Zu feel wohriya is nett goot fa em sei health, un’s afekt da vayk es ma feeld. Es kend even leeda zu graysahri problems, graysah es vass du gwohrit voahsht diveyya fa shteahra mitt.

•  Gebb acht vi feel zeit es du shpendsht in gukka vass fa shlechti sacha es am haebna sinn. Ma muss nett alles vissa veyyich di sacha es am haebna sinn in di veld. Zu feel vissa diveyya kann macha es ma em noch may feicht un shteaht zu feel wohriya.

   Vass di Bivvel sawkt: “En bedreebdah geisht drikkeld di gnocha uf.”—Shpricha 17:22.

   “’Sis eesi fa in da habit kumma funn immah getshekt halda vass fa shlechti sacha es am haebna sinn, avvah sell is nett goot. Ich wohri nett nayksht so feel vann ich vennichah zeit shpend di news gukka.”—John.

   Ebbes fa denka diveyya: Vi oft muss ich aekshli gukka vass di latest-news is?

•  Mach en sketshel un bleib dibei. Boviah vakkah vadda, essa, dei annah shtoft du, un in’s bett gay an di saym zeit alli dawk. En goodah sketshel havva zayld dich goot shpiahra macha un dich helfa nett so feel wohriya.

   Vass di Bivvel sawkt: “Vass di fleisicha im sinn henn fa du, macht si may es genunk havva.”—Shpricha 21:5.

   “Vo da COVID-19 pandemic kshteaht hott, havvich zu feel zeit kshpend uf entertainment un habb kenn sketshel katt. Ich habb mei zeit bessah yoosa vella, so ich habb en sketshel gmacht fa di sacha es ich du muss alli dawk.”—Joseph.

   Ebbes fa denka diveyya: Hosht du en sketshel es dich goot shpiahra macht es du ebbes gedu griksht alli dawk?

•  Denk veyyich di goodi sacha in dei layva. Zrikk denka an sacha es du diffand du hetsht sedda, un dei imagination lossa vild gay veyyich sacha es haebna kenda in da future, zayld dich yusht macha may wohriya. In blatz funn sell, denk veyyich zvay adda drei sacha es du dankboah sei kansht difoah.

   Vass di Bivvel sawkt: “Sei dankboah.”—Kolosser 3:15.

   “Vann ich di Bivvel am laysa binn, binn ich nett am mei meind filla mitt shlechti sacha, un dess helft mich denka veyyich goodi sacha. Dess mecht zu eesi lauda, avvah’s shaft!”—Lisa.

   Ebbes fa denka diveyya: Dusht du oft denka veyyich di shlechti sacha es am haebna sinn in dei layva un no fagessa veyyich di goodi sacha?

•  Denk veyyich anri. Vann du di gans zeit am wohriya bisht, vitt du fleicht yusht immah laynich sei. In blatz funn sell, denk veyyich vi du anri helfa kansht es hilf braucha.

   Vass di Bivvel sawkt: “Loss yaydah funn eich nett yusht ausgukka fa sei aykni sacha, avvah aw fa di sacha funn anri.”—Philipper 2:4.

   “Sacha du fa anri leit macht mich haebbi. Ich binn am ebbes du fa si goot shpiahra macha, un’s helft mich aw fa nett so feel wohriya. Aekshli, vann ich bissi binn am anri helfa, havvich nett zeit fa wohriya.”—Maria.

   Ebbes fa denka diveyya: Kansht du denka funn ebbah es fleicht hilf brauch, un vass kansht du du fa si helfa?

•  Boviah healthy bleiva. ’Sis importand fa exercise un roo greeya. Ess healthy. Acht gevva uf dei health kann dich helfa positive sei un nett zu feel wohriya.

   Vass di Bivvel sawkt: “Es dutt samm goot fa’s nadiahlich leib shaffa un’s ksund halda.”—1 Timotheus 4:8.

   “Mich un mei boo kenna nett so feel naus gay un sacha du vi ma vella, so miah henn en sketshel gmacht fa exercises du in’s haus. Dess helft uns fa haebbiyah sei un may patient sei mitt nannah.”—Catherine.

   Ebbes fa denka diveyya: Setsht du may healthy essa un may exercise greeya so’s du ksundah sei kansht?

 Along mitt dee sacha, feel leit henn benefit funn lanna veyyich di promises in di Bivvel veyyich en bessahrah future. Lays da article “What Will God’s Kingdom Accomplish?”