De ieeschta Breef aun de Korinta 7:1-40
7 Ekj woa nu äwa daut räden, waut jie mie schreewen: Dauts bäta fa eenen Maun, auleen to bliewen un nich Sex to haben.*
2 Oba wäajen de sintelje Sorten Sex* soo sea Mood es, saul jieda Maun siene ieejne Ehefru haben un jieda Fru saul äaren ieejnen Ehemaun haben.
3 De Ehemaun saul siene Ehefru äare Needichkjeiten tofrädstalen. Un krakjt soo saul uk de Ehefru daut bie äaren Ehemaun doonen.
4 De Ehefru haft nich aules äwa äaren Kjarpa to sajen, oba uk äa Ehemaun. Un krakjt soo uk bie dän Ehemaun, dee haft nich aules äwa sienen Kjarpa to sajen, oba uk siene Ehefru.
5 Hoolt junt nich eena von dän aundren trigj, buta jie woaren junt beid eenich, daut fa eene bestemde Tiet to doonen, soo daut jie junt kjennen Tiet nämen toom bäden. Lota komt oba wada toop, soo daut de Soton junt nich kaun wieda aufproowen, wiels jie junt nich beoabeiden kjennen.
6 Oba ekj saj junt aul dit, daut jie weeten, to waut jie de Frieheit haben, oba dit es nich een Jeboot.
7 Oba ekj wensch mie, daut aule soo wieren aus ekj. Un doch haft jieda eena von Gott siene Gow jekjräajen; eena soo aus dit un de aundra aundasch.
8 Nu saj ekj to de Onbefriede un de Wätfrues, daut et fa dee bäta es, daut dee soo bliewen aus ekj.
9 Oba wan dee sikj nich beoabeiden kjennen, dan lot dee sikj befrieen. Dauts bäta, daut dee sikj befrieen, aus daut een grootet Velangen en dee brent.
10 De Befriede jäw ekj disen Rot, nich ekj, oba de Har; daut eene Ehefru nich saul met äaren Ehemaun uteneengonen*.
11 Oba wan see met am uteneenjeit, dan saul see onbefriet bliewen ooda sikj wada met äaren Ehemaun veeenjen. Un een Ehemaun saul siene Ehefru nich veloten.
12 Oba to de aundre saj ekj, un daut saj ekj, nich de Har: Wan een Brooda eene Ehefru haft, waut nich em Gloowen es, un see es doamet envestonen, met am tooptobliewen, dan saul hee ar nich veloten.
13 Un wan eene Fru eenen Ehemaun haft, waut nich em Gloowen es, un hee es doamet envestonen, met ar tooptobliewen, dan saul see äaren Ehemaun nich veloten.
14 Wiels de Ehe woat wäajen de Ehefru fa heilich jetalt, wan de Ehemaun uk nich em Gloowen es. Un de Ehe woat wäajen dän Brooda fa heilich jetalt, wan de Ehefru uk nich em Gloowen es. Aundasch wudden june Kjinja nich heilich* sennen, oba nu sent dee heilich.
15 Oba wan de Poatna, waut nich em Gloowen es, sikj eenich woat to veloten, dan lot dän veloten. Wan dit soo romkjemt, dan es een Brooda ooda eene Sesta nich bemott, bie dän aundren to bliewen. Gott well, daut jie Fräd haben.
16 Ehefru: Woo weetst du, aus du dienen Ehemaun nich woascht raden? Ooda Ehemaun: Woo weetst du, aus du diene Ehefru nich woascht raden?
17 Aulmols, lot jieda eenem en dee Omstend, waut Jehowa* am jeef, wiedaläwen, soo aus dan, aus hee toom Gloowen kjeem. Dits de Rot, waut ekj en aule Vesaumlungen jäw.
18 Waut, wan irjenteen Maun beschnäden wia, aus dee toom Gloowen kjeem? Dan lot dän soo bliewen. Es doa irjenteen Maun onbeschnäden jewast, aus dee toom Gloowen kjeem? Dan doaf dee sikj nich beschnieden loten.
19 Dauts nich wichtich, beschnäden sennen, un dauts uk nich wichtich, onbeschnäden sennen; wichtich es, Gott siene Jebooten notokomen.
20 Jieda eena saul en dee Omstend bliewen, aus hee dan wia, aus hee toom Gloowen kjeem.
21 Wieescht du een Sklow, aus du toom Gloowen kjeemst? Dan sie sondasorj. Oba wan du kaust frie woaren, dan nemm de Jeläajenheit woa.
22 Wan doa irjentwäa een Sklow wia, aus dee toom Gloowen kjeem, wort daut dän Harn sien fria Deena. Un wan doa wäa frie wia, aus dee toom Gloowen kjeem, wort daut Christus sien Sklow.
23 Jie worden fa eenen Pries jekoft. Hieet opp, Menschen äare Sklowen to woaren.
24 Breeda, jieda eena saul ver Gott en dee Omstend bliewen, aus hee dan wia, aus hee toom Gloowen kjeem.
25 Fa de Onbefriede* hab ekj kjeen Jeboot vom Harn. Oba ekj jäw junt miene Meenunk aus een trua Mensch, dän de Har Metleet jewäsen haft.
26 En dise schwoare Tieden jleew ekj, es daut fa eenen Mensch bäta, soo to bliewen, aus dee es.
27 Hast du eene Ehefru? Dan proow nich, die von dee frietomoaken. Best du onen eene Ehefru? Dan sieekj nich mea no eene.
28 Oba wan du die befriest, bejeist du doamet kjeene Sind. Un wan eena, waut noch nienich befriet wia, sikj befriet, dan bejeit dee doamet kjeene Sind. Oba soone, waut daut doonen, woaren Schwierichkjeiten en äa Läwen haben*. Oba ekj proow, junt soone Schwierichkjeiten to spoaren.
29 Dits, waut ekj meen, Breeda: Doa es nich mea väl Tiet. Von nu aun sellen dee, waut eene Fru haben, soo läwen, aus wudden dee nich eene haben.
30 Dee, waut roaren, sellen soo läwen aus dee, waut nich roaren. Dee, waut sikj freien, sellen soo läwen aus dee, waut sikj nich freien. Dee, waut kjeepen, sellen soo läwen aus dee, waut nuscht haben.
31 Un dee, waut de Welt brucken, sellen dee nich fa voll brucken; wiels soo aus de Welt nu es, endat sikj.
32 Waut ekj fa junt well, es, daut jie onen Sorjen sent. Dän onbefrieden Maun jeit daut om daut, waut dän Harn intressieet; aulsoo, woo hee dän Harn jefaulen kaun.
33 Oba dän befrieden Maun jeit daut om Sachen von de Welt; aulsoo, woo hee siene Ehefru jefaulen kaun;
34 doawäajen es hee jedeelt. Krakjt soo uk bie de Fru; de Fru, waut nich befriet es, ooda noch kjeenmol befriet wia, jeit daut om Sachen, waut dän Harn intressieet. Soo kaun äa Kjarpa un uk äare Jedanken* heilich sennen. Oba de befriede Fru jeit daut om Sachen von de Welt; aulsoo, woo see äaren Ehemaun jefaulen kaun.
35 Ekj saj junt dit fa junt selfst toom Gooden, oba nich toom junt Frieheit wajchnämen. Waut ekj well, es, daut jie Sachen soo doonen, aus sikj daut jehieet, soo daut jie dän Harn kjennen eendrajchtich deenen, onen aufjelenkjt to woaren.
36 Oba wan doa wäa denkjt, daut hee sikj nich kaun soo oppstalen, aus sikj daut jehieet, wäajen hee onbefriet blift, un aul em Kjarpa un enne Jedanken riep es*, dan saul hee daut doonen, waut hee well; lot am sikj befrieen. Hee sindicht doamet nich.
37 Oba wan sikj irjentwäa en sien Hoat gaunz secha es, daut hee kjeene Needichkjeit haft, sikj to befrieen, un sien ieejnet Velangen unja Kontroll haft, un sikj en sien Hoat es eenich jeworden, sikj nich to befrieen, dan deit hee goot.
38 Aulsoo, wäa sikj befriet, deit goot, oba wäa sikj nich befriet, deit bäta.
39 Eene Ehefru es aun äaren Ehemaun jebungen, soo lang aus dee läft. Oba wan de Ehemaun stoaft, dan es see frie un kaun sikj met dän befrieen, wäm see well; soo lang aus daut dän Harn sien Nofolja es.
40 Oba no miene Meenunk no wudd see schaftja sennen, wan see soo bleef, aus see es. Un ekj sie mie secha, daut ekj uk Gott sienen Jeist hab.
Footnooten
^ Wuatlich: “Dauts bäta fa eenen Maun, eene Fru nich auntoschieren.”
^ Opp Griechisch woat daut Wuat “porne̱ia” hia opp Meazol jebrukt. See Wuaterkjläarunk bie “Sintelje Sorten Sex”.
^ Uteneengonen bediet nich, sikj scheeden loten.
^ Wuatlich: “wudden dee nich rein sennen”.
^ See Wuaterkjläarunk bie “Jehowa”.
^ Wuatlich: “Junkfrues un Mana”. Daut sent soone, waut noch kjeenmol haben met wäm Sex jehaut.
^ Wuatlich: “Lieden en äa Fleesch haben”.
^ Wuatlich: “äa Jeist”.
^ Ooda: “wan de Bloom von de Jugent äwa es”.
