A OMELEKOI er a Nigeria a kmo: “A remeklou el chad a ngar er ngii a llomeserreng er tir, engdi a rengalek a mellomes a rengrir el ngar er a rolel er tir.” A Edwin, el ta er a remechuodel er a ongdibel er a Nigeria, a mlo medengei el kmo tia el tekoi a klemerang.

A ta er a klebesei, e ngmiltik er a beached er a eungel a tebel er a blil.

Me nguleker er a retedei el ngelekel el kmo: “Tiang ngkloklel techang?”

A eai a rekil el Emmanuel a dilu el kmo, “Ngkloklek.” Tia el beached el rruul er a deel el ngar er ngii a blsibs er bebul a blil a tenget el kirel a urerir a Resioning er a Jehovah el meliuekl er a beluulechad. Ngdilu el kmo: “Ngak a diak el sebechek el mo er a Kingdom Hall er a bek el sils, me ak millatk el kmo ak rullii a beached me bo el sebechek el melechang aike el udoud el kirel cheral a kelek el mo diak kuusbech.”

A demal a Emmanuel a ngar er ngii a beksel el longudel a udoud er a chelsel el omech aike el bek el temel a eru el sils el ongdibel er kid, engdi ngdilubech a bkaischemrungel er a chelsel a telungalek er ngii a uchul e ngmlo kirel el ousbech aika el udoud. Me a Emmanuel a ngiluu a mechut el beached el mo er a chad er a omelechudech me bo el sebechel el duchedechii tia el bechedel me bo lak el sebechel el melai a udoud er a chelsel. Ngika el chad er a omelechudech er a bo lodengelii a belkul tia el beached, e ngrirellii a bechedel a Emmanuel el ousbech a derengel a bechedel. Me a Michael, el eim a rekil el ochellel, a dirrek el ullengit er ngii me lerellii a bechedel.

A Edwin a kmal mlo mechas a rengul er aika el omerellir a rengelekel, me nguleker er tir er a uchul e te mirruul aika el beached. Me a Michael a dilu el kmo: “Ngkmal soak el melenget.”

A demal me a delal a Emmanuel me a Michael me a ochederir el etiu a rekil el Uchei, a dimlak lodengei el kmo tirka el ngalek a mengudel a derengel a cheral a kelir e mesuk er aika el beached. Te silubii tia el uldasu er ker? Sel taem er a bo lemeklou el mocha sebechir el orreked a udoud, e a demerir me a derrir a ulisechakl er tir el mo melecha udoud er a chelsel aike el blil a tenget er a Kingdom Hall. Me ngbleketakl el kmo tirka el ngalek a silubii a kmal ungil el tekoi.

Sera bo el mui aika el beached, e lebekengii e lochur aika el udoud, e ngmla er ngii a $3.13 a ildisel el udoud er a Merikel, e tiang a kmal klou a ildisel el udoud er a chelsel aika el beluu el ngii a kmal kekerei a ududir a rechad er ngii. A choua aika el rolel a omelenget a olengeseu er tia el ureor er a berkel a klumech el lomerk er ngii a Resioning er a Jehovah el meketmokl er a chelsel a 235 el beluu el meliuekl er a beluulechad.