Susy es manke Jugent. See es noch nich mol tieen Minuten doa un dan sajcht aul wäa hinja ar:

Susy dreit sikj om un sitt äare Frind Tina met twee Budlen. See weet fuaz, daut es stoakjet. Tina helt ar eene Buddel han un sajcht: “Du best je aul nich mea gaunz kjlien toom een bät uthoaken, ooda best?”

Rajcht jesajcht well Susy nich, oba Tina es je äare Frind. Un see well nich, daut Tina jleeft, met ar jeit nuscht väatohaben. Un Tina es uk eene feine Mejal. Wan dee stoakjet drinkjt, dan mott daut doch woll nich soo schlemm sennen. Susy denkjt bie sikj: “Daut’s je bloos een Bea. Daut sent nich Droggs.”

Waut wurscht du en Susy äare Städ doonen?

Wan du wurscht wellen daut rajchte doonen, dan motst du weeten, wäa du best. Daut meent: Du motst die selfst kjanen un weeten, waut du fa rajcht un orrajcht talst. Wan du die doaräwa em kloaren best, dan hast du de Krauft, en dien Läwen selfst to entscheiden un nich aundre (1. Korinta 9:26-27).

Woo kaust du soo wiet komen? De vea Froagen oppe näakjste beid Sieden woaren die doabie halpen.

Wan du weetst, waut du fein kaust, un diene goode Sieden kjanst, dan woascht du die stoakja un sechra feelen.

EEN VÄABILT UT DE SCHREFT: De Apostel Paulus schreef: “Un wan ekj em räden uk nich soo besondasch sie, ekj hab oba Erkjantnis” (2. Korinta 11:6). Paulus wist sea väl ut de Schreft, un soo kunn dee stoakj bliewen, wan aundre jäajen dän wieren. Wan äwa am uk schlajcht jerät wort, deed am daut nuscht aun (2. Korinta 10:10; 11:5).

DENKJ ÄWA DIE NO: Schriew hia han, waut du besonda fein vesteist.

Nu schriew eenatlei opp, woo du daut hast. (Best du biejlikj sea om aundre todoonen, opp to veloten, emma enne Tiet ooda hast du väl toom äwajen?)

Wan du toolatst, daut de schwake Sieden dien Läwen kontrollen, dan kaun daut leicht boajauf gonen – soo aus bie eene Kjäd: Dee ritt emma bie daut schwakste Jelenkj auf.

EEN VÄABILT UT DE SCHREFT: Paulus wist, woont siene schwake Sieden wieren. Hee schreef: “Ennalich stemm ekj met Freiden met Gott sien Jesaz. Oba en miene Jläda see ekj een aundret Jesaz, daut jäajen daut Jesaz stritt, daut ekj doonen well, un mie aun daut sintelje Jesaz veskloft, daut noch en mie es” (Reema 7:22-23).

DENKJ ÄWA DIE NO: Woone schwake Sieden motst du unja Kontroll kjrieen?

Wurscht du die eenen Tekse aunnämen un velangen, dee sull soo lang rombeislen, bat de Tenk ladich wia? Daut wudd nich kluak sennen un wudd dia komen!

De Lia: Wan du weetst, wua du em Läwen hanwest, dan kaust du plonen, woo doa hantokomen, un woascht die nich bloos rombeislen.

EEN VÄABILT UT DE SCHREFT: Paulus schreef: “[Ekj] ran . . . nich aus eena, dee nich weet, wua hee han well” (1. Korinta 9:26). Paulus jinkj sien Läwen nich bloos, onen to weeten wuahan; hee neem sikj waut väa un strenjd sikj aun, bat doa to komen (Filippa 3:12-14).

DENKJ ÄWA DIE NO: Schriew hia dreeatlei han, waut du west benna een Joa volbrinjen.

Wan du selfst nich eene ieejne Meenunk hast, dan woascht du emma proowen soo to sennen aus diene Frind. Daut wiest, daut du die selfst nich kjanst.

Wan du die oba goot kjanst un weetst, waut du west, dan woascht du dienen Sträakj gonen, endoont waut aundre doonen.

EEN VÄABILT UT DE SCHREFT: De Profeet Daniel wia noch ernoa junk, aus hee sikj “en sien Hoat eenich” wia, daut hee Gott siene Jesazen jehorchen wull, wan siene Famielje uk wiet auf wia (Daniel 1:8, NW). Daniel wist krakjt, wäa hee wia un waut hee wull. Hee deed daut, wua hee sikj äwa secha wia.

DENKJ ÄWA DIE NO: Äwa waut best du die secha? Biejlikj: Jleefst du aun Gott? Wan jo, wuarom? Waut es fa die de Bewies, daut et werkjlich eenen Gott jeft?

Jleefst du, daut die daut togood kjemt, waut Gott von die haben well? Wan jo, wuarom?

West du dan nu soo sennen aus een Blaut, waut vom Wint han un häa weit, ooda leewa soo aus een Boom, waut uk jäajen groote Storms uthelt? Wan du die secha best, waut du jleefst, dan woascht du soo sennen aus de Boom. Du woascht dan weeten, wäa du soo rajcht best.