OMESODEL A SUOBEL ER A MEDAL TIA EL BABIER | A ROLEL E NGMO DMEU A RENGUM ER A UREREM
A Meringel el Ureor—Tiang Tekoi er a Irechar?
A Alex a ta el lotuu a telil e kiderii a baks el lotungii er a chelsel a torak e melatk el kmo, ‘Tia mera el chetik el ureor. Ngoingerang e ngmo ungilbesuk? Ngkmal mo ungil a klengar er ngak oleko ngmo diak kuureor!’
A rebetok el chad er chelechang a di ua uldesuel a Alex el chetirir el meringel el oureor. A Aron el oureor el meruul a mlai a dilu el kmo: “A rebetok el chad a omdasu el kmo ngdiak el kirir el meruul aike el ureor el di urerir a rechad el diak a duch me a klemedengei er tir. Te di omdasu el kmo: ‘Ak di meruul er tia el ureor el mo lmuut er sel taem el kbetik er a ungil el urerek.’”
Ngera uchul me a rebetok a chetirir el meringel el oureor? Alta ngmla mengodech a uldesuir e le tir el di omes a TV me a mubi el blechoel el melisiich a ungilbesul el rolel a klengar. A Matthew el oureor el chad er a maintenance, a kmo: “A rechad a omdasu el kmo, a chad el di kirel el meringel el oureor a mekngit a klengar er ngii.” Me a Shane el oureor el janitor a kongei er tia el tekoi me ngdmu el kmo: “A rechad a sorir el uduudel el kirel a ta el sils engdi ngdiak el sorir el oureor el ta el sils.”
Me nguaisei, engdi te ngar er ngii a rebetok el ungil a klengar er tir e dmeu a rengrir er a meringel el urerir. A 25 a rekil el Daniel el oureor er a construction a kmo: “A meringel el urerem a mo uchul a omeksullem sel sekum e ngmelemalt a uldesuem e meruul er ngii.” Me a 23 a rekil el Andre a kongei er tia el uldasu me ngdmu el kmo: “Ak uumerang el kmo a deurreng er kid a mo er ngii el okiu a ureor el doruul er ngii. A lsekum ngmo diak moureor e ngmo diak a deurreng er kau e bai di uchul e ngmo seselk a rengum!”
Te milekerang a rechad el ua Daniel me a Andre e mo melemalt a uldesuir el kirel a meringel el urerir? A beot el omesodel a kmo, te oltaut a omellach er a Biblia er a chelsel a klengar er tir. Me a Biblia a melisiich er a blakerreng me a ducherreng el rullii a chad me ngsebechel el meringel el oureor e diak bo el mechitechut a rengul. Engdi a Biblia a diak di losaod el kmo ngkired el oureor e merekong, ngdirrek el ochotii er kid a rolel e ngsebechel el dmeu a rengud el meruul a urered.
Ngera el omellach er a Biblia a sebechel el ngosukau el mo dmeu a rengum er a urerem? Aki olengit er kau me bo molatk a bebil er ngii el omellach, el bo dosaod er a ongingil el suobel.
