De Breef aun de Reema 16:1-27
16 Ekj fodda junt opp, onse Sesta Feebe opptonämen.* See es eene Deenarin von de Vesaumlunk en Kenchre̱ä.
2 Nämt ar soo opp, aus de Heilje em Harn daut wieet sent. Jäft ar aule Help, waut ar fält, wiels see es fa väle enjestonen un uk fa mie.
3 Jreest Pri̱ska un A̱kuila, miene Metoabeida en Christus Jesus sien Woakj.
4 Dee haben äa Läwen* fa mie opp Spell jesat. Ekj un aul de nichjudische Vesaumlungen sent dee sea dankboa.
5 Jreest uk de Vesaumlunk en dee äa Hus. Jreest mienen leewen Epä̱netus, waut eena von de Ieeschte* wia en A̱sien, waut Christus sien Nofolja wort.
6 Jreest Maria, waut sea fa junt jeschauft haft.
7 Jreest Andro̱nikus un Ju̱nias, waut met mie em Frintschoft sent un met mie toop enjestopt wieren. Dise Mana sent sea bekaunt fa de Apostel un sent aul lenja met Christus veeent, aus ekj sie.
8 Jreest Amplia̱tus, mienen leewen Frint em Harn.
9 Jreest Urba̱nus, onsen Metoabeida en Christus sien Woakj, un mienen leewen Sta̱chies.
10 Jreest Ape̱lles, met dän Christus tofräd es. Jreest dee, waut to Aristo̱bulus sien Hus jehieren.
11 Jreest Hero̱dion, waut met mie em Frintschoft es. Jreest dee, waut to Narzi̱ssus sien Hus jehieren, waut dän Harn siene Nofolja sent.
12 Jreest Trifä̱na un Trifo̱sa. Daut sent Frues, waut sea fa dän Harn schaufen. Jreest onse leewe Pe̱rsis, wiels see haft sea fa dän Harn jeschauft.
13 Jreest Ru̱fus, dän Utjewälden em Harn, un uk siene Mutta, waut fa mie uk soo aus eene Mutta jewast es.
14 Jreest Asi̱nkritus, Fle̱gon, He̱rmes, Pa̱trobas, He̱rmas un de Breeda, waut bie dee sent.
15 Jreest Filo̱logus un Ju̱lia, Ne̱reus un siene Sesta un Oliempas un aul de Heilje bie dee.
16 Bejreest junt unjarenaunda met eenen heiljen Kuss. Aul Christus siene Vesaumlungen bestalen junt to jreessen.
17 Nu fodda ekj junt opp, Breeda, daut jie sellen oppaussen fa deejanje, waut Spoolungen aunrechten un daut bat doa brinjen, daut aundre tofaulkomen. Dauts jäajen de Lia, waut jie jelieet haben, un von soone Menschen hoolt junt wajch.
18 Wiels dee Mana sent nich onsen Harn Christus siene Sklowen; daut sent Sklowen von äa ieejnet Velangen. Dee brucken seete un scheene Wieed toom de Onbedochte veleiden.
19 Jun Jehuarsom es bie aulem bekaunt jeworden un ekj frei mie sea doaräwa. Ekj well, daut jie weis sent, wan daut om daut Goode jeit, un oba schultfrie sent, wan daut om daut Schlajchte jeit.
20 De Gott, waut Fräd jeft, woat dän Soton boolt unja june Feet vekjwatschen. Mucht jie onsen Harn Jesus sien grootet Metleet* haben.
21 Mien Metoabeida Timotä̱us bestalt junt to jreessen un krakjt soo doonen uk Lu̱zius, Ja̱son un Sosi̱pater, waut met mie em Frintschoft sent.
22 Ekj, Te̱rzius, waut disen Breef jeschräwen hab, bestal junt em Harn to jreessen.
23 Ga̱jus, bie dän ekj won, un uk de gaunze Vesaumlunk jreessen junt. Era̱stus, de Aunjestalda äwa de Stauts-Kauss, bestalt junt to jreessen un krakjt soo uk sien Brooda Kwa̱rtus.
24 ––*
25 Gott kaun junt stoakj moaken derch de goode Norecht, waut ekj bekauntmoak un derch daut Prädjen von Jesus Christus. Dise Norecht es openboat worden derch daut heilje Jeheemnis*, waut sea lang vestoaken wia.
26 Oba nu es dit Jeheemnis openboat worden, un derch de profeetische Schreften haben aule Sorten Menschen* von dit heilje Jeheemnis jelieet. Dit paust met Gott sien Jeboot toop, dee eewich läft. Sien Wellen es, daut aule Sorten Menschen sellen aun am jleewen un am jehuarsom sennen.
27 Gott, waut de eensja Weisa es, traft fa emma de Harlichkjeit derch Jesus Christus. Amen.
Footnooten
^ Ooda: “Ekj stal junt onse Sesta Feebe väa.”
^ Wuatlich: “äa Jenekj”.
^ Wuatlich: “de ieeschte Frucht”.
^ Ooda: “siene onvedeende Leeftolichkjeit”.
^ Dis Varsch kjemt en eenje Biblen väa, oba en väl griechische Schreften, waut aul ella sent, es dee nich bennen.
^ See Wuaterkjläarunk bie “Heiljet Jeheemnis”.
^ Ooda: “aule Velkja”; “aule Raussen”.
