So kshvind es ebbes shlimmes haebbend, doon Jehova Sei Witnesses grawt shteahra iahra breedah un shveshtra helfa in selli areas. Sell veist vi feel leevi es miah aekshli henn fa nannah. (Johannes 13:34, 35; 1 Johannes 3:17, 18) In vass fa vayya doon miah helfa?

Miah dohnayda geld. Vo di Christians in Judea nett genunk katt henn fa essa, henn iahra breedah un shveshtra in Antioch geld kshikt fa si helfa. (Apostelgeschichte 11:27-30) In da saym vayk, vann miah heahra es unsah breedah un shveshtra in anri areas funn di veld deich haddi zeida am gay sinn, helfa miah si bei dohnayshins shikka deich unsah congregation.​—2 Korinther 8:13-15.

Miah gevva vass si reeli braucha. Vann ebbes shlimmes haebbend doon selli elders datt shuah macha es alli-ebbah in di congregation sayf is. En committee is organized fa macha es si ess-sach, goot vassah, glaydah, medical hilf henn, un es si en blatz henn fa bleiva. Feel Witnesses sinn willing fa gay helfa heisah un Fasamling Bletz fixa koss funn iahra experience in so eahvet. Si gevva acht uf iahra aykni expenses un si vadda nett betzawld. Because es di organization so united is, un es miah so feel experience henn in mitt-nannah shaffa, helft’s uns fa able sei fa kshvind hilf bei greeya. Miah langa naus fa unsah breedah un shveshtra helfa, avvah miah helfa aw selli es nett witnesses sinn vann miah kenna.​—Galater 6:10.

Miah sinn datt fa si, un gevva kamfirt funn di Bivvel. Selli es deich shlimmi sacha gayn braucha kamfirt. An zeida vi sell, greeya miah unsah hilf funn Jehova, ‘da Gott funn awl kamfirt.’ (2 Korinther 1:3, 4) Miah doon geahn di promises funn di Bivvel sherra mitt selli es deich haddi zeida am gayn sinn. Miah helfa si sayna es Gott Sei Reich glei alles zu en end bringa zayld es em soffahra macht.​—Offenbarung 21:4.

• Favass sinn Jehova Sei Witnesses able fa so kshvind helfa vann shlimmi sacha haebna?

• Vass fa kamfirt funn di Bivvel kenna miah sherra mitt leit?