WAUT JUNGE MENSCHEN WEETEN WELLEN
Loont sikj daut, nom Vesaumlungshus von Jehova siene Zeijen to wanken?
Tweemol de Wäakj haben Jehova siene Zeijen Toopkomes bie äare Vesaumlungshiesa toom Gott deenen. Woo es daut doa un woo kaun die daut togood komen, doa hantowanken?
Woo es daut bie de Vesaumlungshiesa?
En de Vesaumlungshiesa dreit sikj aules doarom, waut eena von de Schreft lieren kaun un woo eena daut en sien Läwen nokomen kaun. Dise Toopkomes kjennen die halpen, …
de Woarheit äwa Gott to lieren.
to vestonen, wuarom eenje Sachen nu jroz enne Welt passieren.
een bätra Mensch to woaren.
de baste Frind to finjen.
Wuarom es daut goot, doa to sennen?
Daut woat die halpen. Daut, waut bie de Toopkomes von Jehova siene Zeijen ut de Schreft jelieet woat, woat die halpen “Weisheit” to kjrieen (Spricha 4:5, PB). Daut bediet, de Schreft kaun die werkjlich halpen, goode Entscheidungen en dien Läwen to moaken. Un dee kaun die uk halpen, Twiewel oppem kloaren to brinjen, soo aus:
Bie de Toopkomes utgangs Wäakj woaren biejlikj soone aus dise Räden jehoolen:
Wuarom sell wie ons no de Bibel rechten?
Wäa woat die en schwoare Tieden biestonen?
Waut Gott sien Kjennichrikj vondoag aul fa ons deit
Brenda sajcht: “Een Schoolpoatna kjeem mol met no de Toopkomes. Hee sad sikj met onse Famielje toop dol un wie leeten am en onse Bieekja metkjikjen. No daut Toopkomen vetald dee mie, daut hee sea vewundat wia äwa de Auntwuaten, waut de Menschen doa jeewen. Hee säd uk, daut se bie siene Kjoakj nich soone Bieekja hauden toom studieren aus wie.”
Hast du daut jewist? Doa brukt nuscht betolt bie de Vesaumlungshiesa un doa woat uk kjeenmol Jelt toopjekollakjt.
Die woat daut Moot jäwen, met de Menschen doa toop to sennen. No de Schreft no es daut wichtich, daut de Christen sellen toopkomen toom sikj “unjarenaunda Moot toospräakjen” (Hebräa 10:24-25, PB). En soone Welt, wua de mieeschte bloos aun sikj selfst denkjen, es daut sea scheen, met soone Menschen toop to sennen, waut dolla om Gott un aundre Menschen todoonen sent, aus om sikj selfst.
Elisa sajcht: “Wan ekj hab eenen schwoaren Dach jehaut, dan sie ekj eenjemol truarich un meed. Oba de Menschen biem Vesaumlungshus halpen mie emma, daut mie daut bäta jeit. Oppem Wajch no Hus sie ekj schaftja un wada reed fa daut, waut ekj dän näakjsten Dach doonen mott.”
Hast du daut jewist? Daut jeft mea aus 120 000 Vesaumlungen von Jehova siene Zeijen oppe Welt. Dee komen opp mea aus 60 000 Städen toop. Jieda Joa woaren doa ojjefäa 1 500 Vesaumlungshiesa jebut, wäajen doa emma mea Menschen hankomen. a
a Toom eene Vesaumlunk finjen, go opp de Sied “Toopkomes von Jehova siene Zeijen” un drekj opp dän Knups “En diene Omjäajent sieekjen”.
Veleicht jleichst du uk dit
WAUT JUNGE MENSCHEN SAJEN
Woo kaun de Bibel mie halpen?
De Auntwuat kaun die halpen, een schaftjeret Läwen to haben.
TOOPKOMES
Woo es daut en de Vesaumlungshiesa von Jehova siene Zeijen?
Kjikj die dit Video aun un finj daut rut.
WAUT SAJCHT DE SCHREFT ÄWA ...?
Mott eena to eene Jemeent jehieren?
Kaun een Mensch Gott bloos fa sikj selfst deenen?
