1, 2. Ngera ngrullii er kid a ues el kirel a klou el cheldebechelel a Jehovah?

 NGKMAL klou el tekoi sel dolatk el kmo kede chedal a klou el cheldebechel el oungerachel a tekoi el ngar er a eanged me a chutem. A ues el medung er a 1 el bliongel er a Esekiel me a 7 el bliongel er a Daniel a kmal ungil el smodii sel rolel e a Jehovah a oureor el oltaut a moktek er ngii. A Jesus a mengeteklel a tedebechel a cheldebechelel a Jehovah el ngar tia el chutem. Me ngomekrael er tia el cheldebechel el mo meruul er a ureor er a berkel a klumech, olisechakl e melisiich er tirke el omerk er a klumech, e dirrek el olengeseu er a rechad el mo mengull er a Jehovah. Seikid a uchul me ngsebeched el ultuil a klaumerang er kid er tia el cheldebechel!​—Mt. 24:45.

² Kau, ke mechesang el meruul er a omesiungem el mo er a Dios el oltirakl er a kerebai er tia el cheldebechel? Me a lechub e ke melechesukau el mechitechetong a blakerreng er kau. Tiang a dilubech el mo er tirke el kot el Kristiano. Me a apostol el Paulus a mle kirel el omeklatk er tir er sel blakerreng er a Jesus, e le tiang a ngosuterir me “lak bo le kekere” a rengrir. (Heb. 12:3) Ngar sel mlo merek el suobel e kede milsaod er a kmal ungil el tekoi el longetmokl er ngii a cheldebechelel a Jehovah er chelechang. Me a kerebil a Kristus a millisiich er a Rekristiano er sel taem, el di ua kerebil a cheldebechelel a Jehovah er chelechang el ngosukid me kede melemolem el blak a rengud el mesiou er a Dios.

3. Ngkired el mekerang me lak “bo de mesaul el meruul a ungil”? Ngera kede mo mesaod er tia el suobel?

³ Engdi a lsoad el melemolem el blak a rengud el mesiou er a Dios, e ngdiak el kired el di melatk er a cheldebechelel e le merekong. Ngbai kired el “meruul a ungil” el ua ledilung a Paulus. (Gal. 6:9) Me bo dosaod a eim el tekoi el kired el meruul me dolemolem el blak a rengud e doltirakl er a cheldebechelel a Jehovah. Misei e ngmo sebeched el omes aike el tekoi el kired kid me a telungalek er kid el mo mesmechokl.

4. Kede mekerang e medengei el kmo a ongdibel a meklou a ultutelel el tedebechel a mera el omengull?

⁴ A remesiungel a Jehovah er a irechar el mei a omes a ongdibel er tir el kmal meklou a ultutelel. Ngar er a eanged e a rechanghel a kldibel er medal a Jehovah. (1 Ki. 22:19; Job 1:6; 2:1; Dan. 7:10) Me a Dios a dirrek el dilu er a rechad er a Israel me bo le kldibel e “le rengesii e losuub” a llechul. (Dut. 31:10-12) Sel taem er a Jesus, e a Rechijudea a mle blechoel el mo kldibel er a ileakl el blil a ongdibel er tir e menguiu er a Chedaol Llechukl. (Lk. 4:16; Rel. 15:21) Me a ongdibel a millemolem el meklou a ultutelel er sera lemeteketek a ongdibel er a Rekristiano, me ngdirk osisiu el kired er chelechang. A remera el Kristiano a ‘kaukerreu e kaingeseu el olecholt er a bltikerreng e meruul a ungil.’ Me ngkmal kired el melemolem el “kasisiich er chelechal domes er sel Sils er a Rubak el olekedang.”​—Heb. 10:24, 25.

5. Kede mekerang e kasisiich er a delongeled sel dengar er a miting?

⁵ A ta er a klou a ultutelel el rolel e kede mo kasisiich a sel doltobed a uldesued er a temel a miting. El ua tiang, ngsebeched el onger a ker el kirel a parakurab, mesaod a bades me a lechub e kede ouchais a tekoi el dilubech el ochotii a rolel e a omellach er a Biblia a ngosukid. (Psa. 22:22; 40:9) Me alta kede meketeketang el Kristiano, engdi ngkmal melisiich er kid sel dorrenges a uldesuir a remeklou me a mekekerei el ngar er a delongeled.

6. Ngmekerang e ngosukid aika el miting er kid?

⁶ A miting me aike el meklou el ongdibel er kid a ngosukid er a betok el rolel. Ngrullid el mo bekeu el omerk er a klumech el mo lmuut er sel taem el rechad er a beluad a omtok er kid me a lechub e ngchetirir el orrenges. (Rel. 4:23, 31) A kakerous el cheldecheduch el mengai a uchetemel er a Biblia a melisiich er a klaumerang er kid. (Rel. 15:32; Rom 1:11, 12) Ngdirrek el kmal uchul a deurreng me a ongelaod sel deteloi er a rudam me a rudos er kid. (Psa. 94:12, 13) Sel Teaching Committee er a Chelechad er a Ruungerachel a mengetmokl a rolel a osisechakl el motobed er a bek el miting er a rechedal a Jehovah. Me kede oba omereng el saul el kirel aika el ungil osisechakl el dengai er a miting er kid er a bek el sandei!

7, 8. (a) Ngera sel kot el klou a ultutelel el uchul me kede mo er a miting? (b) Ngmekerang a miting e ngosukau?

⁷ Engdi ngdiak debo er a miting el di mo melai a klungioled. Sel kot el klou a ultutelel el uchul e kede mo er a miting a mo mengull er a Jehovah. (Monguiu er a Psalm 95:6.) Kede oba ileakl el techall el sebeched el mengitakl el oldanges er Ngika el Ngarbab el Dios er kid! (Kol. 3:16) Kede dirrek el oldanges er a Jehovah sel donger er a temel a miting. A Jehovah a kmal rredemelel a chouaitia el rolel a omengull er kid. (Och. 4:11) Me kede ungil medengelii a klungel a ultutelel a debo er aika el miting!​—Heb. 10:25.

⁸ Aika el miting er kid a sengk er a Jehovah el ngosukid el outekangel el mo lmuut er sel taem el lebo lokngemedii tia el mekngit el beluulechad. Kid kede omes aika el miting el kmal mekreos? A lsekum nguaisei a uldesued e kede ulterekokl el mo er a bek el miting alta e kede kmal mechesang. (Fil. 1:10) Me a lsekum ngdiak debo er a miting er kid e ngkirel el ngar er ngii a kmal ungil el uchul e ngdiak debong.

9. Ngera uchul me a berkel a klumech a kmal klou a ultutelel?

⁹ A lsoad el oltirakl er a cheldebechelel a Jehovah e ngkirel el mo blak a rengud el omerk er a klumech. A Jesus a ulemuchel er a berkel a klumech er a lengar er  tia el chutem. (Mt. 28:19, 20) Me seikid el taem el mei e a berkel a klumech me a omeruul el disaiplo a kot el meklou a ultutelel el ureor el longetmokl a cheldebechelel a Jehovah. Ngbetok a tekoi el dilubech el ochotii el kmo a rechanghel a olengeseu er tia el urered e omekrael er kid el mo metik er tirke el semeriar er a klemerang. (Rel. 13:48; Och. 14:6, 7) Me sel moktek er tia el tedebechel a cheldebechelel a Jehovah el ngar er a chutem a omtebechel e omekrael er a ureor er a berkel a klumech. Me tiang, ngta er a kot el klou a ultutelel el tekoi er a klengar er kau?

10. (a) Ngmekerang a ta el odam e melemolem el melisiich er a klaumerang er ngii? (b) Ngmekerang a omesiungem e smisichau me ke melemolem el betik a rengum er a klemerang?

¹⁰ A bltkil a rengud el kirel a klemerang a melemolem sel leblak a rengud el omerk er a klumech. Tiaikid a uldesuel a Mitchel el meketeketang el ta er a remechuodel e dirrek el pioneer. Ngdmu el kmo: “Ngkmal soak el ouchais er a rechad el kirel a klemerang. Ak menguiu a beches el suobel er a Ongkerongel me a Awake! e kmal mechas a renguk er a llomeserreng me a tabesul el tekoi er aika el babier. Me ak kmal mo semeriar el mo oldingel e mo medengei a uldesuir a rechad, me sel rolel e ngsebechek el omeksemeriar a rengrir.” Ngdirrek el melekoi el kmo a omesiungel a rullii me ngungil el melilt a meklou a ultutelel el tekoi er a klengar er ngii, e diak lebechei a ngii di el tekoi me letemellii a omesiungel. Me kid a dirrek el mo sebeched el outekangel a lsekum kede melemolem el mechesang el mesiou er a Dios er a chelsel  aika el uriul sils.​—Monguiu er a 1 Korinth 15:58.

11. Ngera uchul me ngkired el menguiu e melebedebek aike el tekoi el ngar er a babilenged?

¹¹ A ta er a rolel e ngmelisiich er kid a Jehovah a okiu a betok el babilenged. Ke locha melatk er a taem el mulenguiu er a ta er a babilenged e mlo omdasu el kmo, ‘Tia el suobel a kmal ungil el kirek! Ngkmal di ua lulluches er tia el babier a Jehovah el di kirek!’ Ngulterekokl el ngar er ngii a ungil el uchul e ke ulemdasu el uaisei. A Jehovah a meskid aika el babier el olisechakl e omekrael er kid. Ngdmu el kmo: “Ak mo osisecheklau er a rael el kirem el merael er ngii.” (Psa. 32:8) Me kid, ngblak a rengud el menguiu a rokui el babilenged e melebedebek aike el tekoi el dechuiu? Ngokiu tiaikid el rolel e ngosukid el mo outekangel e melemolem el blak a rengud el mesiou er a Dios er chelecha el meringel el taem er a ulebongel.​—Monguiu er a Psalm 1:1-3; 35:28; 119:97.

12. Kede mekerang e mo oba omereng el saul el kirel a babilenged?

¹² Kede lmuut el mo oba omereng el saul el kirel aike el babilenged sel dolatk er a rolel e ngmeketmokl e motobed. Ngkirel el ngar er ngii a rechad el merriter, meluches e menguiu a suobel e meluches a sunga e dirrek el oleiuid a bek el babier el motobed me a lechub e ngmo er a Web site er kid. A Writing Committee er a Chelechad er a Ruungerachel a oungerachel er a orretel tia el ureor. Aike el branch el obis el oltobed aika el babier a mo oldurokl el mo er a betok el kakerous el ongdibel. Ngera uchul me aika el ureor a kirel meketmokl? Me bo el sebechir a rechedal a Jehovah el mo mosisechakl e ngmai a ulekrael me lolemolem el blak a rengrir. (Isa. 65:13) Misei e bo leblak a rengud el melai a klungioled er a rokui el babier el oltobed a cheldebechelel a Jehovah.​—Psa. 119:27.

13, 14. Te rua techang a ngar er a eanged el olengeseu er a cheldebechelel a Jehovah? E kid a mekerang a dolengeseu?

¹³ Ngar er a ues e a Johanes a milsang a Jesus el ngar er a becheleleu el uos el mocha kats er tirke el oumekemad el omtok er a Jehovah. (Och. 19:11-15) Ngdirrek el milsterir a reblak a rengrir el ngellitel el milekiis er a kodall el mo er a eanged me a reblak a rengrir el anghel el ngar er a uos el okiuellel a Jesus. Tiang a ochotii el kmo te olengeseu er a Jesus el ngii a Mengeteklir. (Och. 2:26, 27) A ungil el kerebai er tir a osisecheklid el kmo ngkired el olengeseu er tirke el olab a ngerachel er a chelsel a cheldebechelel a Jehovah.

¹⁴ Me ngdi osisiu, a klou el seked a olengeseu er a ureor el loruul er ngii tirke el ngellitel el odam er a Kristus el dirk ngar er tia el chutem. (Monguiu er a Sekaria 8:23.) E kau a mekerang a omolengeseu er tia el cheldebechel? A ta er a rolel a sel dolengesenges er tirke el mla metutk el mo oungerachel. (Heb. 13:7, 17) Me a tekoi el dolekoi el kirir a remechuodel er a ongdibel er kid, ngmelisiich er a rechad el mo oba omengull el mo er tir me a ureor el loruul? Kede olisechakl er a rengeleked el mo mengull er tirka el blak a rengrir el chad e olengesenges er tir? Ngar er ngii a lmuut el bebil er a rolel e ngsebeched el olengeseu er tia el cheldebechel. Me kid el telungalek, kede mla tibir el mo melenget el olengeseu er a ureor er a berkel a klumech? (Osi. 3:9; 1 Ko. 16:2; 2 Ko. 8:12) Me a lechub kede olengeseu el mengetmokl er a blil a ongdibel er kid? A Jehovah a meskid a chedaol klisichel sel lomes er kid el olengeseu er a cheldebechelel. E tia el klisichel a smisichid el mo outekangel  er a chelsel aika el uriul el sils.​—Isa. 40:29-31.

15. Ngera uchul me ngkired el meringel el oureor el meruul a ungil?

¹⁵ A lsoad el outekangel e dolemolem el oltirakl er a cheldebechelel a Jehovah e ngkirel a rolel a klengar er kid el mo oldeu er a rengul. (Efe. 5:10, 11) A Satan me tia el mekngit el beluulechad me kid el diak demecherrungel a rullii me ngmo meringel er kid el meruul a llemalt. A rebebil er kemiu el rudam me a rudos a kiriu el meringel el oureor el oltngakl a ngii di el tekoi el sebechel el tomellii a deleuill er kemiu me a Jehovah. Me lak bo lemechitechut a rengum e le Jehovah a kmal betik a rengul er kau el blakerreng er kau a uchul! Sel dekiei el oldeu er a rengul, e ngmo dmeu a rengud e mo er ngii a belkul a klengar er kid e le kede medengei el kmo kede oba kengei er a Jehovah.​—1 Ko. 9:24-27.

16, 17. (a) Kede mo mekerang a lsekum kede rullii a oberaod el klengit? (b) Ngera kede suubii er a kerebil a Anne?

¹⁶ Ke mo mekerang a lsekum ke rullii a oberaod el klengit? Lak momart a kngtim e bai mereched el mo olengit a ngeso. Ka molatk er a David er sera lolasem el omart a kngtil. Ngdilu el kmo: “Ng mlo diak a klisichek er a lengelek el chelliloil sils.” (Psa. 32:3) A lsekum kede melasem el omart a kngtid e ngmo diak el deu a rengud e sebeched el oridii a kmes el deleuill er kid me a Jehovah. Engdi a docholt a kngtid e kede “mo nguu a klechubechub er a Dios.”​—Osi. 28:13.

¹⁷ Ka molatk er a blekerdelel a Anne. * Ngar er a temel a klengeasek er ngii e ngmilsiou el pioneer, e ulemuchel el meruul a mekngit el tekoi el mlo uchul a mekngit el ukltkel. Me ngdilu el kmo: “Ngdimlak a deurreng er ngak e mle meringel a uldesuek er a bek el taem.” A ta el taem er a lengar er a miting, e ngmlo er ngii a omesodel a bades er a Jakobus 5:14, 15. Me ngmlo melechesuar el kmo ngousbech a ngeso. Me ngmilekerang? Nguleltirakl a ulekrael er tia el bades e mlo mengedecheduch er a remechuodel. Ngmelekoi el kmo, ngdimlak el beot, e le ngua ble lesecher e a Jehovah lomsang a kar el kirel el ousbech. Ngdilu el kmo: “A kar el kulai a mle meringel el oberekakl, engdi ngulemekungil er ngak.” Me chelechang e ngkmal blak a rengul el mesiou er a Jehovah el klikiid a ukltkel.

18. Ngkired el mo blak a rengud el mekerang?

¹⁸ Lak dobes el kmo ngileakl el techall a dobang el mo chedal a cheldebechelel a Jehovah er chelecha el taem er a ulebongel! Kede dmak el telungalek el blak a rengud el mo er a bek el miting, e omerk er a klumech er a beluad, e dirrek el ngmai a klungioled er a rokui el babilenged. Me bo leblak a rengud el olengeseu er a remechuodel e de kiei el oldeu er a rengul a Jehovah. Sel doruul el uaisei e kede mo merael el oltirakl er a cheldebechelel a Jehovah e diak bo demesaul el meruul a ungil.