Ngsoam el mo medengelii a ngar medam el klebesei? Tia el uldasu a betok a rechad el sorir el mo medengelii. Te betok a rechad el ulemlaoch a tekoi el kirel mo er ngii, engdi ngmlo kakerous a otutel a ulochir. Ka momtab aika el beldukl er iou:

• A RE SCIENTIST a ousbech a ileakl el klekedall me a klou el chitel a udoud el omlaoch el kirel a kakerous el tekoi, el uai a kmo ngmekerang a omengikiongel e ngar er ngii a bo letemellii er a beluulechad, me a lechub e ngmo metengel a chull er a basio el omkiei er ngii er a klukuk ngdiak.

• A RECHAD EL MEDUCH EL MERRITER A TEKOI a omlaoch el kirel a orretel a tekoi er a siobai me a balatiks. A Warren Buffett, el ta er a merau el chad er a beluulechad a mlungakl el leko ngprofet el ungil el orretel a siobai er ngii a uchul. A Nate Silver el ta er a chad el merriter a tekoi a milsaod a belkul aike el omesuub el mileketmokl el kirel a kakerous el tekoi, el ngilsuir el mo omlaoch el kirel a betok el tekoi, el uldimukl er ngii a balatiks er a beluu er a Merikel el mo lmuut er a remelai a nguked er a omeruul el movie er a Hollywood.

• A TEKOI EL MILDUNG ER A IRECHAR a lulsaod a belkul a rebebil el uai a le ulaoch. Me a rebebil er a rechad a omes a otutel er chelecha el taem el ngar er aike el diak el sal bleketakl el tekoi el lulluches a Michel de Notredame (Nostradamus) er a bekord el 450 el rak er a uchei. A calendar er a rechad er a Maya a mlo tmurk a temel er a December 21, 2012, e a rebebil el chad a ulemes er ngii el kmo ngmle olengchelel a klou el omelodech el mo er ngii er a beluulechad.

• A REMENGETEKLEL A KLECHELID a lebebil er a taem e te omlaoch el kirel aike el tellemall el mo er ngii er a beluulechad e omeklatk er a rechad e dirrek el mengudel er a rultirakl er tir. A profet el kirel a klou el tellemall el mo er ngii er a beluulechad el Harold Camping me a rultirakl er ngii a ulemerk el kmo tia el chutem a mo metemall er a 2011. Engdi tia el beluulechad a dirk medechel er chelechang.

• A RECHAD EL LEKO NGAR ER NGII A ILEAKL EL KLISICHIR EL OMLAOCH a melekoi el kmo ngar er ngii a duch er tir el mo medengelii a ngar medad el klebesei. A Edgar Cayce me a Jeane Dixon a millekoi a bebil er a tekoi el mlo er ngii a klemerang el otutel el kirel a tekoi el dilubech er a chelsel aike el mereko el dart el rak. Tirka el teru el chad a dirrek el ulemlaoch a betok el tekoi el dimlak bo letaut. El uai tiang, a Dixon a ulemlaoch el kmo a uchelel a Ongedei el Mekemedil a Beluulechad a mle kirel el mo er ngii er a 1958, e a Cayce a ulemlaoch el kmo a New York a mo rusors er a daob el ngar er aike el rak er a 1970.

Me ngar er ngii a mera el rolel e ngsebechem el mo ungil el medengelii a ngar medam el klebesei? Tiang a kmal ungil el ker. A lsekum e ngsebechem el mo medengei aike el tekoi el mo er ngii er a ngar medam el klebesei, e tiang a ngar er ngii a bo lerellii el kirel a klengar er kau me aike el tekoi el obo molilt el mo meruul.