Wan doa een Kjlienet jebuaren woat, es daut fa de Lied eene groote Freid, oba daut haft uk väl opp sikj. Veleicht hab jie junt daut ea goanich kunt väastalen, woo väl Tiet un Krauft daut brukt, een Kjint to besorjen. Wan eena nich jenuach Schlop kjricht un daut met de Jefeelen soo opp un dol deit, kaun daut fa dän Ehestaunt schwoa sennen. Jie motten junt doa beid fäa enstalen, junt om daut Kjliene to kjemren, un uk doano seenen, daut jie aus Ehelied veeent bliewen. Woo kaun de Schreft junt doabie halpen?

WAUT DE SCHREFT SAJCHT: “Leew es jeduldich, Leew es frintlich”. Dee “es nich nosikj, see lat sikj nich vebetren” (1. Korinta 13:4-5). Wan du jroz eene Mame jeworden best, dan woascht du mieeschtens bloos om jun Bäbe todoonen sennen. Daut es uk goot, oba vejät nich, daut dienen Maun daut uk aun die fält. Aundasch kunn dee sikj leicht tosied jeschowen feelen. Wies dän daut jeduldich un leeftolich, woo väl du siene Help met daut Bäbe räakjenst un daut hee fa die väl wieet es.

“Jie Maunslied, got veninftich om met june Frues” (1. Petrus 3:7). Sie die doaräwa em kloaren, daut diene Fru meist aul äare Krauft fa daut Bäbe brucken woat. Wäajen äare niee Veauntwuatunk aus Mame feelt dee sikj veleicht eenjemol sea drock, äwameed ooda mau rajcht mootloos. Daut kaun uk sennen, daut dee sikj leicht oajat. Dan proow ruich to bliewen, wiels “een jeduldja Maun es bäta aus een Kjrieja” (Spricha 16:32). Lot die en dee äare Loag nenn un unjastett dee (Spricha 14:29).

WAUT JIE DOONEN KJENNEN:

• De Pape: Halp diene Fru met daut Bäbe – uk de Nacht. Lot aundre Sachen dolla toch un nemm die mea Tiet fa diene Fru un daut Kjliene

• De Mame: Wan dien Maun die met daut Bäbe halpen well, dan lot daut. Veleicht weet dee sikj doa nich soo goot met. Oba gruns dän doawäajen nich ut; wies dän leeftolich, woo daut mott

WAUT DE SCHREFT SAJCHT: Jie “sent eent” (1. Mose 2:24). Wan doa nu uk eena mea enne Famielje es, sent de Ehepoatna doawäajen eent soo aus ea. Jäft aulsoo jun bastet, daut jie em Ehestaunt faust vebungen bliewen.

Wan du eene Ehefru best, dan sie dankboa, wan dien Maun die halpt un unjastett. Saj dän daut, woo sea du daut jleichst. Soone Wieed sent heelsom (Spricha 12:18). Wan du een Ehemaun best, dan saj diene Fru, woo sea du ar leefst un daut see fa die väl wieet es. Low ar fa aul daut, waut see fa de Famielje deit (Spricha 31:10, 28).

“Kjeena saul sien ieejnen nutzen sieekjen, oba daut, waut sienem näakjsten goot deit” (1. Korinta 10:24). Doo emma daut, waut fa dienen Ehepoatna daut baste es, un low dän. Nämt junt Tiet toom unjarenaunda räden un horcht eena dän aundren too. Wan daut om daut Jeschlajchtsläwen jeit, dan denkj nich daut ieeschte aun die, oba aun daut, waut dienen Poatna fält. De Schreft sajcht: “Trakjt junt nich eena vom aundren trigj, buta jie woaren junt beid doarenn eenich” (1. Korinta 7:3-5). Schäm die nich, met dienen Poatna doaräwa to räden. Junen Ehestaunt woat daut sea togood komen, wan du jeduldich best un die en dienen Poatna siene Städ stalst.

WAUT JIE DOONEN KJENNEN:

• Seet doano, daut jie uk mol Tiet bloos fa junt beid haben

• Doo emma wada waut fa dienen Poatna toom dän wiesen, daut du am leefst, biejlikj een Breefkje schriewen ooda een Jeschenkjsje jäwen

WAUT DE SCHREFT SAJCHT: “Wiels du von Kjint aun met de Heilje Schreft bekaunt best, kaun dee die dän Wajch wiesen, woo du . . . kaust seelich woaren” (2. Timotäus 3:15). Berät junt daut, waut jie doonen wellen, om jun Kjlienet to lieren. Bäbes kjennen sea väl lieren, aul ea dee jebuaren sent. Dee woaren dan aul en, waut de Mame feelt, un kjanen de Elren äare Stemmen. Doot daut Bäbe von kjlien aun väaläsen. Veleicht kaun daut noch nich krakjt vestonen, waut jie doa läsen, oba daut woat halpen, daut daut lota jleicht to läsen.

Denkjt kjeenmol, daut jun Bäbe too kjlien es toom daut von Gott vetalen. Daut es uk fein, wan daut hieet, woo jie bäden (5. Mose 11:19). Mau rajcht wan jie met daut Kjint spälen, kjenn jie von daut räden, waut Gott aules jemoakt haft (Psalm 78:3-4). Met de Tiet woat jun Kjint enwoaren, woo sea jie Jehova leewen, un woat dautselwje doonen.

WAUT JIE DOONEN KJENNEN:

• Froacht Jehova no Weisheit, daut jie jun Kjint fein opptrakjen kjennen

• Doot daut, waut jie daut Kjliene biebrinjen wellen, emma wada sajen; soo woat daut bosich lieren