Vella lanna veyyich en yungah boo es sei uncle sei layva ksayft hott. Sei uncle voah da Paulus, ayns funn di aposhtla. Miah vissa nett vi da yung boo kaysa hott, avvah miah vissa eah hott ebbes gedu es reeli brayf voah. Vetsht du vissa vass eah gedu hott?—

Da Paulus voah in di jail in Jerusalem. Eah voah in di jail gedu koss eah voah am breddicha veyyich da Jesus. Samm mennah henn da Paulus kast un henn vella een doht macha. Si henn ksawt: ‘Vella da leader funn di army sawwa es sei soldiers sella da Paulus zu court bringa. Miah zayla uns fashtekla nayvich da vayk un vann da Paulus fabei gayt, zayla miah een doht macha!’

Da Paulus sei nephew hott keaht vass si kfikkaht henn du. Vass zayld eah du diveyya? Eah’s zu di jail ganga un hott da Paulus ksawt diveyya. Da Paulus hott een ksawt fa grawt gay da leader funn di army sawwa vass si fikkahra du. Denksht du’s voah eesi fa da Paulus sei nephew fa gay shvetza zu da leader?— Nay, koss da leader voah en importandah mann. Avvah da Paulus sei nephew voah brayf un hott kshvetzt zu da leader.

Da leader hott grawt gvist vass fa du. Eah hott baut 500 soldiers grikt fa da Paulus protekta! Eah hott si ksawt fa da Paulus zu Caesarea nemma selli nacht. Voah da Paulus sei layva ksayft?— Yau, di veeshti mennah henn nett kenna een greeya! Vass si kfikkaht henn du hott nett kshaft.

Vass kenna miah lanna funn dee shtoahri?— Du kansht aw brayf sei yusht vi da Paulus sei nephew. Miah missa brayf sei vann miah shvetza zu anri veyyich Jehova. Zaylsht du brayf sei un oh’halda shvetza veyyich Jehova?— Du kansht fleicht ebbah sei layva sayva vann du dusht.