Ngkirel el Mo Melemalt a Omerellem er a Bek el Taem?

A REBEK el chad a olecholt a melemalt el omeruul a lebebil er a taem; e a ruumesingd el chad a olecholt er ngii er a bek el taem. Engdi te tela el chad a omodengelterir el olecholt er tia el blekeradel er a bek el taem?

Chelecha el taem, e ngdiak debetik er tia el melemalt el omeruul er a bek el blekeradel er a klengar. Me nguaisei, engdi a osengel a Dios el kirel tia el tekoi a lodengelii a rebetok. El ua tiang, te betok el chad a medengelii sel llach el kmo: “Lak bo morechorech.” (Exodus 20:​15) Engdi te betok a omdasu el kmo a teletelel a klengar er a chad a sebechel el mo uchul e ngmo meruul a diak el melemalt el tekoi. Me bo domes a kldei el rolel a omerechorech el betok el chad a omes el kmo ngdi ungil.

Ngdi Ungil a Chad a Lorechorech A Lsekum e Ngchebuul?

A ta er a ngar er a bab el chad er a Rom a dilu el kmo: “A chelebuul a kmal klou el uchul a delengerenger.” A chebuul el chad a sebechel el omdasu el kmo ngdi ungil a lorechorech. Me a rechad el mo medengelii tia el omeruul a dirrek el omdasu el uaisei. Engdi ngngera mle osengel a Jesus el kirel tia el tekoi? Ngkmal ullecholt a klechubechub el mo er a remechebuul. “Me ngkmal mlo chuub.” (Matteus 9:​36) Engdi ngdimlak a ta el lekengei a omerechorech er a ngii di el taem. Me a leuaisei, e ngngera kirel el meruul er ngii a chebuul el chad?

A Dios a chubechub el bedul tirke el melasem el olengesenges er ngii e mo omekngeltengat aike el loruul me bo el sebechir el ngmai aike el lousbech. (Psalm 37:​25) A Biblia a tibir el kmo: “A RUBAK a diak le bechititerir a re ungil chad me bo le sengerenger, ngdi re dengerenger a diak le bechititerir me lengai a ikel sorir.” (Osisechakl 10:⁠3) Me a omomdasu, e a chebuul el chad ngsebechel el ultuil er tia el telbiil? A Victorine a kmal oumerang er tia el tekoi.

A Victorine el mellakl el dil el teim a rengelekel, el dirk ngar er a skuul, a kmal metacherbesul a klengar er ngii. Ngkiei er a chebuul el beluu el diak a ngeso er a kabelment el mo er a rechad. Me a rechad a blechoel el mengoit a klou el temir el ngar er a rikl, me ngklou a techall er a omerechorech. Me nguaisei, engdi a Victorine a kmal diak el lolatk a mo merechorech. Ngbai olterau a oterullel er a tkul a rael me bo el sebechel el mechar aike el lousbech a telungalek er ngii. Ngera uchul me ngmelemolem el melemalt a blekerdelel?

“A kot, e a kuumerang el kmo a Dios a melemalt me a lsekum a kuukerebai er ngii e ngdirrek el mo olecholt er a osisiu el omeruul el bedul ngak. E a ongerung, e a rengelekek a sebechir el suubii a melemalt  el omeruul a lsekum e te omes er ngak el melemalt a blekerdelek.”

Ngua ngera klengar er ngii er a chelechang? Ngkmu el kmo: “Ngar er ngii a kelam me a bilam me a blimam. Engdi a lebebil er a taem, e ak ulengit a ngeso er a resechelik me bo el sebechek el harau a belsek er a osbitar. Ngdi blechoel el ngar er ngii aike el kuusbech. E ngera uchul? E le resechelik a medengei el kmo a tekoi el kuuchais er tir a klemerang e diak kulasem el melai a kuk betok er aike el kuusbech.

“A rengelekek a merael el mo meklou el melemalt a omerellir. A tonari er kemam a miles a udoud er a bebul a tebel e uleker er ngak a lsekum ak kora bekikl a lengai a rengelekek. Ngdimlak loumerang er a kdu er ngii el kmo a rengelekek a diak el bo lolai aike el udoud. Ngdimlak kudengei, e ngika el tonari er kemam a millasem er tir. Ngmilechei a ududel er a bebul a tebel er a blimam el mle sebechir a rengelekek el mes. A lemei er a bo lekukuk, e ngmlo mechas a rengul el mes a ududel el dirk mle medechel er a bebul a tebel. A lemelemalt a omerellir a rengeleked e ngkuk ungil er a lengar er ngii a betok el klokled.”

“A Rebek el Chad a Uaisei”

A omerechorech er a chelsel a ureor a kmal klou. Misei a uchul e a rebetok el chad a omdasu el kmo, ‘A rebek el chad a uaisei, me ngerang me ngdiak el sebechek?’ Engdi a Biblia a kmo: “Kele moltirakl er a re betok el chad el mo meruul a mekngit.” (Exodus 23:⁠2) A Victoire a kmal oltirakl er tia el uleklatk. Me tiang ngmlo uchul a ngerang el kirel?

Sera le 19 a rekil a Victoire e ngmlo oureor er a kombalii el meruul a cheluch. Ngdi mle mereched el metik el kmo tirke el 40 el redil el ledilak el oureor a ousbech a sualir el merechorech aike el redechel tia el dellomel el ousbech er ngii el meruul a cheluch. E sel lolengull er a ureor, e te mo olterau aika el rodech e a cheral el lengai a di osisiu ngii me a ududir el lengai sel loureor el edei me a lechub e ngeuang el klebesei. A Victoire a kmo: “A rebek el chad a mirruul er ngii. Ngmle sorir a bo kubengterir e ngdi ak mle kotouar e dilu el kmo ngsoak el loltirakl a llemalt er a klengar er ngak. Te millenguul er ngak e dilu er ngak el kmo ngmeringel a rengul tia el ungil el techall.

“A ta er a klebesei er a kim tebeda er a ureor, e a merredelam a di mle kiu el tmoech. Ngulemes e miltik aike el rodech er a sualir a rokui el chad engdi ngdimlak a ngera el rodech el lebetik er a sualek. Tirke el mludechem a mle kirir el mo diak loureor me a lechub e te oureor el eru el sandei el diak el uduudel. Chelsel aike el eru el sandei, e tirka el redil a mlo medengei el kmo a omerellek a mle melemalt.”

“A Lsekum e Kemetik a Klalo e Ngkloklem”

Ngera uldesuem sel obetik a mekreos el klalo el lurridii a chad? Tiang a sebechel el rulleterir a rebebil me ngmo diak el sorir el lolluut er ngii e di nguu me ngkloklir. Te oba sel uldasu el kmo “a lsekum e ke metik a klalo e ngkloklem.” A rebebil a omdasu el kmo ngdiak a ngera el letemellii a lenguu, e le ngike el ouklalo er ngii a omdasu el kmo ngdikea lluut el mo metik er ngii. A rekuk bebil a kmo ngdiak el ngerechelir el mo osiik er ngike el ouklalo er ngii e le ngmeringel a bo losiik er ngii.

Ngera osengel a Dios el kirel tia el tekoi? A Duteronomi 22:​1-3 a ochotii el kmo ngike el metik a klalo a diak lenguu me ngkloklel e ngbai orekedii “el dimerkmo a [chad el ouklalo er ngii] a bo losiik er ngii e kolutii el mor ngii.” A lsekum e ngike el miltik er a klalo a diak louchais er a lebiltik, e ngsebechel el motelechakl el kmo ngmirrechorech. (Exodus 22:⁠9) Tiang ngar er ngii a ultutelel er a chelechang? A Christine a oumerang el uaisei.

A Christine a merredel er a ta er a skuul. Ngmlo nguu a ududel er a temel a uduudel er sel buil. Me ngngilai ngii el udoud e chimetemet e otuu er a til, el di ua blekerdelir a rechad er sel beluu er a West Africa. E sola e milekedongii a taxi el otobai el otekir el mo er a miting. Me a lebochang, e ngulemechederiib er a til el osiik a udoud el omsa ngika el chad er a taxi, e ngii a ruebet aika el ududel e diak leues e le ngmilkolk.

A sesei el bung er a uriul, e a 19 a rekil el Blaise, el diak el sal medengelii tia el basio, a mirrael el mei. Ngii me a ta er a sechelil a tilbir el mo er sel osisiu el miting el lebo er ngii a Christine. Ngmiles  aika el udoud me ngngilai el otuu er a bilel. E a uriul er a miting, e ngdilu er a sechelil el kmo ngngar er ngii a lebiltik er rikl me a ngii di lechad el urridii a sebechel el oudengua el mo er ngii e ouchais el kmo ngngera el klalo.

Me sel kesus er a bo lerei a Christine, e ngkmal mlo mekngit a rengul er a bo lodengei el kmo ngmla oriid aika el ududel. A ta el sandei er a uriul, e nguluuchais er a sechelil el Josephine el kirel, me a ngii el sechelil a silbedii el kmo a chad el mlei er sel miting a miltik a kmung ngerang. A Christine a uluudengua el mo er a Blaise e uluuchais er ngii el kirel a ududel el lurriid. A Blaise er a loluut a ududel e ngkmal mlo dmeu a rengul. E ngera mle uldesuel a Blaise? Ngullab ngii el udoud el ta el sandei, engdi ngmelekoi el kmo, “Sel deurreng el blo kulechesuar er a kuluut aike el udoud a kuk mle klou er sel deurreng el kubang a lsekum ak di ngilai.”

A Uchul Me Te Melasem el Melemalt er a Bek el Taem

A Victorine me a Victoire me a Blaise a kiei er a kakerous el basio e diak el kaodengei, engdi ngngar er ngii a tekoi el lobang el di osisiu. Tir el tedei a Sioning er a Jehovah e oltaut a lolekoi a Biblia el kirel a melemalt el omeruul. Te dirrek el mengiil er a otutel a telbilel a Dios el kirel a beches el beluulechad. “Ngdi kid a mengiil er sel ngara telbilel a Dios el beches el eanged ma beches el chutem el bo le kiei er ngii a llemalt.” A rokui el chad el mo kiei er sel taem a rokui el di mo melemalt a blekerdelir.​—2 Petrus 3:⁠13.

A Victorine a medengei el kmo a rolel a klengar er ngii a diak el bo el ungil el di merekmo lengodech a rokui el tekoi a Dios. Me nguaisei, engdi ngmerau er a tekoi er a klereng, el tekoi el diak el sebechel el mochar. A rengelekel a melemalt e ungil a blekerdelir. A bek el sandei, e ngkmal dmeu a rengrir sel longedecheduch el mo er a retonari er tir el ouchais el kirel a ungilreng er a Dios e dirrek el mesaod a bo loruul el kirir “tirkel mera er a rengrir omekedong er ngii” e mengkar er “tirkel betik a rengrir er ngii.”​—Psalm 145:​7, 18, 20.

A Victoire a mlo diak loureor el meruul a cheluch. Ngbai milechelii a siobai er ngii el olterau a garri (el kall el mengai er a diokang) er a makit. A melemalt el omerellel a uchul me ngkmal mle betok a rechad el omechar a oterullel. Misei a uchul e ngmlo sebechel el kosadel a temel er a makit e bai mlo sebechel el ousbech er a klou el temel el mengedecheduch er a rebebil el kirel a omelatk er a mo kiei er a beluulechad el mimokl er a mekngit el omeruul. A uriul e ngmlo bechiil e ngii me a bechil a mesiou el mui el taem er a chelechang.

A Christine a urriid a ududel er a medal a Kingdom Hall er a Resioning er a Jehovah. A Blaise a dimlak lodengelterir a rebetok el chad el ngar er a miting, engdi ngmle medengei el kmo tir a rudam me a rudos er ngii, me te melasem el mo melemalt a omerellir er a bek el taem.

Te tela el chad a modengelterir el melasem el mo melemalt a omerellir er a bek el taem? Ka di molatk er kau el obengterir a re 50 me a lechub a re 100 me a lechub a re 200 el chad el melemalt a omerellir. Tia el blekeradel a lodengelii a Resioning er a Jehovah sel lengar er a Kingdom Hall er tir. Moutekangel el mong me bo mungil el medengelterir.

[Blurb el ngar er a 12 el llel]

“A lemelemalt a omerellir a rengeleked e ngkuk ungil er a lengar er ngii a betok el klokled.”​—VICTORINE

[Baks el ngar er a 14 el llel]

A Osisechakl 6:30 Ngkmo Ngdi Ungil a Omerechorech?

A Osisechakl 6:30 a kmo: “A re chad a diak loltuub er a merechorech a lsekum ng merechorech a kall sel le sengerenger.” Tiang belkul a kmo ngdi ungil a omerechorech? Ngkmal diak leuaisei. E le a ongingil el bades a ochotii el kmo a Dios a mo oukerrekeriil er a chad el merechorech a klalo el melekoi el kmo: “Ngdi sel le mudechem, e ng kirel mengkad el euid el chachisois. Ng di otobed a bek el ngar ngii er ngii.” (Osisechakl 6:​31) Me alta e a chad a merechorech, e le ngklengerenger a uchul, a diak el sal mekngit er a chad el merechorech e le ngnguibes a rengul me a lechub e ngsoal el melemall er a ta er a chad, engdi ngdirk kirel el ‘mengkad’ er sel klalo. Tirke el sorir a kengei er a Dios a diak el kirir el mo motelechakl er a omerechorech er a ngii di el taem.