Een israelitischa Maun, waut Elkana heet, haud twee Frues – Hana un Peninna. Oba hee jleicht Hana dolla. Peninna spott emma äwa Hana, wiels Hana kjeene Kjinja haud un see haud miere. Elkana jinkj jieda Joa met siene Famielje toop no daut Aunbädungszelt en Silo toom Jehova aunbäden. Eemol aus see doa wieren, sach Elkana, daut siene leewe Hana sea truarich wia. Hee säd: “Hana, doo toom Jefaulen nich roaren. Du hast je mie. Un ekj leew die.”

Lota jinkj Hana auleen toom bäden. See prachad Jehova no Help un kunn nich opphieren met roaren. See vespruak Jehova: “Wan du mie eenen Sän jefst, dan woa ekj die dän jäwen, daut dee die sien Läwen lank deent.”

Eli, de Huaga Priesta, sach, daut Hana roaren deed, un hee docht, dee wia bedrunken. Hana säd: “Nä, mien Har, ekj sie nich bedrunken. Mie jeit daut sea schlajcht un ekj räd met Jehova doaräwa.” Eli wort en, hee wia em orrajchten, un säd to ar: “Mucht Gott die daut jäwen, waut du west.” Dan jinkj Hana daut wada bäta un see jinkj wajch. Daut dieed nich mol een Joa un see haud een Junkje. See nand daut Samuel. Jleefst du nich uk, daut Hana sea schaftich wia?

 Hana haud nich vejäten, waut see Jehova vesproaken haud. Aus see Samuel ieescht nich mea besorjen brukt, brocht see dän nom Aunbädungszelt toom doa deenen. See säd to Eli: “Dit es de Jung, wua ekj Gott no fruach. Ekj jäw Jehova dän fa sien gaunzet Läwen.” Elkana un Hana kjeemen jieda Joa no Samuel un brochten dän eenen nieen Äwarock onen Meiwen. Jehova jeef Hana noch dree Säns mea un twee Dajchta.