Diffahndi problems zayla uf kumma vi diah eiyah layva shteahret mitt-nannah. Si mechta kumma funn da diffahns in vi diah denket, feelet, un sacha ohgukket. Adda, di problems mechta kumma funn eitz shunsht un funn sacha es ma nett ekshpekt hott.

Ma vett fleicht fagessa es ma problems hott, avvah di Bivvel sawkt miah sedda boviahra unsah problems ausshaffa. (Matthäus 5:23, 24) Da besht vayk fa eiyah problems ausshaffa, is bei sacha du vi Jehova havva vill.

VASS DI BIVVEL SAWKT: “Es is . . . en zeit fa shvetza.” (Breddichah 3:1, 7) Machet shuah es diah zeit shpendet shvetza veyyich da problem. Sawk dei partner vi du reeli feelsht un vass du aekshli denksht veyyich da problem. Doond immah yusht “di voahret” sawwa zu nannah. (Epheser 4:25) Even vann diah bays sind, boviahret hatt fa nett shteahra maula. Zrikk ensahra inna shaynah vayk kann eich helfa’s fashvetza un’s halda funn drayya zu en grohsah argument.​—Shpricha 15:4; 26:20.

Even vann du nett agreesht, sei goot-maynich un fagess nee nett fa leevi un respekt veisa zu dei partner. (Kolosser 4:6) Boviahret da problem ausshaffa so kshvind es diah kennet un doond nett shtobba shvetza mitt-nannah.​—Epheser 4:26.

VASS DU KANSHT:

• Pikk di besht zeit fa shvetza veyyich da problem

• Vann’s dei partner sei turn is fa shvetza, du nett innarobda. Du griksht shund dei turn fa shvetza

VASS DI BIVVEL SAWKT: “Seind eahnshtlich in nannah . . . leevi gevva, un achtet anri haychah es eich selvaht.” (Römer 12:10) Da vayk es du abheichsht is reeli importand. Inna daymeedichah vayk, boviah fashtay vi du feela daytsht vann du in dei partner sei blatz veahsht. (1 Petrus 3:8; Jakobus 1:19) Du nett yusht ohlossa du veahsht am abheicha. Vann du kansht, shtobb vass am du bisht un heich ab zu vass dei partner hott fa sawwa, adda frohk eb diah shvetza kennet diveyya shpaydah. Vann du dei partner ohguksht es dei friend un nett dei enemy, no zaylsht du “nett kshvind bays vadda.”​—Shpricha 16:32.

VASS DU KANSHT:

• Hald oh abheicha un boviah sacha ohgukka vi dei partner dutt, even vann du nett gleichsht vass du heahsht

• Heah may es yusht di vadda. Nohdes dei partner sei aekshins un sei shtimm

VASS DI BIVVEL SAWKT: “Selli es hatt shaffa greeya ebbes gedu, avvah selli es yusht shvetza diveyya vadda oahm.” (Shpricha 14:23) Yusht agreeya uf’n goodah plan is nett genunk. Diah misset aw du vass diah awl zvay agreet hend druff. Dess kend feel efforts nemma un hatt sei fa du, avvah es zayld diveaht sei. (Shpricha 10:4) Vann diah mitt-nannah shaffet, zaylet diah benefidda funn eiyah efforts.​—Breddichah 4:9.

VASS DU KANSHT:

• Diseiydet vass fa shtebs es yaydah vann nemma zayld fa da problem ausshaffa

• Alli so oft, gukket vi feel bessah es sacha sinn