• Von Gott utjewält sennen. “Ekj [hab] mienen Kjennich aunjestalt. . . . Ekj woa die de Velkja aus Oafgoot jäwen, un du saust de gaunze Welt ieejnen” (Psalm 2:6, 8).

• Von dän Kjennich David aufstaumen. “Ons es een Kjint jebuaren, wie haben eenen Sän jekjräajen . . . Sien Machtrajcht un de Fräd unja am woat onen Enj toonämen; hee woat opp David sien Troon setten” (Jesaja 9:5-6).

• En Betlehem jebuaren woaren. “Du, Betlehem, . . . von die woat dee komen, dee . . . de Leida sennen woat. . . . Hee woat äwa de gaunze Ieed harlich sennen” (Micha 5:1, 3).

• Von Menschen aufjewäsen un omjebrocht woaren. “Däm haben see sea toojesat un am daut schwoa jemoakt, . . . hee must sien Läwen hanjäwen fa de Schult waut mien Volkj vedeent haud” (Jesaja 53:7-8).

• Vom Doot oppstonen un veharlicht woaren. Aposteljeschicht 2:31, 33 sajcht, daut “siene Seel nich wudd bie de Doodes jeloten woaren, un daut sien Kjarpa nich vekomen wudd. . . . Nu daut Gott am bie sikj to rajchte Haunt erhowen haft”.

Mau bloos aun eenen Mensch haft sikj aul dit krakjt erfelt, un daut es Jesus Christus. Een Enjel säd to siene Mutta, Maria: “Gott de Har woat am sien Voda David sienen Troon jäwen. . . . Sien Kjennichrikj woat niemols een Enj nämen” (Lukas 1:31-33).

Jesus wort oppe Ieed kjeenmol Kjennich. Hee woat vom Himmel äwa de Menschen rejieren aus Kjennich von Gott sien Kjennichrikj. Wuarom woat hee soon besondra Kjennich sennen? See wie mol, waut Jesus deed, aus hee oppe Ieed wia.

•   Jesus kjemmad sikj om de Menschen. Jesus holp Mana uk Frues aus junk ooda oolt un endoont von wua dee häakjeemen ooda woo dee aunjeseenen wieren (Matäus 9:36; Markus 10:16). Een leprakranka Maun säd mol to Jesus: “Wan du west kaust du mie reinjen.” Jesus jaumad daut un hee heeld dän (Markus 1:40-42).

• Jesus lieed ons, woo wie Gott jefaulen kjennen. Hee säd: “Du kaust nich Gott deenen un daut Rikjtum.” Hee säd uk, wie sullen aundre soo behaundlen, aus wie selfst wullen behaundelt woaren. Un hee wees uk, daut Gott nich bloos doano kjikjt, waut wie doonen, oba uk no daut, waut wie denkjen un feelen. Soo, om Gott to jefaulen, mott wie oppaussen, waut wie en ons Hoat haben (Matäus 5:28; 6:24; 7:12). Un wan wie wellen opp iernst schaftich sennen, säd Jesus, dan must wie lieren, waut Gott velangt un daut dan uk doonen (Lukas 11:28).

• Jesus lieed, waut daut meend, aundre to leewen. Waut Jesus säd un deed jinkj aundre to Hoaten. “De Menschen [staunden] äwa waut hee lieren deed, wiels hee lieed soo aus eena, dee met Krauft doarhinja stunt” (Matäus 7:28-29). Hee lieed an: “Siet june Fiend goot”. Hee bäd mau rajcht fa eenje von dee, waut Schult hauden, daut hee omjebrocht wort. Hee säd: “Voda, vejeff an, wiels see weeten nich waut see doonen” (Matäus 5:44; Lukas 23:34).

Jesus es krakjt de paussenda, om äwa aule Menschen to rejieren, wiels hee to aundre soo fein un leeftolich es. Oba wanea woat dee aunfangen to rejieren?