Jehova hott di eaht zu mensha gevva. ’S is unsah haymet. Fa sellah reesin, di eahsht couple, da Adam un di Ayfaw, voahra nett gmacht fa da himmel uf filla​—Gott hott shund engel gmacht katt fa in da himmel voona. (Hiob 38:4, 7) Avvah, Gott hott da eahsht mann gnumma un hott een inna shayni paradise gedu es Goahra-Ayden kaysa voah. (1 Mosi 2:15-17) Jehova hott een un awl sei nohch-kummashaft di gleyyaheit gevva fa layva enjoya uf di eaht fa’immah.​—Lays Psalm 37:29; 115:16.

Yusht da Goahra-Ayden voah en paradise fa shteahra mitt. Di eahsht couple voah ksawt gvest fa di eaht filla mitt iahra kinnah. Mitt zeit, voahra see gezayld fa acht gevva uf di gans eaht un’s zu’n paradise macha. (1 Mosi 1:28) Di eaht zayld immah do sei. Es zayld immah mensha iahra haymet sei.​—Lays Psalm 104:5.

Vatsh da video Favass Hott Gott di Eaht Gmacht?

Da Adam un di Ayfaw henn nett Gott keicht, so Jehova hott si aus da goahra gedu. Paradise voah faloahra, un kenn mensh hott selayva’s zrikk bringa kenna. Di Bivvel sawkt’s land is “in di hend funn di ungettlicha” kfalla.​—Hiob 9:24.​—Lays 1 Mosi 3:23, 24.

Hott Jehova ufgevva in vass eah hott vella fa mensha fa shteahra mitt? Nay! Eah is Awlmechtich. Eah zayld’s du. (Jesoiya 45:18) Eah zayld mensha zrikk bringa zu da vayk es eah’s hott vella funn da shteaht.​—Lays Psalm 37:11, 34.

Deich di zeit es da Jesus am roola is es Gott Sei Kaynich, zayld di eaht viddah zrikk gedrayt vadda zu’n paradise. Da Jesus zayld Gott sei engel fiahra inna greek es Harmagedon  hayst, un awl selli vekk butza es geyyich Gott sinn. No zayld da Satan gebunna vadda bei da Jesus fa’n dausend yoah. Gott sei leit zayla nett umgebrocht vadda. Da Jesus zayld si geida un acht gevva uf si. Si zayla ayvich layva enjoya in di Paradise uf di eaht.​—Lays Di Offenbarung 20:1-3; 21:3, 4.

Vann zayld Gott di veeshti sacha uf di eaht zu’n end bringa? Da Jesus hott en “zaycha” gevva fa veisa vann’s end nayksht is. Vann di veld oh’hald vi’s is nau, kend’s mensha zu nix bringa. Dess veist aw es miah nayksht an’s “end funn di veld” sinn.​—Lays Matthäus 24:3, 7-14, 21, 22.

In di dausend yoah vann da Jesus am roola is funn da himmel ivvah di eaht, zayld eah awl’s soffahres zu’n end bringa. (Jesoiya 9:6, 7; 11:9) Da Jesus zayld Kaynich sei, un aw en Hohchen-Preeshtah sei un zayld di sinda vekk nemma funn selli es leevi henn fa Gott. So, deich da Jesus zayld Gott awl di grankeda vekk nemma un ma zayld nimmi ald vadda adda shtauva.​—Lays Jesoiya 25:8; 33:24.

Leit vo Gott heicha, zayla in di Paradise voona. (1 Johannes 2:17) Da Jesus hott sei yingah naus kshikt fa gukka fa daymeedichi leit un si lanna vass si du kenna fa Gott pleesa. Heit, sinn millions funn leit am lanna funn Jehova, vi si layva kenna in di Paradise uf di eaht es am kumma is. (Zephania 2:3) An di Fasamling-Bletz vo Jehova Sei Witnesses zammah kumma, doon leit lanna vi fa’n bessahrah mann un daett sei, un vi fa’n bessahri fraw un maemm sei. Kinnah un eldra doon mitt nannah lanna vi di goodi sacha funn di Bivvel si helfa kann en bessah layva havva.​—Lays Micha 4:1-4.