A Jehovah a Dios er a Bltikerreng

“A Dios a bltikerreng.”​—1 JN. 4:8, 16.

CHELITAKL: 18, 51

NGSEBECHEM EL ONGER?

Ngera ngrullii a bltkil a rengul a Dios el mo er tirke el olengesenges er ngii?

Ngmla mekerang a Jehovah e ochotii a bltkil a rengul el mo er tirke el mlo er a klengit?

Ngmekerang a Renged e meketeklii a bltkil a rengul a Dios el mei er kid?

1. Ngera kot el ngarbab el blekerdelel a Dios? Ngmo ua ngera uldesuem el bedul ngii sel bo modengelii tia el blekerdelel?

 A BIBLIA a subedid el kmo a “Dios a bltikerreng.” (1 Jn. 4:8) Engdi tiang ngera belkul? A bltikerreng a diak di el ta er aike el betok el ungil el blekerdelel a Jehovah, e ngbai sel kot el ngarbab el blekerdelel. Me ngdiak lebelkul a kmo ngoba bltikerreng, e Ngii a bai bltikerreng. Me a bltikerreng a uchetemel a rokui el tekoi el loruul. Me kede kmal oba omereng el saul e le ngbltkil a rengul a uchul me ngulemeob er tia el beluulechad me a melidiul me a rokui el outeliil el ngar er a chelsel!

2. A bltkil a rengul a Dios el kired ngoterekokl a rengud el kirel a ngerang? (Momes er a siasing er a uchelel a suobel.)

² A Jehovah a ungil a rengul e semeriar er a rokui el blebelel. Me a bltkil a rengul el bedul kid a oterekeklii el kmo a moktek er ngii el kirel a klechad a mo tmaut el oltirakl er sel kot el ungil el rolel er ngii. E tiang a mo uchul a klou el deurreng er tirke el olengesenges er ngii. El ua tiang, ngbltkil a rengul a Jehovah a uchul e “ng mla tutkii a sils el  bo loukerrekeriil er a beluulchad el rokir el oba llemalt, el okiu a tal chad el bla le ngiltii” el ngii a Jesus Kristus. (Rel. 17:31) Me ngulterekokl a rengud el kmo tia el kerrekeriil a mo meketmokl. Me ngbelkul a kmo tirke el bekongesenges a mo chormii a kot el ungil el rolel a klengar er a ngar mederir el klebesei el mo cherechar.

AIKE EL BLA LEBEKETAKL A REKSI

3. Ngmo ua ngera blekeradel a lsekum a Dios a diak el betik a rengul er a klechad?

³ Ngmo ua ngera blekeradel er a klechad er a ngar medad a lsekum a bltikerreng a diak el kot el ngarbab el blekerdelel a Dios? Ngbelkul a kmo a rechad a melemolem el mengedereder, e tirkang a mekesuseu er a blekerdelel ngike el kot el mekngit e mui er a kltui el Satan el Diabelong. (2 Ko. 4:4; 1 Jn. 5:19; monguiu er a Ocholt 12:9, 12.) Me a ngar medad el klebesei a kmal mo mekngit a lsekum a Jehovah a diak el betik a rengul er kid!

4. Ngera uchul me a Jehovah a milecherei a ultok el kirel a omengederederel me ngmelemolem?

⁴ Me a Satan er sera bo lomtok er a omengederederel a Dios e ngmilengesuseu er tirke el kot el demad me a delad el mo omtok. Ngmilsemai er a llemeltel a Jehovah el mengedereder er tia el beluulechad me a melidiul, e millekoi el kmo a omengederederel a lmuut el ungil er a omengederederel a Dios. (Gen. 3:1-5) A Jehovah a mle mellomes a rengul me ngmilecherei a Satan me ngousbech er a telkib el taem el melasem el ochotii el kmo ngklemerang a tekingel me a lechub e ngdiak. Engdi a tekoi el meketmeklang er chelechang a ochotii el kmo ngkmal diak el sebechel a ngii di el chad me a lechub a Satan el mo ungil el mengedereder.

5. Ngera ngmla meketeklii a reksi er a klechad?

⁵ Me chelechang e a beluulechad a kmal di merael el mo mekngit. Te betok er a 100 el miliol el chad a mla mad er a mekemad el mla er ngii er a chelsel aika el mereko el 100 el rak. Me a Biblia a mesaod er tia el taem er a uriul el sils el kmo: “A re mekngit el chad ma re chad el omerk a diak le meral osisechakl, a mekngit e merael mengal mo mekngit.” (2 Ti. 3:1, 13) A Biblia a dirrek el mesaod el kmo: “RUBAK, ak medengei el kmo ng diak a chad el medengelii a le bor ngii er a ngar medal, e diak a chad el sebechel el chodereder a blekeklel.” (Jer. 10:23) Me a reksi er a klechad a oterekeklii el kmo aika el tekoi a kmal klemerang. A Jehovah a dimlak lomeob er a rechad el di tir el mengedereder er tir el diak lousbech a ulekrael er ngii.

6. Ngera uchul me a Dios a ulemechei a mekngit?

⁶ Me a Jehovah a ulemechei a mekngit me ngmelemolem el telkib el taem me bo el sebechel el meketeklii el kmo a omengederederel a kot el ungil el omengedereder el diak a sebechel el mekesiur. Me a ngar medad el klebesei e ngmo okngemed a rokui el mekngit er tia el beluulechad. E a uriul el taem, e a lsekum a ngii di el chad a melsemai er a omengederederel, e a Dios a di mereched el mo okngemedii. Ngsebechel el ousbech er a reksi er a klechad el meketeklii el kmo tirka el omtok a kirir el di mereched el nguemed me a klengit me ngkirel el mo nguemed el mo cherechar.

NGERA NGMLA RULLII A DIOS EL OCHOTII A BLTKIL A RENGUL?

7, 8. Ngmilekerang a Jehovah e ochotii a klou el bltkil a rengul?

⁷ A Jehovah a mla meketeklii a bltkil a rengul el okiu a kmal betok el rolel. Ka di molatk er a klungel me a klebekelel tia el melidiul. Ngmilebii el ngar er ngii a betok el biliol el galaxy, e a derta er ngii a ngar er ngii a betok el biliol el btuch me a planet er a chelsel. Me tia el sils el domes er ngii a ngar er a chelsel a galaxy el dekiei er ngii el ngklel a Milky Way. Me oleko ngdimlak lebebii a sils, e ngdiak el sebechel el mo er ngii a klengar er tia el beluulechad el dekiei er ngii. Me aika el bleob a meketeklii el kmo, a Jehovah a ngike el Ulemeob er kid. Ngdirrek el olechotel a klisichel me a llemesel a rengul me a bltkil a  rengul. Ngmera el tekoi, “a ikel diak el moues el blekerdelel a Dios el diak a ulebengelel el klisiich ma klechelid er ngii a mla moues el bleketakl; kede mes el ngar a ikel le bileob a Dios.”​—Rom 1:20.

⁸ A Jehovah a milebii tia el beluulechad el ileakl el kirel el ngar er ngii a klengar er a chelsel. Me a rokui el tekoi er a chelsel a di mo uchul a klungiolir a rechad me a charm. Ngrirellii a klebokel el sers el mo delengcheklir a rechad e ulemeob er tir el mle cherrungel a uldesuir me a bedengir el sebechir el kiei el mo cherechar. (Monguiu er a Ocholt 4:11.) Me a lmuut el tang, “ng omsa kelel a bek el ngar ngii a klengar er ngii el bleob, a bltkil a rengul a diak a ulebengelel.”​—Psa. 136:25.

9. Alta e a Jehovah a Dios er a bltikerreng, engdi ngouketui a ngerang?

⁹ A Jehovah a Dios er a bltikerreng, e kmal ouketui a mekngit. Me a Psalm 5:4-6 a mesaod er a Jehovah el kmo: “Ele kau a diak mDios el dmeu a rengum er a delengerenger . . . kouketui er a rokui el meruul a mekngit.” Ngdirrek el ouketui er a “re merserasech a chimorir ma re cheblad el chad.”

A ULEBONGEL ER A KLENGIT A KMEDANG

10, 11. (a) Ngera mo duubech el mo er a remekngit el chad? (b) A Jehovah ngmekerang a bo lomesterir a omeksullir tirke el bekongesenges?

¹⁰ Me ngar er a ungilbesul el temel a Jehovah e ngmo okngemedii a mekngit el blekeradel er tia el beluulechad, e le ngii a Dios er a bltikerreng me ngkmal ouketui a mekngit. Me ngokiu a Tekingel e ngtibir el kmo: A “re dengerenger a mo modik. Ngdi telkib kung, e a re dengerenger a mo dibus; ke mo osiik er tir, ngdi mo diak ke betik er tir.” Me a recherrouel a Jehovah a “mo nguemed el di ua chat.”​—Psa. 37:9, 10, 20.

¹¹ A Tekingel a Dios a dirrek el tibir el kmo: “A re melemalt a mo ungilbesrir el kiei er a chelsel a beluu e mo oubeluu er ngii el di blechoel.” (Psa. 37:29) Me a reblak a rengrir el chad a “mo ungilbesrir el kiei el ngar a beluu el ungil a rengrir er a cherrungel budech.” (Psa. 37:11) E ngera uchul? E le ngika el betik a rengul el Dios a di blechoel el meruul a tekoi el mo uchul a klungiolir a reblak a rengrir el mesiungel. Me a Biblia a subedid el kmo: “Ng mo smuld a rokui el chiuosech er a mederir. Ng dikea lluut el mor ngii a kodall, e mo diak a klengiterreng, ma langel, ma ringel. A di mla tekoi a mla mo diak.” (Och. 21:4) Tiang a mera el ungil el tekoi er a ngar medad el klebesei el kirir tirke el oba omereng el saul el kirel a bltkil a rengul a Dios!

12. Te rua techa tirke el “ungil chad”?

¹² A Biblia a ouchais el kmo: “Mutebengii a ungil chad, e momes er a melemalt el chad; a budech el chad a ngar ngii a ruldidellel a rsechel; ngdi re mekngit el chad a di mo metemall, ma ruldidellel a rsechir a di nguemed.” (Psa. 37:37, 38) A “ungil chad” a mo medengelii a Jehovah me a Ngelekel e mo olengesenges er tir e meruul a soal a Dios. (Monguiu er a Johanes 17:3.) Ngoumerang el kmo: “A beluulchad ma ikel rokui el ngar a chelsel, el lesal ngemokel a rengrir a re chad er ngii, a di mei el remiid; e ngdi ngikel meruul a ikel odeuir a rengul a Dios a di melemolem er a klengar er ngii el diak a ulebengelel.” (1 Jn. 2:17) Me a ulebongel er a beluulechad a kmal kmedang me ngklou a ultutelel el kired el ‘otilii omeltked er a RUBAK e olengesenges a llechul.’​—Psa. 37:34.

A KOT EL NGARBAB EL OLECHOTEL A BLTKIL A RENGUL A DIOS

13. Ngera kot el ngarbab el olechotel a bltkil a rengul a Dios?

¹³ Me alta e ngdiak demecherrungel engdi ngsebeched el olengesenges er a Dios. Ngdirrek el okiu a olubet el tengetengel a Jesus e ngsebeched el mekur a kmes el deleuill er kid me a Jehovah, e tiang a kot el ngarbab el olechotel a bltkil a rengul a Dios. A Jehovah a kiltmeklii tia el olubet el tenget me bo el sebechir a rebekongesenges el chad el mengubet er a belsel a klengit me a kodall. (Monguiu er a Rom 5:12; 6:23.) A Jesus a  mle blak a rengul el mo er a Dios el kmal kemanget el taem er a lengar er a eanged. Sei a uchul me a Jehovah a mle ulterekokl a rengul el kmo a Ngelekel a mo melemolem el blak a rengul er sera lemei er a chutem. Me a Jehovah a di ua betik a rengul el Chedam el kmal mlo mekngit a rengul er a lomes a mekngit el omerellir a rechad el mo er a Ngelekel. Me nguaisei, engdi a Jesus a mle blak a rengul el melisiich er a llemeltel a Demal el mengedereder, e dirrek el ulechotii el kmo a cherrungel el chad a sebechel el melemolem el blak a rengul el mo er a Dios el mo lmuut er a taem el lebo lechelebangel a meringel el blekeradel.

14, 15. Ngera ngrullii er a klechad a kodellel a Jesus?

¹⁴ A Jesus a chilarm a betok el ringel, engdi ngmillemolem el blak a rengul el mo er a Dios el mo lmuut er a kodellel, el meketeklii el kmo ngkmal soal a omengederederel a Dios. Me ngkmal kired el oba omereng el saul e le ngkiltmeklii a olubet el tenget el uchul me a rechad a sebechir el mo kiei el mo cherechar er a chelsel a beches el beluulechad er a Dios! A apostol el Paulus a milsaod er a bltkil a rengul a Jehovah me a Jesus el mocholt el okiu a olubet el tenget el kmo: “Ele ser a dirk lak a klisiched, e a Kristus a mlad el kirir a re mekngit el chad er isel belsechel el lulterkeklii a Dios. Ng meringel el tekoi er a chad a le mad el kirel a melemalt el chad, e ngdi a lta e a chad a mo kongei el mad el kirel a ungil chad. E ngdi Dios a ulechotii a bltkil a rengul er kid, ele ser a dirk de ngar a klengit, e a Kristus a mlad el kired.” (Rom 5:6-8) A apostol el Johanes a milluches el kmo: “A Dios a ulechotii a bltkil a  rengul er a loderchii a di tal Ngelekel el mer a beluulchad, me bo dokiu ngii el mo nguu a klengar. Tiakid a bltikerreng el kmo, ng diak le kid a mle betik a rengud er a Dios; ng bai Dios a mle betik a rengul er kid me ng ulderchii a Ngelekel, el doeak ngii e ng musubes a kngtid.”​—1 Jn. 4:9, 10.  

¹⁵ A Jesus a dilu el kmo: “Ele Dios a kmal mle betik a rengul er a beluulchad me ng milsa di tal Ngelekel, me tirkel rokui el mo oumera er a Ngelekel a Dios a diak le mad e bai mo ngar el diak a ulebengelel.” (Jn. 3:16) Me alta e ngkmal mle meringel er a Jehovah, engdi ngkilengei el tongetengii a klengar er a Ngelekel el mo olubet. Me tiang a ochotii a delechel a bltkil a rengul el mo er a rechad. E ngii el bltkil a rengul a di melemolem el mo cherechar. A Paulus a milluches el kmo: “Ele kungil el medengei el kmo ng ka le kodall, ma ka le klengar, ma ka le re anghel, ma ka le omengedereder, ma ka le tekoi er chelechang ma ka le tekoi er a ngar medad, ma ka le klisiich, ma ka le beluulchad er bab, ma ka le beluulchad er iou; ng kmal diak a ngera el ngar a rokuil bleob el mo sebechel el choridid er a bltikerreng er a Dios el ngar a Kristus Jesus el Rubak er kid.”​—Rom 8:38, 39.

A RENGEDEL A DIOS A MENGEDEREDER ER CHELECHANG

16. Ngera Rengedel a Dios, e a Jehovah ngmla tutkii techang el mo Mengedereder er ngii?

¹⁶ A Rengedel a Dios a kabelment el longedereder er ngii a Mesias e ta er a olechotel a bltkil a rengul a Jehovah el mo er a klechad. El okiu a ngera el rolel? A Jehovah a mla tutkii a Jesus Kristus el mo mengedereder er tia el renged, e ngii a betik a rengul er a klechad e rredemelel a mo mengedereder. (Osi. 8:31) Ngdirrek el melilt er a re 144,000 el chad el tir a mo mengedereder el obengkel a Kristus el ngar er a eanged. Me sel lebekiis er a kodall e te mo er a eanged el dirk ngar er ngii a klemedengei er tir er a tekoi el lechilebangel er a dirk lechad. (Och. 14:1) A Jesus er a lengar er a chutem e a Renged a mle uchetemel a osisecheklel. Ngdirrek el ullisechakl er a redisaiplo er ngii el meluluuch el kmo: “Demmam el ngar a eanged: Bo le modanges a chedaol ngklem; a Rengedem le mei; bo le motaut a soam er a beluulchad el ua ingii er a eanged.” (Mt. 6:9, 10) Me kede kmal omes el beduluchei el kirel a otutel tia el nglunguuch, el ngii a taem el Rengedel a Dios a mo kutmokl a betok el klengeltengat el kirel a klechad!

17. Ka momekesiu er a omengederederel a Jesus el mo er a omengederederir a rechad.

¹⁷ Ngar er ngii a klou el klekakerous er a omengederederel a Jesus me a omengederederir a rechad. A omengederederir a rechad a mla mo uchul a mekemad el mekodeterir a rebetok el miliol. Engdi ngike el mengedereder er kid el Jesus a mera el betik a rengul er kid e oukerebai aike el kot el ungil el blekerdelel a Dios el ileakl a bltkil a rengul. (Och. 7:10, 16, 17) Me ngdilu el kmo: “Mer ngak, kemiu el rokui el chorma er oberaod el chelungel, e ak mo meskemiu a ulengull. Mnguu ongelungel er ngak el cholngii, e mosuub er ngak, ele ngak a medemedemek e ngariou a renguk; me kom mo metik er a ulengelliu. Sel ongelungel el bo kumeskemiu a beot, me sel chelungel el bo kumatk er ngii er kemiu a kebekakl.” (Mt. 11:28-30) Tiang a mera el olechotel a klou el bltikerreng!

18. (a) Ngera el tekoi a meketmeklang el ulemuchel er a rak er a 1914? (b) Ngera kede mo mesaod er a ongingil el suobel?

¹⁸ Me a Biblia a meketeklii el kmo a Rengedel a Dios a ulemuchel el mengedereder el ngar er a eanged er a rak er a 1914. Me sel taem el me lmuut er chelechang, e ngmelemolem el ngar er ngii a omengudel er tirke el mo mengedereder el obengkel a Jesus el ngar er a eanged me a “kloul seked” er a rechad el tir a mo suobel er a ulebongel er tia el mekngit el blekeradel, e mo soiseb er a beches el beluulechad. (Och. 7:9, 13, 14) Me ngua ngera klungel tia el seked er chelechang? E ngera soal a Dios a bo loruul? A ongingil el suobel a mo mesaod el kirel aika el ker.

[Aike el Ker er a Suobel]