt er a bltikerreng el mo er a Dios me a rechad. E a bltkil a rengud el mo er tir a mukeroul el diak a ulebengelel.

18, 19. Ngera mla obeketakl e le rechedal a Dios er chelechang a oumerang er ngii? E techang a rredemelel a odanges?

¹⁸ Me a rechedal a Jehovah er chelechang a oumerang er a Rengedel a Dios e dirrek el oureor el olengeseu er ngii, e kaubltikerreng er a delongelir. Te meruul el uaisei e le tir el kongei er a chedaol reng er a Dios me ngomekrael a klengar er tir. (Gal. 5:22, 23) Me ngerang a olechotel? Te ngar er ngii a betok er a 8 el miliol el rudam me a rudos el meliuekl er a beluulechad el dmak el ngar er a ongdibel er tir el ngar er a kltarreng me a budech. Me ngkmal bleketakl el kmo a klaumerang me a bltikerreng a kot el mesisiich el tekoi!

¹⁹ Me tia el kltarreng a mo sebechel el meketmokl el di okiu a ngelsuil a Dios er kid. Me ngii a kmal rredemelel a odanges. (Isa. 55:13) Me kede kmal oba omereng el saul e le ngmla meskid a techelled el mo ‘suobel ele kede oumera er ngii.’ (Efe. 2:8) A Jehovah a mo melemolem el olengeseu er a rebetok el mo oumerang er ngii. E di kmedung e tia el beluulechad a mo mui er a remecherrungel e melemalt e dmeu a rengrir el chad el tir a mo oldanges er a Jehovah el mo cherechar!