Wan een Frint narfenkrank es, weet wie veleicht nich krakjt, woo wie dän halpen kjennen. Wie wiesen, woo sea wie om dän bekjemmat sent, wan wie dän halpen, met siene Narfenkrankheit foadich to woaren. Oba woo?

“Siet schwind bie de Sach toom horchen”. (JAKOBUS 1:19)

Eent von daut baste, woo du dienen Frint halpen kaust, es, wan du am goot toohorchst, wan dee to die vetalt. Un denkj nich, daut du to aules waut sajen motst. Lot dän enwoaren, daut du toohorchst un om dän bekjemmat best. Doo dän nich fuaz rechten, oba proow dän to vestonen. Un denkj doaraun, daut dee veleicht waut sajcht, waut dee nich soo meent un lota veleicht beschoden deit (Hiob 6:2-3).

“Treest dee, dee de Moot verutscht es.” (1. TESSALONICHA 5:14)

Veleicht haft dien Frint daut sea schwoa met waut ooda dee feelt sikj nuscht wieet. Wan du uk nich krakjt weetst, waut du to am sajen saust, kaust du am Moot un Troost jäwen, wan du am vesechascht, daut du om dän bekjemmat best.

“Een Frint woat emma Leew bewiesen”. (SPRICHA 17:17)

Denkj nich bloos, daut du aul weetst, woo du dienen Frint halpen kaust, oba froag dän, waut dän fält. Wan dienen Frint daut schwoa es, krakjt to sajen, waut am fält, kaust du am veleicht Iedeeen jäwen, waut jie kjennen toop  doonen. Soo aus buten wua toop gonen, halpen met enkjeepen, dän halpen besorjen ooda sestwaut (Galata 6:2).

“Siet jeduldich”. (1. TESSALONICHA 5:14, JHF)

Veleicht well dien Frint die nich emma vetalen, woo hee sikj feelt. Oba du kaust dän vesechren, daut du emma reed best dän tootohorchen, wan dee met die räden well. Wäajen siene Krankheit kaun daut sennen, daut hee waut deit ooda sajcht, waut die wee deit. Veleicht oajat dee sikj leicht ooda sajcht daut auf, wan jie waut toop jeplont hauden. Dan sie jeduldich un proow dän to vestonen (Spricha 18:24).

Farrah a äare Frindin haft groote Angst (anxiety disorder/trastorno de ansiedad) un es sea rauf met de Narfen (clinical depression/depresión clínica). Un daut veuasoakt, daut see nich äten well (eating disorder/trastorno alimentario). Farrah sajcht: “Ekj proow eene Frindin to sennen, met wäm see emma vetalen kaun. Ekj horch ar emma too, uk wan ekj äare Trubbels nich leesen kaun. Eenje Mol fält ar bloos wäm, waut ar goot toohorcht, dan feelt see sikj aul bäta.”

Ha-eun, waut sea rauf met de Narfen es (clinical depression/depresión clínica), sajcht: “Eent von miene Frind es emma soo leeftolich to mie. See kroagd mie han to eene scheene Moltiet. Un wiels see soo leeftolich to mie wia, wia daut fa mie leichta, to ar äwa miene Jefeelen to vetalen. Daut jeef mie väl Moot!”

Jacob siene Fru es sea rauf met de Narfen (clinical depression/depresión clínica). Hee sajcht: “Daut es sea wichtich, jeduldich to sennen. Wan miene Fru waut deit, waut mie wee deit, dan denkj ekj emma doaraun, daut see daut nich met Fliet deit, oba wäajen see dise Krankheit haft. Daut halpt mie, daut ekj nich leicht doll woa un ar proow to vestonen un leeftolich sie to ar.”

Enrico, waut eene ennaliche groote Angst haft (anxiety disorder/trastorno de ansiedad), sajcht: “Miene Fru es eene groote Help fa mie; dee steit mie emma bie. Wan mie aules soo schwoa es wäajen miene ennaliche Angst, bemott see mie kjeen Mol, waut to doonen, waut mie nich jankat. Uk wan see dan nich daut doonen kaun, waut ar jankat. Ekj räakjen ar sea väl, wiels see soo väl fa mie oppjeft un nich bloos aun sikj selfst denkjt.”