1. Woo stalst du die Jehowa väa?

 HAST du die mol prooft väatostalen, woo Jehowa lat? Wan du to am bäden deist, woo stalst du die am väa? De Bibel beschrift Jehowa opp veschiedne Wäaj, wan wie am uk nich seenen kjennen. Jehowa woat eene “Sonn uk Schilt” jenant ooda uk “een venichtendet Fia” (Psa. 84:12; Heb. 12:29). Hesekiel schreef, daut Jehowa soo lat aus een Safier-Steen, een jlieejendet Iesa ooda een dacha Räajenboagen (Hes. 1:26-28). Eenje von dise Beschriewungen wundren ons veleicht ooda wie feelen ons doaderch mau rajcht kjlien.

2. Waut kaun ons daut schwoa moaken, Jehowa noda to komen?

² Wäajen wie Jehowa nich seenen kjennen, kjennen eenje daut veleicht meist nich jleewen, daut hee äant leeft. Eenje denkjen, daut Jehowa äant kjeenmol woat leewen kjennen, wäajen daut, waut see ea beläft haben. Veleicht haben dee nich eenen Voda jehaut, waut äant leewd. Jehowa kaun daut vestonen, woo deejanje sikj feelen un waut daut aun dee deit. Toom ons halpen, lat hee ons derch sien Wuat weeten, daut hee een sea leeftolja Gott es.

3. Wuarom sell wie mea äwa Jehowa siene Leew lieren?

³ Daut Wuat, waut daut baste beschrift, woo Jehowa es, es Leew. De Bibel sajcht je: “Gott es Leew” (1. Joh. 4:8, NW). Aules, waut hee deit, deit hee ut Leew. Gott siene Leew es soo groot un soo stoakj, daut hee nich bloos dee Leew wiest, waut am leewen, oba uk dee, waut am nich leewen (Mat. 5:44-45). En disen Artikjel woa wie Jehowa noch bäta kjanen lieren un woo sea hee ons leeft. Je mea wie äwa Gott lieren, je dolla woa wie am leewen.

JEHOWA RÄAKJENT ONS SEA VÄL

4. Woo feelst du die doaräwa, daut Jehowa die leeft? (See uk daut Bilt.)

⁴ “De Voda selfst räakjent junt väl” (Joh. 16:27). Jehowa vejlikjt sikj selfst en de Bibel met eene leeftolje Mutta (Jes.  66:12-13). Stal die mol väa, woo eene Mutta sikj leeftolich om äa Bäbe kjemmat. See helt daut oppe Schoot, schockelt daut un rät leeftolich met eene nate Stemm to daut. Wan daut Bäbe roat ooda Weedoag haft, dan deit see aules, waut see kaun, om daut Bäbe to berujen. Wan wie Weedoag haben, dan kjenn wie ons opp Jehowa siene Leew veloten. De Psalmenschriewa schreef: “Aus ekj mie wäajen miene Angst un Sorjen nich mea Rot wist, deetst du mie treesten un berujen” (Psa. 94:19, NW).

5. Waut bediet Jehowa siene truhoatje Leew fa die?

⁵ Jehowa es tru (Psa. 103:8). Hee woat nich fuaz met ons oppjäwen, wan wie waut orrajchtet jedonen haben. Daut Volkj Israel deed Jehowa emma wada enteischen, oba wan dee een Leetsennen hauden, dan wees Jehowa äant wada Leew. Daut sajcht: “Wiels jie mie soo väl wieet sent, wiels ekj junt soo väl räakjen un junt soo goot sie” (Jes. 43:4-5). Gott siene Leew haft sikj nich jeendat. Wie kjennen ons emma opp dee veloten. Mau rajcht wan wie groote Fäla jemoakt haben, woat Jehowa ons nich veloten. Wan wie een Leetsennen haben un trigj no Jehowa komen, woa wie seenen, daut hee ons noch emma leeft. Hee vesprakjt, daut hee “väl vejeft” (Jes. 55:7). De Bibel sajcht, daut wie daut beläwen woaren, “daut Jehowa [ons] kaun Moot un Krauft jäwen” (Apj. 3:19).

6. Waut wiest Sacharja 2:12 ons äwa Jehowa?

⁶ Läs Sacharja 2:12. Wäajen Jehowa ons leeft, woat hee daut fuaz en, woo wie ons feelen un well ons jieren beschitzen. Hee es truarich, wan wie lieden motten. Doawäajen kjenn wie ons secha sennen, daut hee ons auntwuaten woat, wan wie bäden: “Bewoa mie soo aus de Kjikja em Uag” (Psa. 17:8). Daut Uag es een sea neiwet un wieetvollet Poat aun onsen Kjarpa. Doawäajen vejlikjt Jehowa ons met sienen Kjikja em Uag. Daut wudd soo sennen, aus wan hee sajcht: “Wäa miene Deena Schoden aundeit, deit waut Schoden, waut mie sea wieetvoll es.”

7. Wuarom sell wie ons Vetruen stoakjen, daut Jehowa ons leeft?

⁷ Jehowa well, daut wie ons doa gaunz em kloaren äwa sent, daut hee ons perseenlich leeft. Oba hee weet, daut wie veleicht eenjemol wundren, aus hee ons werkjlich leeft, wäajen daut, waut wie ea beläft haben. Ooda veleicht beläw wie nu jroz uk waut, waut ons  Vetruen oppe Proow stalt, aus hee ons werkjlich leeft. Waut kaun ons halpen, wada een jratret Vetruen to kjrieen? Wan wie mea doaräwa lieren, woo Jehowa sienen Sän Jesus, de Jesaulwde un ons aula Leew wiest.

WOO JEHOWA SIENE LEEW WIEST

8. Wuarom wia Jesus sikj gaunz secha, daut sien Voda am leewd?

⁸ Jehowa un Jesus sent aul lenja toop jewast, aus irjent sestwäa. Wäajen dee em Himmel aul millionende Joaren toop wieren, worden dee emma jratre Frind un dee kjrieejen eene groote Leew eena fa dän aundren. En Matäus 17:5 säd Jehowa gaunz kloa, daut hee Jesus leewd. Hee wudd eefach haben kunt sajen: “Dits dee, met wäm ekj tofräd sie.” Oba hee wull haben, daut wie daut weeten sullen, woo sea hee Jesus leewd. Doawäajen nand hee am “mien Sän, dän ekj sea leew”. Jehowa wia brow met Jesus, besonda wiels Jesus reed wia, sien Läwen opptojäwen (Efs. 1:7). Un Jesus twieweld doa nich aun, daut sien Voda am leewd. Jesus wia sikj gaunz secha doaräwa un hee kunn daut mau rajcht en sikj späaren. Hee säd emma wada, daut hee sikj secha wia, daut sien Voda am leewd (Joh. 3:35; 10:17; 17:24).  

9. Woon Wuat wiest, woo sea Jehowa de Jesaulwde leeft? Laj daut ut (Reema 5:5).

⁹ Acht wie mol opp daut Wuat, waut Jehowa brukt toom wiesen, woo sea hee de Jesaulwde leeft (läs Reema 5:5). Daut sajcht, daut “Gott siene Leew en … [äare] Hoaten jegoten” haft. Een Buak toom nosieekjen vejlikjt Gott siene Leew “met eenen Wotastroom”. Dit Biespel wiest kloa, woo sea Jehowa de Jesaulwde leeft! Un de Jesaulwde weeten, daut dee “von Gott, dän Voda, jeleeft woaren” (Jud. 1). De Apostel Johanes säd, woo dee sikj feelden. Hee schreef: “Seet, waut de Voda ons fa ne Leew bewäsen haft, daut wie Gott siene Kjinja jenant woaren” (1. Joh. 3:1). Oba leeft Jehowa bloos de Jesaulwde? Nä, hee haft bewäsen, daut hee ons aula leeft.

10. Waut es de jratsta Bewies doafäa, daut Jehowa die leeft?

¹⁰ Waut es de jratsta Bewies von Jehowa siene Leew? Daut Leesjelt. Doaderch haft Jehowa ons mea Leew jewäsen, aus jeemols wäa haft! (Joh. 3:16; Reem. 5:8). Jehowa schekjt sienen leewen Sän, fa aule Menschen to stoawen, daut äant kunnen de Sinden vejäft woaren un daut see kunnen met am Frind sennen (1. Joh. 4:10). Je dolla wie doaräwa nodenkjen, waut Jehowa un Jesus daut Leesjelt jekost haft, je bäta woa wie vestonen, woo sea dee jiedrem eenen von ons leewen (Gal. 2:20). Jehowa siene Jerajchtichkjeit velangd, daut doa must een Leesjelt betolt woaren. Un doch deed Jehowa daut nich bloos doawäajen – daut wia uk een Jeschenkj ut Leew. Jehowa haft ons siene Leew doaderch jewäsen, daut hee daut wieetvolste oppjeef, waut hee haud – daut wia Jesus. Hee leet daut too, daut sien Sän fa ons lieden un stoawen must.

11. Waut lia wie ut Jeremia 31:3?

¹¹ Bat nu hab wie aul jeseenen, daut Jehowa nich bloos Leew haft, oba hee sajcht ons daut uk, woo sea hee ons leeft (läs Jeremia 31:3). Jehowa haft ons no sikj jetrocken, wäajen hee ons leeft (see uk 5. Mose 7:7-8). Nuscht un uk kjeena kaun ons von siene Leew scheeden (Reem. 8:38-39). Woo feelst du die, wan du äwa dise Leew nodenkjst? Läs dän 23. Psalm un kjikj doano, woo David sikj feeld, daut Jehowa am leewd un fa am sorjd. Kjikj uk doano, waut dise Leew aun die doonen kaun.

WOO FEELST DU DIE, WAN DU ÄWA JEHOWA SIENE LEEW NODENKJST?

12. Om waut jeit daut en dän 23. Psalm?

¹² Läs Psalm 23:1-6. En dän 23. Psalm rät David en een Leet doavon, daut hee sikj secha  es, daut Jehowa am leeft un leeftolich fa am sorcht. Hee rät uk doavon, woo sea hee un Jehowa vebungen wieren, dän hee sien Hoad nant. David feeld sikj secha, wan Jehowa am aunleiden deed un hee veleet sikj gaunz opp am. David wist, daut Jehowa am jieda Dach Leew wiesen wudd. Wuarom wia David sikj soo secha?

13. Wuarom wia David sikj secha, daut Jehowa fa am sorjd?

¹³ “Mie woat daut aun nuscht fälen”. David feeld sikj goot vesorcht, wäajen Jehowa am noch emma aules jejäft haud, waut am fäld. David wist uk, daut Jehowa sien Frint wia un eenen Jefaulen aun am haud. Doawäajen wia hee sikj secha, daut Jehowa am uk wieda aules jäwen wudd, waut am fäld, krakjt endoont waut doa noch oppkomen wudd. Wäajen David doaropp vetrud, daut Jehowa am leewd un fa am sorjen wudd, holp am daut uk, daut hee kunn schaftich un tofräd sennen, enne Städ sikj een deel Sorjen to moaken (Psa. 16:11).

14. Woo sorcht Jehowa leeftolich fa ons?

¹⁴ Jehowa sorcht leeftolich fa ons, besonda wan wie waut schwoaret derchmoaken. Kler a waut aul fa äwa 20 Joa em Betel deent, wist nich, woo see äare Famielje halpen sull, waut eene schwoare Tiet no de aundre beläwden. Äa Voda haud eenen Schlach, eene von äare Sestren wort utjeschloten un äare Famielje velua äa kjlienet Jeschaft un äa Hus. Woo wees Jehowa, daut hee leeftolich fa dee sorjd? Kler sajcht: “Jehowa sach doano, daut miene Famielje emma aules haud, waut dee fa dän Dach brukten. Foaken jeef Jehowa ons soogoa mea, aus waut wie brukten! Ekj denkj foaken äwa dise Tieden no, woo Jehowa mie  siene Leew wees, un ekj räakjen daut sea väl. Aun dit to denkjen halpt mie, wieda to moaken, wan doa waut schwoaret oppkjemt.”

15. Wuaderch kjrieech David niee Krauft? (See uk daut Bilt.)

¹⁵ “Hee jeft … [mie] niee Krauft”. Eenjemol feeld David sikj gaunz äwafoddat, wäajen aul siene Trubbels un Schwierichkjeiten, waut hee derchjinkj (Psa. 18:5-7). Oba Jehowa siene Leew un daut dee fa David sorjd, jeef am wada niee Krauft. Wan hee meed wia, leid Jehowa am soo to sajen opp “jreene Weid” un leet am “bie freschet Wota reiwen”. Doaderch kjrieech David wada niee Krauft un kunn Jehowa wieda met Freiden deenen (Psa. 18:29-33).

16. Woo haft Jehowa siene Leew die Krauft jejäft?

¹⁶ Krakjt soo es daut vondoag uk: Wan wie schwoaret un Schwierichkjeiten beläwen, dan kjenn wie daut uthoolen, wäajen Jehowa siene truhoatje Leew (Klg. 3:22; Kol. 1:11). See wie mol daut Biespel von Rachel. Ar wia daut meist äwaschwoa, aus äa Maun ar un Jehowa veleet en de Tiet von de COVID-19-Krankheit. Waut deed Jehowa fa ar? See sajcht: “Jehowa wees mie emma, daut hee mie leewd. Hee holp mie, Frind to haben, waut mie biestunden, mie Äten brochten, mie feine Sachen un Bibelvarzhen schreewen, mie schaftich aunkjikjten un mie emma doaraun denkjen holpen, daut Jehowa om mie bekjemmat wia. Ekj dank Jehowa emma wada doafäa, daut hee mie soone groote, leeftolje Famielje jejäft haft.”

17. Wuarom kunn David met siene Angst foadich woaren?

¹⁷ Ekj “fercht … kjeen Ojjlekj, wiels du best bie mie”. David sien Läwen wia foaken en Jefoa un hee haud een deel stoakje Fiend. Oba met Jehowa siene Help feeld hee sikj secha un beschizt. David wia sikj secha, daut Jehowa en jieda Loag met am wia, un daut holp am, nich soo väl Angst to haben. Doawäajen säd hee en een Leet: “[Jehowa] rad mie ut aul miene Forcht” (Psa. 34:5). David haud foaken sea Angst, oba hee kunn doamet foadich woaren, wiels hee wist, daut Jehowa am sea leewd.

18. Woo jeft Jehowa siene Leew ons de Sechaheit, daut wie gaunz opp am vetruen kjennen, wan wie Angst haben?

¹⁸ Wuarom jeft ons daut en eene butajeweenlich schwoare Loag Krauft, wan wie weeten, daut Jehowa ons leeft? Eene Sesta, waut Susi heet un Pionia es, sajcht, woo see un äa  Maun sikj feelden, aus äa Sän sikj daut Läwen neem. See sajcht: “Wan soon schlemmet passieet, dan moakt eenem daut grulich sea truarich un eena haft Angst, daut doa wada waut schlemmet passieren woat. Oba Jehowa siene Leew haft ons jeholpen, daut wie ons secha un beschizt feelen.” Rachel, von dee wie ea aul räden, sajcht: “Eene Nacht, aus ekj grulich sea truarich wia un mie Sorjen muak un Angst haud, road ekj un bäd to Jehowa opp ludes. Krakjt dan kunn ekj späaren, daut Jehowa mie berujen deed, krakjt soo aus eene Mame äa Bäbe beruicht, un ekj schleep wada en. Ekj woa dit kjeenmol vejäten.” Een Eltesta, waut Tasos heet, wia vea Joa em Jefenkjnis, wäajen hee sikj nich wull utlieren loten toom Soldot sennen. Woo kunn hee späaren, daut Jehowa am leewd un fa am sorjd? Hee sajcht: “Jehowa jeef mie mea, aus waut ekj brukt. Dit jeef mie de Sechaheit, daut ekj gaunz opp am vetruen kunn. Derch sienen heiljen Jeist jeef Jehowa mie uk Freid, wan daut em Jefenkjnis uk schwoa wia. Derch dit kunn ekj seenen, daut je mea ekj opp am vetru, je dolla kjemt mie siene Leew togood. Doawäajen funk ekj doa em Jefenkjnis met dän Pioniadeenst aun.”

KOMM GOTT EMMA NODA

19. (a) Äwa waut woa wie bäden, wan wie ons secha sent, daut Jehowa ons leeft? (b) Waut jleichst du daut dolste von Jehowa siene Leew? (See daut Hock “ Bibelvarzhen, waut ons wiesen, daut Jehowa ons leeft”.)

¹⁹ De Erfoarungen, waut wie hia jeseenen haben, wiesen, daut Jehowa, de leeftolja Gott, met ons es! (2. Kor. 13:11). Hee es om jiedrem eenen bekjemmat. Wie sent ons secha, daut hee “truhoatje Leew” fa ons haft (Psa. 32:10). Je dolla wie doaräwa nodenkjen, woo hee ons siene Leew jewäsen haft, je dietelja woat ons daut, daut hee om ons bekjemmat es, un je noda kom wie am. Wie kjennen gaunz op to am bäden un am sajen, woo sea ons daut aun siene Leew fält. Wie kjennen am uk sajen, waut ons Sorjen moakt, un ons uk secha sennen, daut hee ons vesteit un daut hee ons jieren halpen well (Psa. 145:18-19).

20. Wuarom brinjt Jehowa siene Leew ons noda no am?

²⁰ Krakjt soo aus een Fia ons aun eenen kolden Dach oppwoamt, krakjt soo kaun Jehowa siene Leew ons berujen, wan wie derch schwoaret gonen. Doawäajen well wie Jehowa siene Leew aunnämen, dee ons berujen un Fräd jäwen kaun. Un well wie aula sajen: “Ekj sie dän HARN goot”! (Psa. 116:1).