SESEI el taem er a uchei e a ta el mesisiich el tekoi a tilobed er a simbung er a Korea el The Chosun Ilbo. Nguleker er a ker el kmo: “‘A Kedung el Shim Cheong,’ el Dimlak Lodengelii a Jesus​—Ngmlo er a Beluu er a Ngau?”

Tia el tekoi a mle sebechel el ongasech a rengrir a rechad, e le ngika el Shim Cheong a mle kekerei el redil el ngar er a cheldecheduch el chelid er a beluu er a Korea, el tilengetengii a klengar er ngii el olengeseu er a demal el mle meiko. Me ngmla mo betok el rak el rechad a chemat er ngii. Me ngar er a beluu er a Korea e ngika el Shim Cheong a ungil el kerebai el kirir a remekedung el ngalek el redil.

Me ngar er a osengir a rebetok el chad e ngdiak lemelemalt a lsekum a chad el ua omerellel ngika el ngalek a mo obals er a beluu er a ngau e le ngii el dimlak el metecholb el Kristiano. E tia el cheldecheduch a dilubech er a betok el rak er a uchei er a loberk a klumech el kirel a Kristus er a chelsel a belual ngii el ngalek.

Tia el simbung a dirrek el milsaod a tekingel a ta el mengeteklel a klechelid el kirel tia el tekoi. Te uleker er ngii er a ker el kmo, a rokui el chad el mlad el dimlak a techellir el mesuub el kirel a Jesus te mo obals er a beluu er a ngau? Me ngulenger el kmo: “Ngdiak dodengei. Kede di omdasu el kmo nglocha ngar er ngii a moktek er a Dios el kirir a chouaitirka el chad.”

Sel The New Catholic Encyclopedia a melekoi el kmo: “A techolb a klou a ultutelel el kirel a osebeled. El ua ledilu Kristus el kmo, a lsekum a chad a diak lluut el mechell el okiu a ralm me a Chedaol Reng e ngdiak el sebechel el mo soiseb er a Rengedel a Dios (Jn 3.5).” Me ngokiu tiaikid el uldasu e a rebebil a oumerang el kmo a chad el dirkak el metecholb e mad a mo obidokl er a beluu er a ngau me a lechub e ngmo chuarm er a kuk ta er a rolel er a uriul er a lemad.

Engdi te ngar er ngii a rebetok el omdasu el kmo tia el klaumerang a chelsengsang. A rebetok el miliol el chad a mla mad el dimlak lodengelii a Biblia. Me a ker a kmo, tirka te rredemelel a mo chuarm er a diak a ulebengelel el ringel? Ngerang dmung a Biblia el kirel tiang?

A Biblia a bleketakl el ochotii a uldesuel a Dios el kirir a rechad el kiliei el dimlak lodengei a llechul. A Rellir 17:30 a mengelaod er kid el kmo: “Ser a dirkak bo lodengelii a Dios a re chad, e ng di ullechib er a medal.” Me a leuaisei, e ngera el omelatk a mla metib el ngar er a Biblia el kirir tirke el mlad el dimlak a techellir el mo mesuub el kirel a Dios?

A nger a sebeched el metik er ngii er a tekingel a Jesus el mo er a ta er tirke el mekngit el chad el mlad er a bita er ngii. Ngike el chad a dilu er a Jesus el kmo: “Sel bo msiseb er a Rengedem, e lak mobes er ngak!” Me ngera mle nger er a Jesus? Ngdilu el kmo: “Ak mera el dmu er kau er chelecha el sils el kmo, ke mo obengkek el ngar a Baradis.”​—Lukas 23:39-43, New World Translation.

Me a Jesus ngtilbir el mo er ngika el chad el kmo ngmo er a eanged? Ngdiak. Ngika el chad a dirkak el “lluut el mechell” el okiu a “ralm ma Chedaol Reng” el ngii a tekoi el kirel a chad el rullii me bo el sebechel el mo soiseb er a Rengedel a eanged. (Johanes 3:3-6) A Jesus a bai tilbir el kmo ngika el mekngit el chad a lmuut el mo mekiis e mo kiei er a Baradis. Me ngii el mle chad er a Judea a uchul me ngmle medengelii a Baradis el chutem el ngii a sers er a Eden, el losaod er ngii a kot el babier er a Biblia. (Genesis 2:8) Me a telbilel a Jesus a milsang ngika el chad a omelatk el lmuut el mo mekiis e mo kiei er tia el chutem sel lluut el mo Baradis.

A Biblia a meskid a telbiil el kmo “a rokuil chad, el ungil ma re mekngit, a mo mekiis er a kodall.” (Rellir 24:15) A “re mekngit” a tirke el dimlak loltirakl a melemalt el llechul a Dios e le tir el dimlak lodengei aike el tekoi el soal a doruul. Me a Jesus a mo okisii ngika el “mekngit” el chad el milengedecheduch er ngii, me a relmuut el betok el miliol me a lechub e te biliol el chad el tir a mlad el dimlak a techellir el mo medengelii a Dios. E ngar er a chelsel a Baradis el chutem e te mo mesuub el kirel a llechul a Dios e mo er ngii a techellir el mo ochotii a bltkil a rengrir el mo er Ngii el okiu sel bo loltirakl a llechul.

Sel taem el bo lebekiis a remekngit, e te mo mukerrekeriil el kirel aike el mle mekngit el omerellir? Ngdiak. A Rom 6:7 a kmo: “Sel le mad a chad e ng mengubet er a klisichel a klengit.” A “re mekngit” a mengubet er a kngterir sel lemad. Me sel lebekiis er a kodall e te mo mukerrekeriil el oltirakl aike el tekoi el loruul er seikid el taem el diak el ike el tekoi el lurruul er a uchei er a lemad. Me te mekerang e ngmai a klungiolir er tia el tekoi?

Sel lebekiis a remekngit e ngmo er ngii a techellir el mesuub a llechul a Dios el ngii a mo mocholt er sel taem el bo el ‘obiis a babier.’ Te mo mukerrekeriil el ultuil er “a ikel lurruul” el belkul a kmo, te ullengesenges a llechul a Dios me a lechub e ngdiak. (Ocholt 20:12, 13) Me tia el techall a diak el ongeru el techall el kirir a ruumesingd er tirke el mekngit, e ngbai kot el techellir el mo sebechir el mo kiei er tia el chutem el mo cherechar el okiu sel losuub el kirel a Dios e bo loruul a soal.

Tiakid el osisechakl el ngar er a Biblia a mla ngosuterir a rebetok el lmuut el mo oumerang er a Dios. A Yeong Sug a ta er tir. Ngikang a mlukeroul el mesisiich el chad er a Katolik. Te ngar er ngii a rechedal el mle prist. E ngii a mle soal el mo nun, me ngmlo oureor el ngar er a convent. Engdi a uriul e ngtilobed er tia el basio e le ngkmal mlo chetil a omeruul el ulemes el mileketmokl er a chelsel. Me a lmuut el tang, ngkmal dimlak lekengei er a osisechakl el lolisiich er ngii el kmo a rechad a mo chuarm er a beluu er a ngau, e le ngulemes er tia el tekoi el kmo ngdiak lemelemalt e dirrek el diak lolechotel a bltikerreng.

E sola e a ta el odos el Sioning er a Jehovah a ullecholt er a Yeong Sug aika el tekoi el ngar er a Biblia el kmo: “A re chad a medengei el kmo te mo mad, e ngdi rulekoad a diak a ngeral lodengei. Ng diak omeksullir.” (Olisechakl 9:5) Me ngika el odos a ngilsuir el mo medengei el kmo a rechedal el mla mad a diak le ngar er a beluu er a ngau el chuarm. Te bai mechiuaiu e mengiil er a temel a okiis.

Me a Yeong Sug a mlo medengei el kmo te betok a rechad el dirkak bo lodengelii a klemerang er a Biblia, me ngkmal mlo soal a tekingel a Jesus el ngar er a Mateus 24:14 el kmo: “Tial Ebangkelio el kirel ngii el Renged a mo mosisechakl er a beluulchad el rokir el kirel el mo ocholt el mor a rokui el chad, e sola e ng mochu er ngii a ulebongel er a beluulchad.” Me chelecha el taem e ngteloi er a ureor er a berkel a ungil chais e dirrek el ouchais aike el kmal ungil el omelatk el ngar er a Biblia el mo er a rechad.

A Biblia a ouchais er kid el kmo: “A Dios a meral di osisiu er a rengul a re bek el chad. Ma chad er a ngii di le beluu el mengdekudel er ngii e meruul a melemalt a diak bo le chitii.” (Rellir 10:34, 35) Tiaikid a kot el melemalt el kerrekeriil el denguu er a Dios el ngii a ‘soal a llemalt e diak longebirukel.’​—Psalm 33:5.