“Ngkmal direkak a chad el mengedecheduch el ua longedecheduch ngiil chad.”​—JOHANES 7:46.

1. Ngmle ua ngerang a uldesuir a rechad el kirel a blekerdelel a osisecheklel a Jesus?

 KA MOLEBEDEBEK el kmo ngmlo ua ngerang a deuil a rengud a dulerrenges a osisecheklel a Jesus! A Biblia a ochotii er kid a tekoi el rirellii el mo er a rechad el lulengedecheduch er tir. El di ua tiang, a Lukas a ouchais el kmo a rechad el kiliei er a belual a Jesus a mle “mechas a rengrir era ikel tekoi ra grazia el tuobed ra ngerel.” A Matteus a mesaod el kmo tirke el ulerrenges er a osisecheklel a Jesus el ngar er a Rois “a kmal kilebetiekl er chosisecheklel.” A Johanes a kuk melekoi el kmo a rebulis el mlodurokl el mlo omdechem er a Jesus a liluut el mo remei el dimlak lobang e melekoi el kmo: “Ngkmal direkak a chad el mengedecheduch el ua longedecheduch ngiil chad!”​—Lukas 4:22; Matteus 7:28; Johanes 7:46.

2. Ngera el rolel a osisechakl a luluusbech a Jesus?

² Tirke el bulis a dimlak el cheleuid. Ele Jesus a ulterekokl el kot el ngar er a bab el Sensei el mla chad. A osisecheklel a mle bleketakl e beot e meringel el domtok. Ngmle dachelbai el ousbech a okesiu me a ker. Ngmeldelodech a osisecheklel el mo atter er a rechad el longedecheduch er tir, a lengar er a bab a deruchellir me a lak. A klemerang el lullisechakl a mle beot el bo lodengelii a rechad engdi ngkmal mle meklou a ultutelel. Ngdi aika el tekoi a dimlak di el aikaikid e rellii a Jesus el mlo klou el Sensei.

A Bltikerreng a Kot el Klou a Ultutelel el Blekeradel

3. Ngmilekerang a Jesus e mle ileakl er tirke el mengeteklel a klechelid er sel taem er ngii er a rolel a osisecheklel?

³ Ngar er a delongelir a rechellimosk me a Refarisee, e ngulterekokl el mla er ngii a remellomes a rengrir el chad el mla er ngii a klemedengei er tir me a duch er tir el ousbech er ngii el klemedengei. Ngera rirellii sel rolel a lolisechakl a Jesus me ngmle ileakl er a osisecheklir? A remengeteklel a klechelid er seikid el taem a dimlak a bltikerreng er tir el mo er a redi chad. Te bai uluuketui er tir e ulemes er tir el ua le “delebeakl.” (Johanes 7:49) Engdi a Jesus a bai mle chubteterir e le ngulemes er tir el ua “ikel diak chomekang el sib, me ngmechitechetong me ngblengkangk.” (Matteus 9:36) Ngmle betik a rengul e chubteterir e ullecholt a blekokuii el mo er tir. A remengeteklel a klechelid a dirrek el dimlak a mera el bltikerreng er tir el mo er a Dois. (Johanes 5:42) Engdi Jesus a mle betik a rengul er a Demal e mle dmeu a rengul el meruul a soal. A remengeteklel a klechelid a milengeuid a tekingel a Dios el di kirel a  klungiolir engdi a Jesus a mle betik a rengul er a “tikingel a Dios” me ngullisechakl er ngii e milsaod er ngii e mesebechakl er ngii e kiliei el oltirakl er ngii. (Lukas 11:28) Chochoi a bltikerreng a childerderii a klechad er a Jesus, me ngulemtebechel a tekoi el lolisechakl me a blekerdelel el mo er a rebebil er a rechad me a rolel a osisecheklel el mo er tir.

4. Ngera uchul me ngklou a ultutelel a dolisechakl el oba bltikerreng?

⁴ E kid a kuk mekerang? A doltirakl er a Kristus e ngsoad el mo oukerebai er ngii er a chelsel a omesiunged me a klechad er kid. (1 Petrus 2:21) Me seikid, e a moktek er kid a diak el di el soad el ouchais a klemedengei el ngar er a Biblia, e ngbai soad el dirrek el olecholt aike el ungil el blekerdelel a Jehovah, el ileakl er ngii a bltikerreng. Me a leklou a klemedengei er kid me a lechub e di el kekerei, me a leklou a duch er kid el olisechakl me a lechub e di el kekerei, engdi sel bltikerreng el dolecholt er ngii a sebechel el mo remutech a rengrir a rechad el domerk a klumech el mo er tir. Me a debo dungil er tia el urered er a omeruul el disaiplo, e kede melasem el oukerebai er a Jesus e olisechakl el oba bltikerreng.

5. Me a dolisechakl, e ngera uchul me a klemedengei me a duch a meklou a ultutelel?

⁵ Ngulterekokl el bo dungil el sensei e kede ousbech a klemedengei er a tekoi me a duch el sebeched el oltobed ngii el klemedengei. A Jesus a ngilsuterir a redisaiplo er ngii el mo ngmai aika el erung, e a Jehovah el oeak a cheldebechelel a ngosukid er a chelecha el sils el mo meruul el uaisei. (Monguiu er a Isaia 54:13; Lukas 12:42.) Me nguaisei, engdi ngkired el melasem el mo olisechakl el diak di dousbech a uldesued el merekong e kede dirrek el ousbech er a rengud. Sel sekum a klemedengei me a duch me a bltikerreng a dmak el oureor, e a tekoi el mo duubech a mo uchul a klou el deurreng. Ngoeak a ngera el rolel e ngsebeched el olecholt a bltikerreng er kid sel dolisechakl? Ngmilekerang a Jesus me a redisaiplo er ngii er a loruul el uaisei? Ka me bo domes.

Ngkired el Betik a Rengud er a Jehovah

6. Ngmekerang a dosaod el kirel a chad el betik a rengud er ngii?

⁶ Kid a ungil a rengud el mesaod a tekoi el soad. Sel dosaod a tekoi el kmal soad, e a teletelel a dongedecheduch me a klikm er kid a mo olecholt er a klemeriarreng er kid me a bltkil a rengud el kirel ngii el tekoi. E ileakl el sel dosaod el kirel a chad el betik a rengud er ngii. Kede blechoel el semeriar el ouchais er a rebebil aike el dodengei el kirel ngii el chad. Me kede chemat er ngii e oldanges er ngii e mesebechakl er ngii. Kede meruul el uaisei e le ngsoad a rebebil a dilerrek el mo sorir ngii el chad me a blekerdelel el di uai kid.

7. Bltikerreng er a Jesus el mo er a Dios, ngultbechii el mo meruul a ngerang?

⁷ A uchei er a bo domekeroul er a bltikerreng er a rebebil el mo er a Jehovah, e a kot e ngkired el mo medengelii e mo betik a rengud er ngii. E a mera er ngii, a uchetemel a mera el omengull a bltikerreng el mo er a Dios. (Matteus 22:36-38) A Jesus a kiltmeklii a cherrungel el kerebai el kired. Ngmle betik a rengul er a Jehovah er a rengul el rokir me a uldesuel el rokir me a klengar er ngii el rokir me a klisichel el rokir. A Jesus a chiloit a kmal betok el billiol el rak el ngar er a eanged el obengkel a Demal me ngkmal mle ungil el medengelii. Me ngera mlo rsel? A Jesus a dilu el kmo: “Ngbetik a renguk ra Chedam.” (Johanes 14:31) Tia el bltikerreng a mlocholt er a bek el tekoi el lullekoi me a lurruul a Jesus. Nguleldubech er ngii me ngmle blechoel el mo meruul a tekoi el omotech er a rengul a Dios. (Johanes 8:29) Ngrirellii el mo melekoi el omtok er a recheblad el mengeteklel a klechelid el leko te ulemtechei er a Dios. Ngrirellii el dirrek el mlo melekoi el kirel a Jehovah e mo olengeseu er a rebebil el mo medengelii e mo betik a rengrir er a Dios.

8. Bltikerreng el mo er a Dios ngultbecheterir a redisaiplo er a Dios el mo meruul a ngerang?

⁸ El di ua Jesus, e a redisaiplo er ngii er a kot el dart el rak a mle betik a rengrir er a Jehovah, me tia el bltikerreng a ultbecheterir el mo omerk er a ungil el chais el oba blekeu me a blakerreng. Alta e ngmla er ngii a remesisiich el mengeteklel a klechelid el ulemtok er tir engdi tir a milkekii a Jerusalem er a osisecheklir. Tirka el disaiplo a kmal dimlak el sebechir el meterob el ouchais a tekoi el lules me a lrirenges. (Rellir 4:20; 5:28) Te mle medengei el kmo a Jehovah a ulebengterir e mo omekngeltengat er tir e mera el ulemekngeltengat er tir! Me ngar er a kesai er a 30 el rak er a uriul er a kodellel a Jesus, e a apostol el Paulus a mle sebechel el meluches el kmo a ungil el chais a mla oberk el mo er a “rokuil dingar el bleob el ngar cheungel a eanged.”​—Kolose 1:23.

9. Ngmekerang a dolisiich er a bltikerreng er kid el mo er a Dios?

⁹ A lsekum e ngsoad el mo mera el ungil el sensei, e ngkmal kired el oterekeklii el kmo kede melemolem el melisiich er a bltikerreng er kid el mo er a  Dios. Ngmekerang e sebeched el meruul er tiang? Ngar er a osisiu el rolel sel domekeroul a bltikerreng er kid el mo er a ta er a chad. Kede chadecheduch. Me kede mengedecheduch er a Dios el ngar er a nglunguuch. Kede dirrek el orrenges er ngii el oeak a omesubed er a Tekingel, e menguiu er aike el babier el mesaod a suobel er a Biblia, e mo er aike el miting er a Rekristiano. Sel lorael el mo klou a klemedengei er kid el mo er a Dios, e a rengud me nguaisei el mukeek er a bltikerreng er kid el mo er ngii. E seikid, e sel dolecholt er a bltikerreng er kid el mo er a Dios el oeak a omelekinged me a omerelled, e ngmo sebechir a rechad el mesang me ngdirrek el mo sorir el olekeed er tir er a Jehovah.​—Monguiu er a Psalm 104:33, 34.

Ngkirel el Betik a Rengud er Aike el Tekoi el Dolisechakl

10. Ngerang a olengchelel a ungil el sensei?

¹⁰ A olengchelel a ungil el sensei a sel teletelel el betik a rengul er aike el lolisechakl. Ngkmal kirel el oumerang el kmo ngklemerang e ngar er ngii a ultutelel e mekreos el tekoi er a rengul. A lsekum a sensei a omekerreu aike el tekoi el lolisechakl, e ngbleketakl a klemeriarreng er ngii el sebechel el mesisiich el mengesuseu a uldesuir a rechad el lolisechakl er tir. Engdi a lsekum a sensei a diak el sal soal a tekoi el lolisechakl, e ngmekerang e sebechel el omdasu el  kmo a rechad el lolisechakl er tir a mo omes aika el tekoi el lorrenges el kmo ngmekreos? Me kele mongesadel er a klungel a ultutelel a kerebai el mongetmokl er ngii el sensei er a Tekingel a Dios. A Jesus a dilu el kmo: “A ungil el mosisechakl el ngalek er a skuul a sebechel el mo ua sensei er ngii.”​—Lukas 6:40, The New Berkeley Version in Modern English.

11. Ngera uchul me a Jesus a mlo betik a rengul er a tekoi el lullisechakl?

¹¹ A Jesus a mle betik a rengul er a tekoi el lullisechakl. Ngmle medengei el kmo a tekoi el bo lorous a kmal mle mekreos​—le ngklemerang el kirel a Demal el ngar er a eanged, el ngii a “tekoi ra Dios” me a “tekoi ra diak a ullebengelel klengar.” (Johanes 3:34; 6:68) Me ngdi uai a llomes el meluich el ngmoech, sel klemerang el lullisechakl er ngii a Jesus a ullecholt el kmo ngngera mekngit e ulemeketakl el kmo ngngera ungil. Ngmlo uchul a omelatk me a ongelaod el mo er a remedemedemek a rengrir el tir a mla mecheblad er a remengeteklel a klsuul el klechelid e ulsarech er a Diabelong. (Rellir 10:38) A bltikerreng el lulebang a Jesus el kirel a klemerang a dimlak di debetik er ngii er a osisecheklel e ngdirrek el mlocholt er aike el rokui el lurruul.

12. Ngmlo ua ngerang a uldesuel a apostol el Paulus el kirel tia el ungil el chais?

¹² Ngdi uai a Jesus, e a redisaiplo er ngii a mle betik a rengrir e ulemes el kmo ngmekreos a klemerang el kirel a Jehovah me a Kristus me a rumtok a dimlak el sebechir el mengitechut a rengrir me bo lak lomerk er ngii el tekoi el mo er a rebebil. A Paulus a milluches el mo er a rekldemel el Kristiano el ngar er a Rom el kmo: “Misei e a ksal oureng er ngii a kmo, dilerek loberk a evangkelio lekor kemiu. . . Le ngdiak kmerur ra evangkelio, le ngklisichel a Dios el mesterir cholsobel tirikel rokui loumerang.” (Rom 1:15, 16) A Paulus a ulemes el kmo ngchetengakl el tekoi a lomerk er tia el klemerang. Ngmilluches el kmo: “El mler ngak ngiil grazia ra mo omerk ra diak le metuk el iltetel a Kristus el morar Chisentail.” (Efesus 3:8) Me ngdiak el meringel el bo dedebedebekii a klemeriarreng er a Paulus er a lolisechakl er a rechad el kirel a Jehovah me a moktek er ngii.

13. Ngera ngar er ngii el uchul me ngsebeched el betik a rengud er a ungil el chais?

¹³ A ungil el chais el debetik er a Tekingel a Dios a ngosukid el mo medengelii a Ulemeob e mo oba ungil el deluill er kid me a Ngii. Ngii el ungil el chais a meskid a ungil el nger er a meklou a ultutelel el ker el kirel a klengar e ngar er ngii a klisichel el melodech a klengar, e meskid a omelatk, e melisiich er kid er aike el taem el dechelebangel a ultok. Ngdirrek el mekrolid el mo er a rolel a klengar el ngar er ngii a moktek er ngii el sebechel el melemolem el diak a ulebengelel. Ngdiak a ngii di el klemedengei el kuk mekreos me a lechub e ngkuk klou a ultutelel er tia el ungil el chais. Tiang a mekreos el ngat el dengiluu el mlo uchul a klou el deuil a rengud. Ngmeskid a lmuut el klou el deurreng sel bo dorous er ngii el ngat el mo er a rebebil.​—Rellir 20:35.

14. Kede mekerang e smisiich a bltikerreng er kid er aike el tekoi el dolisechakl?

¹⁴ Ngera sebechem el meruul er ngii el lmuut el mo melisiich er a bltikerreng er kau el kirel a ungil el  chais? Sel monguiu a Tekingel a Dios, e mtelkib el olengull e molebedebek a tekoi el monguiu. El di ua tiang, molebedebek er kau el leko ke merael el obengkel a Jesus el omerk er a klumech er tia el beluulechad me a lechub e ke ngar er a omerael el obengkel a apostol el Paulus. Momes er kau el leko ke ngar er a chelsel a beches el blekeradel er a beluulechad, e  molatk er a klungel a ngeldechel a klengar el mo er ngii. Bo molebedebek aike el klengeltengat el bla mngai el blekongesenges er kau el mo er a ungil el chais a uchul. A omoruul er a bltikerreng er kau el kirel tia el ungil el chais me di lemesisiich, e tirke el molisechakl er tir el chad a sebechir el mo melechesuar tia el bltikerreng er kau. Me seikid, e ngar er ngii a ungil el uchul e ngkmal kired el melebedebek aike el bla desuub e mo kerekikl aike el dolisechakl.​—Monguiu er a 1 Timoteus 4:15, 16.

Ngkired el Mo Betik a Rengud er a Rechad

15. Ngera uchul me a sensei a kirel el mo betik a rengul er a rechad el lolisechakl er tir?

¹⁵ A ungil el sensei a rullii a ngalek er a skuul el mo semeriar er a tekoi el losuub e dmeu a rengul el ouchais aike el ngar er a uldesuir. A betik a rengul el sensei a olisechakl a klemedengei e le ngmera el omekerreu er a rechad el lolisechakl er tir. Ngmeruul a osisecheklel el mo ruedem aike el lousbech a rechad el lolisechakl er tir me a teido er a klemedengei er tir. Ngkerekikl el omtab a duch me a blekerdelel a klengar er a rechad el lolisechakl er tir. Sel sekum a sensei a olecholt er a choua isei el bltikerreng, e a rengalek er a skuul a sebechir el mtebengii, me ngmo uchul e a osisechakl me a omesuub a dul mo dmeu a rengrir el meruul.

16. Ngoeak a ngera el rolel e a Jesus a ullecholt a bltikerreng er ngii el mo er a rechad?

¹⁶ A Jesus a ulechotii a choua isei el bltikerreng. Sel kot el mle klou el olechotel a bltikerreng er ngii a sera bo el tengetengii a cherrungel el klengar er ngii me bo el uchul e bo el sobel a rebebil. (Johanes 15:13) Ngar er a chelsel a omesiungel, e ngulemekerreu er a rechad er aike el ousbech er a di klechad er tir me a dirrek el aike el ousbech er a klereng er tir. Ngdimlak longiil er a rechad el mei er ngii, e ngbai merrael a betok el dart el mael el di ulab a ochil el mlo osiik er a rechad el ouchais er tir a ungil el chais. (Matteus 4:23-25; Lukas 8:1) Ngmle klou a rengul e ullecholt a klemedengei el kirir a rechad. A redisaiplo er ngii er a lousbech a omesmechokl, e ngmilsmechokl er tir el oba bltikerreng. (Markus 9:33-37) Ngmillisiich er tir el oeak sel lolecholt el kmo nguluumerang el kmo tir me te dirrek el sebechir el mo meduch el  omerk er a ungil el chais. Ngdiak a ngii di el chad el mla ochotii el kmo ngkuk lmuut el ngar er a bab el betik a rengul el sensei el ua Jesus. A bltikerreng el lulechotii el mo er a redisaiplo er ngii a rirelleterir el mo betik a rengrir er ngii e mo oltirakl a omellach el lebilsterir.​—Monguiu er a Johanes 14:15.

17. Ngmilekerang a redisaiplo er a Jesus a lolecholt a bltikerreng er tir el mo er a rechad?

¹⁷ Ngdi ua Jesus, e a redisaiplo er ngii a ullecholt a dmolech el bltikerreng el mo er tirke el lulemerk a  klumech el mo er tir. Te uluutekangel a odechelakl e mlo cherur a kodall, e milsiou er a rebebil e mlo ungil el merkii a ungil el chais. Te ullecholt er a mera el bltikerreng el mo er tirke el ullengeseu er tir er a tekoi er a klereng. A tekoi el lulluches a apostol el Paulus a kora kmal remutech a rengud er a loluches el kmo: “E dirrek el mle medemedemek ra delongeliu, el ua oltut el redil a lomekeroul rar ngelekel. A ki oubltikerreng el oureng er kemiu, me ngdi mle somam el meskemiu a klengar er kemam, el diak di le evangkelio ra Dios e merekong, le ngmlo betik a rengmam er kemiu.”​—1 Thesalonika 2:7, 8.

18, 19. (a) Ngera uchul me kede kongei el mo melenget aike el ngar er ngii er kid el mo meruul er a ureor er a berkel a klumech? (b) Mouchais er a kerebai el olecholt el kmo a omerellel a bltikerreng el dolecholt er ngii a sebechir a rebebil el mtebengii.

 ¹⁸ Ngar er a osisu el rolel, e a Resioning er a Jehovah er a chelecha el taem a iueklii a beluulechad el osiik er tirke el oureng el mo medengelii a Dios e mo mesiou er ngii. Aika el mereko el 17 el rak, e ngmle bek el rak el dongoit er a betok er a ta el billiol el sikang el omerk er a klumech e meruul er a redisaiplo e dirk melemolem el meruul er tia el ureor. Alta e tia el ureor er a berkel a klumech a ousbech a klou el omelenget er a temed me a klisiched me a klokled engdi kid a meruul er ngii el oba deurreng. Me ngdi ua Jesus, e ngbleketakl er a rengud el kmo a Demad el ngar er a eanged a soal a rechad a bo lodengelii a klemerang el ngii a mo uchul a diak a ulebengelel el klengar. (Johanes 17:3; 1 Timoteus 2:3, 4) A bltikerreng a motbechid el mo olengeseu er a remelemalt a rengrir el chad el mo medengelii a Jehovah e mo betik a rengrir er ngii el di uai kid.

¹⁹ A bltikerreng el dolecholt er ngii a sebechir a rebebil el mtebengii. El di ua tiang, a ta el pioneer el odos el ngar er a beluu er a Merikel a meluches a babilengel el mo mengelaod er a rechad el mla mad a rebetik er a rengrir. Me a longer er a babier er ngii, e a ta el chad a melluches el kmo: “Ngmle mechas a renguk el kmo ngar er ngii a chad el sebechel el mengoit a temel el meluches a babier er ngii el mo er a diak lodengelii el chad el mengelaod er ngii er a meringel el taem el kirel el outekangel. Me ngkmal di sebechek el kmo kau a betik a rengum er a ngar er a bita er kau me a dirrek el Dios el ngii a omekrael er a rechad er aike el rael el lokiu ngii.”

20. Ngua ngera klungel a ultutelel a dolisechakl el oba bltikerreng?

²⁰ Ngar er ngii a omelekoi el kmo, a bltikerreng me a kldachelbai a ledak el oureor e ngobeob a meringelchad el klalo. Ngar er a chelsel a osisechekled, e kede osiik el mo olengeseu er a rechad el mesuub el mo omekeroul er a uldasu el medengelii a Jehovah me a reng el betik a rengul er ngii. Ngmera el tekoi, a bo demera el ungil el sensei, e kede ousbech er a edei el chachisois el bltikerreng​—el bltikerreng el mo er a Dios, me a bltikerreng el mo er a klemerang, me a bltikerreng el mo er a rechad. Me sel domekeroul er a choua isei el bltikerreng, e dolecholt er ngii er a chelsel a omesiunged, e kede mo melechesuar er a  diak el di el deurreng e le kid el mirrous e merekong, e kede dirrek el dmeu a rengud e le kid el medengei el kmo a doukerebai er a Jesus e kede omotech er a rengul a Jehovah.

Ngmekerang a Omonger?

• Sel dolisechakl er a rebebil a ungil el chais, e ngera uchul me ngklou a ultutelel a lebo er ngii a

bltikerreng el mo er a Dios?

bltikerreng el mo er aike el tekoi el dolisechakl?

bltikerreng el mo er a rechad el dolisechakl er tir?

[Aike el Ker er a Suobel]

[Siasing er a 19 el llel]

Ngera rirellii a osisecheklel a Jesus me ngmle ngodech er a osisecheklir a rechellimosk er a llach me a Refarisee?

[Siasing er a 22 el llel]

A ungil el osisechakl a ousbech a klemedengei me a duch, e a ngar er a uchei a bltikerreng