Selli es da lead nemma in unsah organization vadda nett betzawld. In blatz funn sell, doon ma vi di Christians in di eahsht century henn. Yusht selli es qualified sinn according zu di Bivvel vadda kfrohkt fa acht gevva uf di congregation. (Apostelgeschichte 20:28) Di elders sinn mennah es spiritual-minded sinn es da lead nemma un gevva acht uf di congregation nett koss si missa, avvah koss si vella; “nett fa betzawld vadda, avvah mitt en eahnshtlich hatz.” (1 Petrus 5:1-3) Vass doon si fa uns helfa?

Si gevva acht uf uns un vatsha ivvah uns. Di elders geida un protekta di congregation spiritually. Si vissa es Gott si deah assignment gevva hott fa acht gevva uf sei leit, so si doon nett si kantrohla, avvah helfa alli-ebbah goot shpiahra un joy havva. (2 Korinther 1:24) Yusht vi en shohf-heedah goot acht gebt uf awl funn sei shohf, so doon di elders fa alli-ebbah in di congregation.​—Shpricha 27:23.

Si lanna uns vi fa Gott sei villa du. Di elders doon da lead nemma an di fasamlinga alli voch un macha shuah es alli-ebbah ufgebaut vatt. (Apostelgeschichte 15:31, 32) Dee mennah doon aw da lead nemma in di ministry, un si helfa un trayna uns fa bessah vadda.

Si gevva alli-ebbah encouragement. So es si alli-ebbah gevva kenna vass si braucha spiritually, di elders psucha uns dihaym adda an unsah Fasamling Blatz fa uns hilf un kamfirt gevva funn di Bivvel.​—Jakobus 5:14, 15.

Even mitt alles es si doon fa di congregation, ’s mensht funn di elders henn aw en job un shpenda zeit acht gevva uf iahra aykni family. Miah sedda dee breedah respekt veisa fa vi hatt es si shaffa.​—1 Thessalonicher 5:12, 13.

• Vass doon di elders fa di congregation?

• Vi doon di elders en interest nemma in uns?