De Breef aun de Efeesa 6:1-24
6 Kjinja, siet june Elren jehuarsom, soo aus de Har daut haben well, wiels dauts daut Rajchte to doonen.
2 “Iea dienen Voda un diene Mutta.” Dits daut ieeschte Jeboot met dit Vespräakjen:
3 “Daut et met die goot utkomen kaun* un daut du lang oppe Ieed läwen kaust.”
4 Un Vodasch, doot june Kjinja nich vedrislich moaken, oba trakjt dee wieda opp met Jehowa* siene Trajchtwiesunk un sienen Rot*.
5 Sklowen, siet june menschelje* Haren* von gaunzen Hoaten jehuarsom met Respakjt un Forcht, soo aus jie Christus jehorchen.
6 Doot daut nich bloos, wan se junt beoobachten*, aulsoo bloos toom Menschen jefaulen, oba doot daut aus Christus siene Sklowen, waut Gott sienen Wellen doonen met de gaunze Seel*.
7 Siet Sklowen met eene goode Enstalunk, soo aus fa Jehowa* un nich fa Menschen;
8 wiels jie weeten, wautemma jieda eena fa Goodet deit, daut woat dee von Jehowa* trigjkjrieen; aus daut nu een Sklow es ooda aus dee frie es.
9 Krakjt soo uk jie Haren*: Behaundelt de Sklowen met deeselwje Enstalunk un moakt dee nich schuchta. Wiels jie weeten, daut dee äa Har un jun Har em Himmel es, un dee moakt kjeenen Unjascheet.
10 To goodalatst, mucht jie derch dän Harn siene groote Krauft wieda stoakj woaren.
11 Moakt junt aulet Kjrichsjereetschoft aun, waut von Gott kjemt, soo daut jie kjennen fauststonen jäajen dän Beesen Fient siene hinjalestje Faulen*.
12 Wiels wie sent en eenen Feit*, un dauts nich jäajen Fleesch un Bloot, oba dauts jäajen Rejierungen, jäajen Leidasch, jäajen Harscha von dise diestre Welt, jäajen Machten von beese Jeista en de himlische Städen.
13 Wäajen dit jroz moakt junt aulet Kjrichsjereetschoft aun, waut von Gott kjemt, soo daut jie aun dän schlajchten Dach kjennen staunthauft bliewen, wan jie aunjejräpen woaren, nodäm daut jie aules nojekomen sent.
14 Doawäajen, stot faust met de Woarheit rom june Hoften soo aus een Belt un droacht de Jerajchtichkjeit soo aus een Brostschilt
15 un habt jun Footich aunjetrocken, daut de Feet reed sent toom de goode Norecht von dän Fräd bekauntmoaken.
16 Buta aul dit nämt daut groote Schilt, waut de Gloowen es. Met dit woa jie dän Beesen siene Feilen*, waut brennen, aula kjennen utmoaken.
17 Denkjt uk aun de Radunk, waut soo es aus een Schutz-Hoot oppem Kopp, un nämt daut jeistelje Schwieet*; daut es Gott sien Wuat.
18 Un to deeselwje Tiet bät un prachat opp veschiedne Wäaj; bät opp jieda Jeläajenheit soo, daut et met dän heiljen Jeist tooppaust. Om dit to doonen, blieft waka un prachat dän Tiet äwa fa aule Heilje.
19 Bät uk fa mie, daut mie kjennen de Wieed jejäft woaren, wan ekj mien Mul opmoak, soo daut ekj kaun driest räden un daut heilje Jeheemnis* von de goode Norecht bekauntmoaken.
20 Ekj sie een Veträda fa de goode Norecht un doawäajen sie ekj en Kjäden. Bät fa mie to Gott, daut ekj driest äwa de goode Norecht räden kaun, soo aus ekj daut schuldich sie.
21 Daut jie uk weeten, woo daut met mie steit un woo mie daut jeit, woat Tiechikus, een leewa Brooda un dän Harn sien trua Deena, junt aules weeten loten.
22 Krakjt wäajen dit schekj ekj dän no junt, daut jie weeten kjennen, woo ons daut jeit un daut hee june Hoaten treesten kaun.
23 Muchten de Breeda Fräd un Leew haben un uk Gloowen, waut von Gott, dän Voda, kjemt un von dän Harn Jesus Christus.
24 Mucht daut groote Metleet* met aul deejanje sennen, waut soone Leew fa onsen Harn Jesus Christus haben, waut nich vejeit.
Footnooten
^ Ooda: “Daut du kaust een goodet Wiedakomen haben”.
^ See Wuaterkjläarunk bie “Jehowa”.
^ Ooda: “siene Aunwiesunk”; “siene Aunleidunk”. Wuatlich: “Vestaunt biebrinjen”.
^ Wuatlich: “fleeschelje”.
^ Ooda: “Wieets”.
^ Wuatlich: “om daut Uag to deenen”.
^ See Wuaterkjläarunk bie “Seel”.
^ See Wuaterkjläarunk bie “Jehowa”.
^ See Wuaterkjläarunk bie “Jehowa”.
^ Ooda “Wieets”.
^ Ooda: “sien hinjalestjet Aungonen”.
^ Wuatlich: “sikj perseenlich tohoolen haben”.
^ Ooda: daut, waut dee schmitt.
^ Wuatlich: “daut Schwieet vom Jeist”.
^ See Wuaterkjläarunk bie “Heiljet Jeheemnis”.
^ Ooda: “de onvedeende Leeftolichkjeit”.
