Wan een Ehepoatna nich opp dän aundren vetruen deit, dan kjennen de Lied nich schaftich sennen. Woo kaun eena sienen Ehepoatna vetruen un dän nich onneedich aufjenstich sennen?

Waut wie en disen Artikjel seenen woaren

•  Waut meent daut, aufjenstich to sennen?

•  Von wua kjemt Aufgonst onen Uasoak?

•  Woo kaust du diene Aufgonst unja Kontroll kjrieen?

•  Wan dien Ehepoatna aufjenstich es

•  Froagen toom doaräwa räden

 Waut meent daut, aufjenstich to sennen?

 Daut Wuat “aufjenstich” kaun veschiednet bedieden. En disen Artikjel meent aufjenstich sennen, daut eena jleeft, daut doa een aundra eenem sienen Ehepoatna opp de orrajchte Wajch jleicht. Daut kaun uk meenen, daut eena denkjt, daut eenem sien Ehepoatna sestwäm opp soone Wajch jleicht, waut sikj nich jehieet. Veleicht späat sikj die daut dan soo, daut diene Ehe en Jefoa es. Wan daut soo es, dan es daut uk gaunz rajcht, daut du aufjenstich best. Du feelst je die met kjeenem soo sea vebungen aus met dienen Ehepoatna. Eene Lied sellen aules doonen, waut see kjennen toom äare Ehe beschitzen.

 Waut de Schreft sajcht: “Dan sent dee nich mea twee, oba een Fleesch. . . . Waut Gott vebungen haft, saul de Mensch nich von enaunda scheeden” (Matäus 19:6, PB).

 Benjamin sajcht: “Wan eenem siene Ehe werkjlich en Jefoa es, dan es Aufgonst een bät soo aus eene Woarnunk, daut doa Fia es. Eena mott doa onbedinjt waut met doonen.”

 Aufjenstich sennen onen Uasoak kaun von veschiednet komen, biejlikj von Angst ooda von Sachen, waut eena sikj bloos utdenkjt. Oba wan wie onsen Poatna opp iernst leewen, dan woa wie nich onneedich aufjenstich sennen (1. Korinta 13:4, 7). Dr. Robert L. Leahy schreef: “Eena well de Ehe beschitzen, oba wan eena onen Uasoak aufjenstich es, dan deit eena krakjt daut Jäajendeel un schot de Ehe.” a

 Von wua kjemt Aufgonst onen Uasoak?

 Wan du leicht aufjenstich woascht, kunn eene Uasoak doafäa sennen, daut dien ieeschta Ehepoatna die es ontru jewast. Een aundra Grunt doafäa kunn sennen, daut eent von diene Elren es ontru jewast un veleicht hast du Angst, daut dautselwje en diene Ehe passieren woat.

 Melissa sajcht: “Aus ekj junk wia, wia miene Pape miene Mame ontru. Von dan aun es mie daut noch emma sea schwoa jewast, opp aundre to vetruen. Dit haft sea väl Schoden aun mie jedonen un doaderch es daut uk eenjemol sea schwoa fa mie, mienen Ehemaun to vetruen.”

 Wan du die foaken läach feelst, dan kunn daut sennen, daut du wäajen daut leicht aufjenstich woascht un denkjst, aundre wellen diene Ehe uteneen brinjen. Veleicht fangst du mau rajcht aun to denkjen, daut dien Ehepoatna die fa wäm aundren veloten wudd, wan dee de Mäajlichkjeit haud.

 Naomi sajcht: “Mien Ehemaun sien Frint fruach am, aus hee wudd kjennen eent von dee Briegaum-Helpa sennen bie dee äare Kjast. Doa wudd met en sennen, daut hee wudd motten biesied eene aundre Fru gonen, veleicht uk mau rajcht met ar toop daunzen. Dit jleicht ekj nuscht! Ekj brocht am bat doa, daut hee daut aufsäd.”

 Waut bie eene Kjast passieet, kaun veschieden sennen von een Launt no daut aundre, oba een Christ mott sikj no de Gruntsauzen en de Schreft rechten. Haud Naomi werkjlich Uasoak, aufjenstich to sennen? Lota säd see, daut see nich haud durft aufjenstich sennen. See sajcht: “Ekj haud mie läach jefeelt un ekj docht, daut mien Maun mie met aundre Frues vejlikjen deed. Oba daut wia nich soo. Ekj haud mie daut bloos aula utjedocht.”

 Wan du dienen Ehepoatna aufjenstich best, kust du mau rajcht denkjen, daut dien Ehepoatna die ontru es un dän doafäa beschuljen. Oba wan jie junt nich mea unjarenaunda vetruen, dan deit daut väl Schoden aun june Ehe. Soont kaun mau rajcht Schoden aun diene Jesuntheit doonen.

 Waut de Schreft sajcht: “Aufgonst moakt de Knoakes fulen” (Spricha 14:30, PB).

 Woo kaust du diene Aufgonst unja Kontroll kjrieen?

 Stoakj dien Vetruen opp dienen Ehepoatna. Doo nich bloos no soone Sachen kjikjen, wua du denkjst, daut dee wudd kjennen ontru sennen. Kjikj leewa no aul daut, waut bewiest, daut du opp dän vetruen kaust.

 Melissa sajcht: “Ekj kjikj no daut goode bie mienen Maun. Wan dee sikj met wäm aufjeft, es daut wäajen hee om dän werkjlich bekjemmat es un nich wäajen hee irjentwaut schlajchtet em Senn haft. Ekj proow uk, em Denkj to hoolen, daut bloos wäajen miene Elren äare Ehe nich goot utkjeem, bediet daut oba nich, daut miene Ehe nich woat goot utkomen.”

 Es daut Utjedochtet ooda de Woarheit? Dr. Leahy schreef wieda: “Foaken jleew wie, daut daut, waut wie denkjen, de Woarheit es, wiels wie ons soo secha feelen. Oba bloos wäajen eena waut jleeft, es daut nich de Woarheit. Un onse Jefeelen sent uk nich een Bewies doafäa, daut et de Woarheit es.” b

 Nadine sajcht: “Wan eena sikj utdenkjt, waut doa aules mucht sennen, wan doa oba nuscht es, kunn eena sikj onneedje Trubbels en de Ehe enrieren.”

 Räd doaräwa, woo du die feelst. Krakjt endoont wuarom du die aufjenstich feelst, räd met dienen Ehepoatna doaräwa. Dan kjenn jie junt eenich woaren, met waut von Vehoolen jie junt beid maklich un secha feelen un waut uk veninftich es.

 Ciara sajcht: “Wan du met dienen Ehepoatna doaräwa räden deist, dan denkj nich, daut dien Ehepoatna aulmols bloos diene Jefeelen velazen well. Denkj leewa, daut dee daut goot meent un uk well aun de Ehe schaufen. Denkj uk doaraun, daut du die veleicht eenjemol too leicht beleidicht feelst ooda too väl velangst, onen daut du daut enwoascht. Daut kaun uk sennen, daut dien Ehepoatna daut nich mol enwoat, woo du die feelst ooda daut du daut wurscht jleichen, daut dee mea om die bekjemmat wia.”

 Waut de Schreft sajcht: “Kjeena saul sien ieejnen nutzen sieekjen, oba daut, waut sienem näakjsten goot deit” (1. Korinta 10:24, PB).