Da say funn feiyah maynd vekk gebutzt sei fa’immah. ’Sis saym es Gehenna, avvah nett saym es di hell, koss hell maynd yusht da grawb.

Nett en rechtah say

 Di fimf verses in di Bivvel es “da say funn feiyah” menshind veist es es shtayt fa ebbes shunsht un is nett en rechtah say. (Offenbarung 19:20; 20:10, 14, 15; 21:8) Dee sacha vadda in da say funn feiyah kshmissa:

•   Da Deivel. (Offenbarung 20:10) Da Deivel is en spirit person, so eah kann nett vay gedu sei mitt feiyah.​—2 Mosi 3:2; Richtah 13:20.

•   Da doht. (Offenbarung 20:14) Dess is nett ebbes es ma sayna adda shpiahra kann avvah es maynd yusht ’sis kenn layva datt, un’s kann nix haebna adda gedu vadda. (Breddichah 9:10) Da doht is nett ebbes es ufgebrend sei kann.

•   ’S “diah” un “da falsh brofayt.” (Offenbarung 19:20) Siddah es dee shtayn fa ebbes shunsht, dayt’s nett yusht sense macha es da say funn feiyah vo si nei kshmissa vadda aw shtayt fa ebbes shunsht?​—Offenbarung 13:11, 12; 16:13.

Vekk gebutzt sei fa’immah

 Di Bivvel sawkt es da say funn feiyah shtayt fa “da zvett doht.” (Offenbarung 20:14; 21:8) Da eahsht doht es gmenshind is in di Bivvel is kumma koss es da Adam ksindicht hott. Deah doht is nett fa’immah koss leit kenna viddah zrikk zu layva kumma. Un deah doht zayld no endlich vekk gnumma vadda bei Gott.​—1 Korinther 15:21, 22, 26.

 Da say funn feiyah shtayt fa en diffandah doht, da zvett doht. Es maynd aw si vissa nix, avvah’s is diffand koss di Bivvel sawkt nix veyyich es leit zrikk zu layva kumma funn da zvett doht. Fa’n example, di Bivvel sawkt es da Jesus hott “di shlisla zu di hell un em doht,” un sell veist eah hott’s recht fa leit ufvekka funn da doht es kumma is deich es da Adam ksindicht hott. (Offenbarung 1:18; 20:13) Avvah, nimmand hott da shlissel zu da say funn feiyah, nett even da Jesus. Sellah say funn feiyah shtayt fa ayvich punishment un sell maynd vekk gebutzt sei fa’immah.​—2 Thessalonicher 1:9.

Gehenna is saym es di Valley funn Hinnom

 Gehenna (Greek geʹen·na) is 12 moll in di Bivvel. Yusht vi da say funn feiyah, es maynd vekk gebutzt sei fa’immah. Dayl Bivla yoosa’s vatt “hell,” avvah Gehenna is diffand funn hell (Hebrew sheʼohlʹ, Greek haiʹdes).

 ’S vatt “Gehenna” aekshli maynd “Valley funn Hinnom,” un voah en valley yusht autseit Jerusalem. In Bivvel zeida, henn di leit funn di shtatt iahra trash datt anna gnumma. Si henn di gans zeit en feiyah am gay katt datt fa’s trash fabrenna, un di veahm henn ennich ebbes ufkfressa es nett fabrend ganga is bei’s feiyah.

 Da Jesus hott Gehenna gyoost fa mayna es zayld vekk gebutzt sei fa’immah. (Matthäus 23:33) Eah hott ksawt datt is vo da “voahm nett doht gayt un’s feiyah nett ausgmacht vatt.” (Markus 9:47, 48) Eah voah am shvetza veyyich vi’s is in di Valley funn Hinnom, un aw funn da prophecy an Jesoiya 66:24, es sawkt: “Si zayla naus gay un di dohda leit sayna es sich geyyich mich kshteld henn. Iahra voahm gayt nett doht, un iahra feiyah vatt nett aus gmacht.” Da Jesus sei illustration maynd nett torture adda brenna fa’immah, avvah maynd gans vekk gebutzt sei. Di veahm un’s feiyah butza dohdi animals, adda dohdi bodies vekk, nett leit es noch am layva sinn.

 Di Bivvel sawkt nett es ennich ebbah zrikk kumd funn Gehenna. “Da say funn feiyah” un “hell-feiyah” adda Gehenna shtayn awl zvay fa vekk gebutzt sei fa’immah.​—Offenbarung 20:14,15; 21:8; Matthäus 18:9.

Vi “vadda si kshtrohft dawk un nacht fa immah un immah”?

 Vann da say funn feiyah maynd vekk gebutzt vadda, favass dutt di Bivvel sawwa es da Deivel, ’s leshtah-diah, un da falsh brofayt vadda “kshtrohft dawk un nacht fa immah un immah”? (Offenbarung 20:10) Gukk moll an dee fiah reesins es dess nett aekshli maynd vay gedu vadda adda soffahra:

1.   So es da Deivel kshtrohft vadda kann fa’immah muss eah levvich kalda sei fa’immah. Avvah, di Bivvel sawkt es eah zayld zu nix gebrocht vadda, adda nimmi may sei.​—Hebräer 2:14.

2.   Ayvich layva is en kshenk funn Gott, nett en punishment.​—Römer 6:23.

3.   ’S leshtah diah un da falsh brofayt shtayn fa ebbes shunsht un kenna nett aekshli kshtrohft vadda.

4.   Di Bivvel veist es da shtrohf fa da Deivel maynd yusht es eah zayld vekk gebutzt sei fa’immah.

 ’S vatt es gyoost vatt in di Bivvel fa “shtrohf” adda torment kann aw mayna “zrikk hayva” adda eikshpatt sei. Fa’n example, ’s Greek vatt fa “tormentors” es gyoost vatt in Matthäus 18:34 is “jail-haldah” in di Pennsylvania Deitsh Bivvel un aw in feel anri Bivla. Un sell veist es “shtrohf” un “tormentor” awl zvay’s saym ding mayna. Noch en example is in Matthäus 8:29 un Lukas 8:30, 31. ’Sis awl zvay da saym account, avvah si yoosa “blohwa” un ‘da deef brunna vo kenn bodda hott’ fa shvetza veyyich’s saym ding. Es is en blatz vo goah nix gedu sei kann, un maynd yusht doht sei. (Römer 10:7; Offenbarung 20:1, 3) Offenbarung yoost alsamohl vadda so vi “blohwa” adda “shtrohf” fa shtay fa ebbes shunsht.​—Offenbarung 9:5; 11:10;18:7, 10.