Gott sien Kjennichrikj es eene werkjelje Rejierunk, waut Jehova Gott haft oppjestalt. “Daut Rikj Gottes” woat uk en de Schreft “daut Himmelrikj” jenant, wäajen daut vom Himmel rejieet (Markus 1:14-15, PB; Matäus 4:17, PB). Gott sien Kjennichrikj es en jewesse Stekjen soo, aus de menschelje Rejierungen, oba doch es daut en aule Stekjen väl bäta.

•   Wäa woat en dit Kjennichrikj rejieren? Gott haft Jesus Christus aus Kjennich äwa sien Kjennichrikj aunjestalt un haft am väl mea Macht jejäft, aus waut eene menschelje Rejierunk jeemols wudd haben (Matäus 28:18). Jesus haft aul bewäsen, daut hee siene Macht emma rajcht brukt, wiels hee es een metfeelenda Leida un opp am es to veloten (Matäus 4:23; Markus 1:40-41; 6:31-34; Lukas 7:11-17). Jehova holp Jesus, Menschen ut aule Velkja uttowälen, waut met Jesus toop em Himmel “aus Kjennichs äwa de Ieed rejieren” woaren (Openboarunk 5:9-10, NW).

•   Woo lang woat daut rejieren? Gott sien Kjennichrikj woat nich soo sennen aus menschelje Rejierungen, waut mau fa een Stootje bliewen. Daut woat kjeenmol venicht woaren “oba woat selfst opp emma bliewen” (Daniel 2:44, PB).

•   Äwa wäm woat daut rejieren? Jieda eena, waut Gott sienen Wellen deit, kaun unja Gott siene Rejierunk läwen. Daut es krakjt endoont, von woone Famielje eena kjemt ooda wua eena jebuaren es (Aposteljeschicht 10:34-35).

•   Waut vonne Jesazen haft dise Rejierunk? De Jesazen (ooda Jebooten) von Gott sien Kjennichrikj vebeeden nich bloos daut schlajchte. Dee lieren eenem uk, woo eena sikj vebätren kaun un daut doonen, waut Gott velangt. Biejlikj sajcht de Schreft: ““Du saust dän Harn, dienen Gott, met dien gaunzet Hoat goot sennen, un met diene gaunze Seel, un met aul diene Jedanken”. Dit es daut jratste un ieeschte Jeboot. Un daut tweede Jeboot es met dit jlikj: “Du saust dienen Noba jrod soo goot sennen aus die selfst”” (Matäus 22:37-39, PB). Wan eena Gott un aundre leeft, dan woat eena uk emma daut doonen, waut fa aundre toom gooden es.

•   Woo lieet daut Kjennichrikj aundre ut? Gott sien Kjennichrikj haft nich bloos huage Räajlen, oba daut lieet siene Deena uk, woo see dee nokomen kjennen (Jesaja 48:17-18).

•   Waut woat daut Kjennichrikj doonen? Gott sien Kjennichrikj woat de Menschen nich utnutzen. Enne Städ daut, woat dise Rejierunk Gott sienen Wellen doonen. Doa es Gott sien Vespräakjen met en, daut aul dee, waut am leewen, woaren fa emma em Paradies oppe Ieed läwen kjennen (Jesaja 35:1, 5-6; Matäus 6:10; Openboarunk 21:1-4).